很得輝 (金堂閣)

营业中

休息中

「很得輝」嘅炸雞髀我一直都好想試，但屯門店個位有啲撠，之後知道大角咀開咗分店，又無的起心肝去幫襯。既然係去大角咀搵食，咁當然要去會一會佢啦。因為之後仲有嘢要去食，所以唔食套餐及其他嘢，淨係買一隻炸雞髀（$35）。落單後即時炸，需時七分鐘。炸好後，可以係側邊枱自助添加調味粉（有八款），最後加咗麻辣同蜜糖牛油（芝士無哂，可惜）。炸髀唔算好大隻，但炸得好靚（會用一支長竹籤打直插，撐起成隻雞髀），外層脆卜卜（表面唔多炸粉/炸漿，好薄薄一層），裡面肉質仍然嫩滑兼且有肉汁，而且一啲都唔油淋淋，配埋調味粉（麻辣+甜），味道不錯。