阿爺八鮮鍋 (已結業)

同朋友出黎聚會，唔想啖啖肉打邊爐，最好就係食海鮮 ; 但又唔想下下食蒸海鮮咁貴，咁粥底海鮮鍋就一定岩晒，唔會食唔飽嘛！但講到海鮮，自覺一定要食活嘅，否則罷了。最近朋友提意到旺角登打士廣場三樓 - 「阿爺粥饍八鮮鍋」，心諗都係同市面差無幾吧，普通聚餐囉~ 點知，我對呢餐嘅評價好高，超滿意人人都識食但唔係人人都識煮，尤其係海鮮，怕佢唔熟又怕佢太熟，咁..餐廳有店員幫你、指導你、提點你，就食得安心又有質素啦。後天功夫之餘都要睇先天因素，一盤海鮮併盤氣勢澎湃，放冰上嘅蝦蟹都仲郁緊..呀！我地呢個係$198套餐，8款鮮之外仲有30款火鍋之中揀5款(再乘人頭份量)，最後加入粥膽就完成。今次嘅八鮮鍋同外界最大分別係店員會先放鮮雞件炒香，再加蟹、蝦再炒，另其香味爆出，再加酒做火焰效果，最後加入南瓜粥水作粥底。隨後鮑魚、帶子、貴妃蚌、沙白蜆、蒲台蜆逐一下鍋。食完頭輪海鮮，粥底已經好甜且偏咸。五款火鍋配料，我地叫左即炸紫菜響鈴、娃娃菜、肥牛、韮菜餃、手工牛丸，全部都好新鮮!!最後，用海鮮嘅鮮味加上肉類嘅鮮甜造就出一鍋讓人大滿足嘅靚粥。最最後驚喜仲有西瓜甜品送，清清地，不錯。