C2食堂 (已結業)

【深水埗區】【C2食堂】上次講到同真正哥嚟咗荔枝角香港工業中心做嘢，今日繼續，咁就當然繼續喺呢頭搵嘢食啦。上次講到喺 C 座地庫有個 food court，今次我哋就唔喺地庫食，喺返地面。事緣係喺等𨋢嘅時候，聽到有個送貨叔叔講有間食燒鵝嘅喺 C2，咁就梗係要試。去到呢間真係好工廈食堂 feel 嘅餐廳，又真係見到好多燒味擺晒喺度，亦都有好多燒味嘅套餐組合選擇。真正哥試咗個 $55 嘅「至尊叉燒飯」轉「米粉」，上菜嘅時候發現佢勁勁勁大碗，嚇到真正哥呆咗，而啲叉燒就幾好食，燒得幾靚，我都有試一舊嘅。佢有加 $5 試「凍檸茶」少甜，佢話都係茶餐廳風味嘅凍檸茶咁。而我就試 $98 「原隻爆汁燒鵝髀飯」轉「瀨粉」，都係好大碗，而燒鵝髀亦外脆內嫩又多汁，正。加 $5 飲「凍奶茶」，唔錯。我哋去嘅時間正値下午茶時段，每個套餐減 $8，埋單價 $147，抵呀。。。（地址：荔枝角青山道479-491號香港工業中心C座地庫C2號舖）#1amfoodie #foodie #hkfoodie #thatfoodiething #hkfood #food #instafood #yummy #foodlover