位置唔算就腳，但好在唔算難搵。落咗巴士，見到士多後再行前少少，已經可以見到Cafe嘅外貌。置身於森林裏面的白色屋仔，感覺好清新，用嚟影相呃like完全無難度。再睇埋入面，有一種復古味，木製餐桌、舊唱片，播住曲婉婷嘅歌，又多咗一份溫馨感。
去嗰日係平日、又有小小落雨，加上一點幾已經去到，客人真係無乜，但覺得咁樣好舒服，唔洗同人逼，又唔會有人同我講限時幾多分鐘乜乜乜，終於有返少少放假嘅感覺！
講返重點：食物質素！原本擔心呢D cafe都係得個樣，但食落又覺得幾驚喜！
份量比想像中大，肉質夠juicy，朋友都食得好滿足。
雞扒好大塊好嫩好好味，沙律擺到滿，正正子！
細細件，綠茶味唔算太突出，不過不失啦。
識用呢種杯裝飲品都幾加分，有助保溫。右邊嗰杯係凍朱古力，都幾濃朱古力味，不錯喔！
食完梗係要喺出面影下相，外面張高腳吧檯位相信係唔少港女們影呃like相必爭位置，好彩食完都無人同我爭。影完一輪之後，有個唔知係老闆定職員嘅男人仲主動指埋後面個韆鞦位叫我地去影><
想放假hea一hea又遠離繁囂嘅你地，Forest Cafe都係一個唔錯嘅選擇。：）
