更多
2020-11-05
2723 浏览
近来新兴咗一个字词「Staycation 」,本来趁老婆生日,都有此打算,不过,佢话晌屋企瞓自在过晌酒店,所以,酒店就无住喇,但都照原先计划,嚟一个大西北小旅行。先到荃湾西站嘅「海之恋商场」食个晏,再入兆康,转轻铁到良景,晌「良景市集」(即喺良景嘅冷气街市)打个转,再上「港版大峡谷」嘅良田坳,最后,返到南昌站嘅「V Walk」食晚饭,就结束今日西铁线大西北之行。言归正传,今次餐晏仔晌边度食好?「海之恋商场」都喺第一次嚟,故此事前上网揾揾有咩选择,最后拣咗「ASAP」,因为定价相宜,风评不俗。晌门口所见,餐厅内都仲有少量吉位,加上只喺得我哋两公婆,比较易等到位。刚好,我哋就被安排坐晌近门口嘅二人枱,距其他枱都好有一段距离,所以,食得更安心,但其他位显然就比较逼。而餐厅其实都几大,装修简约,望入去,仲有大大片落地玻璃嘅窗口位,望到对岸青衣壮阔嘅风景,加上是日阳光普照,感觉更醒神。主餐牌主要有红黄蓝共3张,不过,唔喺好明显有分门别类,但菜式睇起嚟比较多元化,无话边种菜系突出啲,然而,定价果然算喺好相宜。 此外,所有主食都会配基本热饮、汽水或果汁,亦可以额外加钱转为特色饮品,仲有,更可以加配热
最后我哋拣咗两款类似All Day Breakfast嘅套餐,而拣呢款嘅原因喺一来老婆钟意食牛油果同宾尼迪蛋,二来我就想试试件法式酸种面包。老实讲,比预期好㖞,流心蛋做得好出色,睇我切开个蛋黄,啲蛋浆涌出嚟就知啦,仲加咁片芝士,如有埋荷兰汁就成为正式宾尼迪蛋喇;此外,件酸种面包咬落有韧劲,唔会一阵风咁,又有麦香;豚肉芝士肠、烟肉都喺啲靓货色,食得出唔喺啲平价嘢,就连啲车厘茄都煎过,有诚意呀! D2 七味芝士鸡肉烤墨西哥馅饼 + 吉列西班牙豚肉 + 烟三文鱼 + 牛乳炒滑蛋 + 烤蕃茄 + 沙律 $78
睇睇个菜式名之下嘅食材组合,已觉得颇有睇头,加上老婆好想试啲烤墨西哥馅饼,所以,更铁定要拣佢。比「D1」,呢份仲大堆头。烤墨西哥馅饼果然好好食,外层好脆口,而啲七味芝士鸡肉超惹味;吉列西班牙豚肉你当喺炸猪扒咁食,味道唔错,又唔算油腻,牛乳炒蛋睇见都知道佢滑,甚有奶香,就算烤蕃茄都交足货,当然,烟三文鱼算喺咁多样嘢中,最无乜特别嘅一样。
$78
38 浏览
0 赞好
0 留言
今餐两个主菜都油油哋,所以,老婆就拣清清哋嘅洋甘菊,喺斯里兰卡品牌Dilmah嘅茶包,虽然对茶叶嘅世界唔算熟,但总知道有呢个品牌,而洋甘菊嘅香气幽幽,清香淡雅。饮完杯茶,留意吓内杯身:「Have a simple day」,非常有趣。 牛奶咖啡 +$8
由于我哋一早已打算点一客甜品嚟「些牙」,所以,加钱要杯牛奶咖啡嚟衬一衬,不过,睇样就知喺机冲,似乎俾多咗期望。还好嘅喺,杯咖啡都唔差,够醇香,有阵阵果仁味,就算机冲,如果豆靓都OK嘅, 虽然时近入秋,但有个 甜品餐牌都仲喺以夏令为题,不过,理得佢咩季节,啱食就得。顺带讲讲佢哋嘅服务,其实我哋一早向A店员落单已嗌定个酥皮苹果卷,并讲明主食差唔完嘅时候后上,但见似乎无人跟进,等咗一阵问B店员,先话帮手跟进下,此时先同我哋讲制作需时,要等20min,幸而我哋唔赶,照等。之后,由C店员送上焗苹果卷,佢真喺劲,放低碟甜品就行开咗,喂!我哋两个人共享,你唔俾多只碟,至少都要两份餐具啩,可见啲服务质素几低吓。 酥皮苹果卷配雪糕 $38
等咗真喺大概20min,卒之到咗,卖相较平实,入口无预期中即焗出炉𠮶种热辣辣,但酥皮卷喺几香脆,颇有牛油香,而苹果肉加咗玉桂,阵阵清甜香味,整体味道方面唔失礼,而雪糕喺好普通嘅云呢嗱味而已。 不时都晌啲食评借个版位分享吓啲行山相,今次都唔例外,就分享一下「港版大峡谷」良田坳嘅风景啦。 做人嘅嘢,越简单越好,就喺因为有啲人成日将问题简单复杂化,搞到一件好小嘅事,搞吓搞吓变成大事件。所以,好钟意呢间店铺嘅名「as simple as possible」,唯一最怕喺有啲人叫做嘢,惯性喺唔喺都话急,咩都「as soon as possible」,对依啲人要自我调节,你要快,我咪唯有交啲功课喺「as short as possible」啰,哈哈!
张贴