由細睇住佢由最盛世的三仔四仔電腦電子商場, 變成依家成間菲律賓共和國咁。
地段超優越, 由荃灣MTR行過去, 1分鐘必達。落雨仲唔使擔遮。
但點解淪落到依家咁既樣?! 管理公司同消防署真係要認真檢討下!
話說回來, 星期六泊低架車係路德圍, 臨時CALL住附近既朋友一齊去開餐。
本來想搭電梯, 點點兩部都停開!!! 於時行唯有扶手梯臨時"出境"經菲律賓共和國上去啦。
一樓條通道尚算OK, 難得仲唔使人逼人, 可能時間尚早。
一上到2樓, 差D出唔到扶手梯, 因為間銀行排哂長龍, 頂住個扶手梯出口位, 要大聲叫借借先出去....
咁, 都無人來管下, 管理公司做咩架?!
呢個位經典囉!!!!! 兩間最受歡迎舖頭一左一右, 叫人點轉上去扶梯?!
幾經辛苦上到去浦和, 門面裝修其實都幾花心思。可惜如果唔係兩部電梯都壞, 有幾多人願意經過呢過門入去呢? 想想樓下人逼人就煩!
一入口門, 就有店員醒目地歡迎, 並主動話唔好意思, D電梯壞哂! 窩心, 抵讚!!
而且成間舖一眼望去, 都幾多靚仔店員, 甚有韓風。
被安排坐係近窗位置, 望住新之城條行人天橋人來人往, 幾寫意。
任食放題, 開餐
一見到個拼盤, 掛住食, 食到一半先記得影相。所有野都超級新鮮! 尤其愛三文魚腩同鮑片!!!! 正呀!!!
壽司都好多種選擇, 而且件件新鮮即做, FEEL到有誠意。新鮮部份新鮮好味, 飯都米香四溢, 唔講以為置身高級壽司店。
天婦羅品稗亦好多, 總會有幾樣岩心水。而且熱辣辣, 唔係預先做好的。
1
最估佢唔到既係有燒三文魚鮫! 燒鯖魚亦好味, 而且啖啖肉! 加埋檸汁一齊食, 一流!
仲有日本清酒/啤酒任飲!!!!!!!!!!! 可惜今次開車, 唔飲得。下次來一定飲餐飽!
百幾元既價錢, 食到呢D高質素既食物, 真係一大發現。
仲自認係半個荃灣通, 估唔到力生上面有間咁高質素既日式放題, 默默地守候。
我敢講, 如果唔係力生個場俾人印象太差, 好多人諗起就卻步, 浦和一定係區內大熱。
希望商場管理公司真係做好D, 消防署亦快D巡巡 (D通道被阻塞到咁, 都得??!!)。
如果要為今次打分, 由地下行到佢大門口一定遠低於合格分數。但一入大門口至埋單, 無論店內環境, 食物質素以致服務水平, 都係一流! 我會打90分! 下次諗起食放題, 一定會諗起浦和!
