2DP (已結業)

好一段時間冇黎過2DP，上次黎係為左食佢既KFC素炸雞，但今次黎已經冇左依樣野食喇，個menu同店內裝潢都有少少唔同左，唔知係咪轉左手呢。鋪頭空間都比較少，我地被安排坐左喺吧枱隔離既二人枱，不幸既事稍後就發生左⋯⋯Um都係講左食物先！雞脾仔係來貨野，薄薄既腐皮扮雞皮，包住捲起左既鮮腐竹，面頭灑左少少椒鹽，就咁食都夠味，加埋泰式辣醬又係另一番風味。Impossible肉碎牛肝菌扁意粉既賣相唔錯，啲意粉都做到al dente，可惜impossible meat同牛肝菌既份量都太少，有少少呃稱既感覺。蜜瓜刨冰本身係落牛奶，但都可以轉豆奶變vegan。送到上黎個賣相有啲另人失望，首先係黑糖漿同蜜瓜既色唔多夾，第二就係蜜瓜唔夠甜，可能就係因為咁要加糖漿，之前食過係唔洗加糖漿的。講完食物可以講不幸事件喇！話說我地坐喺吧枱隔離食到中途，店員安排左兩個客人坐吧枱，結果餐飯既下半場我地都要近距離望住人地個pat pat食野，認真唔開胃⋯⋯個pat pat既距離近到一個點，我地連走都要叫個客人借過先出到去⋯⋯其實2DP既食物價錢都走中價路線，理應比個好啲既環境客人，希望佢地可以改善下啦。