鳴虎 (北角匯二期) (已結業)

放假去一田逛下，順便在場內食晏。見到有間新開嘅日式食肆，走近一看，原來係土瓜灣「鳴虎」嘅新分店，反正已很久沒吃拉麵，一於試下。店員聽到我哋話想食拉麵，主動告知話店舖只係開左一個月，暫時未有拉麵供應，提議我哋試下佢哋嘅丼飯同小食。睇左貼喺櫥窗上嘅餐牌，原來丼飯嘅選擇好豐富，足足有成 8 款，另外仲有多款小食，例如炸雞、炸餃子、天婦羅等提供。點左咖喱吉列豬扒定食 ($72) 同 燒鯖魚定食 ($72)，另外再加左客水耕種沙律菜 ($52)。每個定食都配有沙律同飲品，分量十足。先嚐吉列豬扒飯，豬扒好大塊，送上時已代為切件，外皮炸至金黃香脆，調味亦剛好，肉質爽彈有咬口！咖喱辣勁十足，幸好味濃又不失甜味，而且汁夠多，用嚟拌飯一流！至於燒鯖魚飯就裝載喺一個橢圓形嘅餐盒內，鯖魚嘅份量都幾多，有成 5、6 件，而且燒得好有水準，魚皮香脆，魚肉滑溜不腥，入口帶魚油甘香。米飯質素亦不俗，成品選用了日本米，粒粒都圓渾飽滿，食落煙韌又不失飯香。無諗過拉麵店都竟然有水耕菜沙律提供，大大碟，菜味好鮮甜，而且爽度十足，加上水耕菜無農藥污染，令人食得更放心。希望下次嚟可以食到拉麵。