講返正題，呢間其實係上海素菜點心館，除咗可以叫餸食飯之外，仲可以食點心。頭先望到隔離檯嘅嘢食，個樣其實都幾吸引。等我哋又叫返啲嚟食先！
見到宣傳相影得咁吸引，我哋就一於叫返個「皇帝菜苗餃」同「蘿蔔絲酥卷」試下先。其他菜就自己睇餐牌點，點咗
－ 素鍋貼
－ 豆腐餃子
－ 紅豆沙鍋餅
－ 芙蓉炒桂花翅
「皇帝菜苗餃」先嚟，個樣真係幾靚！
餃皮好似透明咁晶瑩剔透，餡料一覽無遺。所以，我睇到裡面有好多菜苗呀，正！
外皮咬落煙韌，加上熱呼呼，好正！裡面嘅菜苗好多，好青綠。雖然無肉，連素肉都無，但味道都調得唔錯。感覺清新又唔油膩，唔錯！
之後出場嘅就係「豆腐餃子」。
其實，未見到個樣之前，我一直想像豆腐餃子究竟係咩樣。
見到食物之後，就覺得好可愛，真係諗都冇諗過豆腐可以包成餃子嘅樣，呢碟好似一隻海星咁浮喺上湯面……上湯有好多材料，如冬菇、薑絲。
咬開裡面亦有菜，健康又好清新。餃子皮雖然係豆腐包嘅，切得薄但都有一定硬度，唔會一夾就爛，可見廚師嘅工夫。
素鍋貼相對失色，餡料有冬菇、松子等等，味道淡。唯獨是皮煎得香口，攞返啲分。
芙蓉炒桂花翅幾特別，我最欣賞啲切得同樣幼嘅蛋白同素翅！
素翅比一般翅更有咬口，同埋啲芽菜一齊食，好爽口。蛋白份量多，同其他材料，好似素火腿同木耳一齊食，感覺幾fresh！
同事想食嘅「蘿蔔絲酥卷」都唔錯，出乎意料地唔油膩，外層炸得金黃，又脆卜卜，裡面有好多蘿蔔絲，清甜爽口，有驚喜。
甜品沒有點高力豆沙，因為同事不想吃，於是便選了「紅豆沙鍋餅」。
同樣是紅豆餡，不過外皮唔同。豆沙鍋餅味道都不錯，豆沙餡幼滑，甜甜哋。
外皮炸得脆而薄，粉都不厚，食下食下，好快就食完！值得一讚嘅係，食曬全個豆沙鍋餅都沒有感到膩滯。
今次呢餐素食，令我對素食嘅印象係好咗，原來素食都可以整得咁精緻同特別。下次有機會可以再試今次未食嘅素鵝！
