旺記燒味茶餐廳 (已搬遷) 新店位置

【灣仔區】【旺記燒味茶餐廳】啱啱上一篇又走咗去寫岩盤牛扒，某啲人未必明白點解要用三舊幾水買兩個牛扒餐而唔係食碟女僕蛋包飯再買啲相以取悅女僕。始終佢哋成日出入高級食府，唔會明白我呢啲市井 foodie 做乜，等我又講啲茶餐廳嚟高興吓。今次講呢間嘢個背景都有啲攪笑，話說我同家慈去完維多利亞公園參觀「香港花卉展覽 2023」，佢就直接返屋企，我就等開工。咁等開工呢啲咁艱苦嘅時間，當然要趁機食吓嘢，又可以有多一個餐廳素材，應付吓啲稿。去到春園街附近，未諗到食乜，其實都心郁郁想入去金鳳叼碗我至愛嘅花生糊。不過我記得自己確實係打晒成手告急牌嘅無稿人士，為咗每日都可以打文畀我心愛嘅讀者，同埋女同事，我點都要磨鉛策蹇，努力寫啲嘢出嚟。喺附近見到呢間旺記，做燒味嘅，喺呢條街又有新景園又有金鳳，壓力一定大，睇吓佢咩料都好。用 $81 叫咗碗「燒鵝燒腩仔瀨粉」，由於係燒鵝雙拼所以咁貴。不過燒味師傅畀咗隻燒鵝髀我，嫩滑多汁，真係幾好食架喎。另外，個燒腩仔都好好食，啲豬味勁香，熱辣辣，只係略嫌佢調味重手咗少少，我個人覺得有少少鹹。碗瀨粉同啲醬汁就正正常常冇乜特別，而嘢飲我加 $8 飲杯「凍檸茶走甜」，正常茶餐廳