Miso (已結業)

市道真係好到不得了，星期六晩九點幾喺海港城搵食，間間都要排隊，結果去了呢間唔使排隊，不過又係美心集團旗下嘅日本fusion菜 - Miso.入到去，竟然叫我地兩個坐最近門口嘅嗰張枱，有冇搞錯，入面就唔滿，全場嘅枱只係坐咗六七成，有位都唔比客人，要客人開口要求。1. 脆脆蟹肉沙律.日本粉絲 - 用一層應該係好似春卷皮載住啲沙律，脆脆的，幾好味，芒果肉好甜，日本粉絲、青瓜絲、蟹肉，呢個組合好好，感覺同上次置地廣場間 賀菊 差不多。2. 香蔥拖羅卷 - 普通貨式，切口唔齊，高度不一，好唔整齊，賣相唔合格，入面用嘅拖羅又少又唔靚，毫毛味道可言，失敗。3. 日式薄切西冷牛肉飯 - 話薄切，其實係厚切。件西冷又多筋，都唔知叫人點食落口，不知所謂。4. 鹽燒鯖花魚 - 全晚最突出之作，真係幾好味，因為條魚夠肥，而且個廚燒得唔錯，啱啱好，外皮脆，入面啲肉仍然好嫰，終於有一樣似返啲樣。Comments: 可能真係一分錢一分貨，同上次間 賀菊 真係冇得比，雖然大家同屬一個集團。佢地又搵一個新手嚟serve我地，個待應仲掛住個牌，上面寫住"I am New"，真係比佢地激死。未試過可以慳返筆，無謂浪費金錢。