今次我地快快手揀咗釜之魂，因為小JM話想食鰻魚飯！
咁就緊係小主行先啦。
雖然兩大一小，但真心三個飯先我地食，
所以我地決定一人食一個！
當然，小JM嘅都係食一半,食唔晒就由爸爸包底。
媽媽之選：
汁燒牛肉釜
簡單點評：
我同爸爸都係嗜牛之人，當然見到亦唔會放過。
呢個飯性價比都幾高，不論賣相、味道及價錢，各方面都好ＯＫＡＹ！
牛肉來到仲係保持鮮嫩，唔會變晒Well-Done咁鞋咁乾。
肉質依然帶粉紅，咬落軟綿綿帶濃厚牛肉味，再加埋蔥花及芝麻就更加香口惹味。
飯有少許乾身加埋蛋絲香蔥食就好點，但就促成咗底部嘅飯焦，帶微脆口感。
小JM之選：
鰻魚金魂特
簡單點評：
小JM喜歡食鰻魚，而呢度嘅鰻魚飯亦有分幾款，可謂任君選擇。
我地揀咗金魂特。
個飯一上，小JM頓時嘩嘩聲。
鰻魚飯用料十足，鰻魚亦好肥美而且無腥味。
但小朋友食用時亦要小心幼骨，
可以用匙慢慢刮起鰻魚肉以伴飯來食。
呢度嘅鰻魚汁仲可以無限添加架，唔夠就可以叫店員再幫你加。
爸爸之選：
古味鹽麴牛舌盛釜
簡單點評：
相比另外兩個飯，牛舌整體屬一般，可能因為有點鹹及韌
但食落亦好香口，牛舌亦算爽，可能有啲根位所以先會韌啦。
我地另外加錢（HKD$18/@) 將其中兩個飯變成SET，
會包埋前菜、湯及飲品一杯
^湯要趁熱飲就會更加好味喔!
^三個人嘅晚餐都只係HKD$300左右，呢邊有埋Parking，所以都好抵喔!
