富盈火鍋雞煲專門店 (已結業)

現在這個時勢免得過都不會帶老人家周圍去，老人家想食火鍋，又懶去街市買餸，所以近近地去了樓下的酒樓，星期五都幾旺場，可能因為抵食啦，百幾二百就可以任飲任食火鍋及韓燒。三個人揀了蟲草花雞湯底，至少有半隻雞份量，湯底帶藥材香，而且味道濃郁，雞肉應該是即叫即滾，所以很嫩，完全唔韌。小食有春卷、咖哩角、炆鳳爪等，炸物香脆不油膩。火鍋料很多，不過老家食得唔多，試了肥牛、豬肉、幾款丸、鯇魚腩等等，鯇魚新鮮又嫩滑，肥牛都幾腍，丸都唔錯，其中一款還是爆醬。韓燒有多春魚、金菇肥牛、紅腸及牛舌等，牛舌超好食，切得薄又彈牙，而且店員會主動換紙及收碟，服務周到。甜品有奶凍及雀巢雪糕等。最後飲品都有啤酒及多款清新飲品。整體食物款式很多，性價比高，會再幫襯。