由於佢哋屬於酒吧牌照，所以我哋預先都要做好24小時快速檢測先可以入去，呢間餐廳職員態度個個都非常友善，俾人覺得好有親切感、好舒服！佢哋話自從五月重開之後就改咗Menu，依家主打係泰菜，不過佢哋都有意粉同薄餅可以選擇！
我哋首先叫咗幾碟小食送酒，炸雞軟骨好鬆脆，炸蝦餅亦都好彈牙 ，然後職員介紹烤焗鮮魷魚筒，呢個真係要特別介紹，配埋泰式辣汁，真係好有泰feel，另外仲叫咗泰式焗魚同泰式燒牛小扒，兩碟主菜都好好味，焗魚係用好多香茅同其他泰國香料烤焗，食落口肉質好鮮嫩，仲有啖啖嘅泰式風味，真係唔錯，牛小扒肉質好Juicy，配合佢哋特別嘅泰式醬汁，真係別有另一番泰式味道！
唔經唔覺傾吓飲吓，都不知不覺去到十點幾，但係大家都意猶未盡，繼續叫咗一個海鮮薄餅同炸薯條，海鮮薄餅個餅底好薄，上面鋪滿海鮮，焗得香脆可口，好好食！
時間過得好快，又係各自要歸家嘅時候，今晚大家真係好開心，我哋今晚將自己心中嘅秘密隱藏咗喺呢一個秘密花園裡面，大家永遠都係對方嘅聆聽者，所以以後無論開心或者唔開心，我哋都會去呢一個秘密花園度放鬆心情、真情流露呀！
