湯•米 (已結業)

見到OpenRice有半價，火鍋好似好抵食咁，就特登揀咗六點嘅時候去食晚餐。鋪頭六點先啱啱開晚市，一開始都唔係好多人，過咗半個鐘之後，就開始人頭湧湧。鋪頭嘅餐牌選擇唔多，主要都係買火鍋同埋一啲小食，今次叫咗個藥膳豚肉鍋同埋日式味增鍋試吓，發現其實兩款嘅材料都差唔多，都係好多菜，豚肉可能只得4-5塊到，對於鍾意健康養生嘅人來講可能係一個唔錯嘅選擇。不過買單都差唔多$50一鍋，相對來講呢間火鍋係算抵食。而且環境都唔錯，衛生都幾好。佢哋有自家製嘅醬料，包括沙茶醬、蒜蓉醬同埋日式醬汁，但對我來講個汁就唔太特別。不過火鍋個湯底都幾好味，似係雞湯底而且都夠濃郁，兩個鍋嘅材料都大同小異，有鵪鶉蛋、娃娃菜、豆腐、豚肉、蜆、腐竹、冬菇等等。總括來講，我覺得呢個價錢食到呢個質素都算唔錯。