一班朋友聚舊，最緊要地方就腳、價錢親民，可以傾偈傾到飽。今次嚟到尖沙咀 「川味王」，就係貪佢夠晒地道，十幾蚊一串，點滿成枱都唔肉赤！
今次試咗幾款串燒，整體水準不錯。火箭魷魚筒 同 燒多春魚 係驚喜之作，魷魚鮮味彈牙，多春魚燒得香口，魚春卜卜脆。一口牛 同 雞軟骨 都燒得啱啱好，牛肉肉質軟嫩，雞軟骨同 雞腎 就爽脆有嚼勁，送酒一流。
蔬菜類同樣出色，燒韭菜 真係必點！燒到香噴噴，入口唔會太乾，保留到蔬菜汁液。燒秋葵 同 燒茄子 都唔錯，秋葵爽滑，茄子軟綿入味，加咗蒜蓉更加惹味。
主食方面，肥牛炒烏冬 味道濃郁，烏冬炒得夠鑊氣；鰻魚炒飯 都炒得乾身，鰻魚粒唔少，味道唔會太鹹，幾適合香港人口味。
總括嚟講，今次聚會好滿足，食物價錢平、種類多，環境唔算豪華但夠晒自在。如果下次再嚟，會想試埋其他海鮮同特色串燒！
📍 川味王
尖沙咀柯士甸路17號豐樂大廈地下2號舖
#川味王 #尖沙咀串燒 #抵食串燒 #朋友聚會 #香港美食
