蔦 (已結業)

星期四OT後放工，去銅鑼灣會合男朋友食下野，男朋友話喺登龍街果間米芝蓮拉蓮店度等，我先知道原來呢間拉麵店係如此大有來頭！去到餐廳已經差不多晚上九點，等左一陣就有位喇。入到餐廳，店員俾左個餐牌我地揀野食，同男朋友一人點左一碗醬油味玉拉麵。點餐時，店員有特別提點需唔需要追加拉麵，因為不能後加的。不過我地心諗咁夜都唔使食咁多野啦，就冇加麵，俾完錢就坐低喇。醬油味玉拉麵 $113 其實一入到餐廳已經聞到好香好香既松露味，當師傅將拉麵捧到我面前嘅時候，聞到果陣松露香真係好正！先飲一啖湯，原來湯底味道好清，同平時食開嘅好唔同，淡味好多。麵條軟硬度中規中矩，叉燒偏瘦，肥膏不多，但不會太硬。呢碗拉麵雖然好香松露味，但味道確係偏淡，本人其實都比較重口味，所以實在唔係我杯茶，或者口味比較清淡嘅朋友會比較適合。見男朋友一直低頭食拉麵，差不多食完嘅時候問佢：「好味嗎？」男朋友話：「我唔夠飽！」哈哈，呢碗拉麵嘅份量確實係偏少，相信男士可能會唔夠食，女士或者就岩岩好。