影片
更多
2017-09-08
42 浏览
筆者雖然並唔算係個抹茶迷，但有時見到好姊妹喺公開平台分享抹茶甜品嘅相片，都會心思思想去品嘗吓。上星期在住處附近閒逛，發現創立於 1753 年，在日本京都宇治擁有 264 年歷史的抹茶老字號「京林屋 Kyo Hayashiya」，原來喺太古城中心屋苑樓下開設咗第二分店，嘩！咁就腳，梗係要同屋企人嚟試吓喇！選了星期四晚到訪，沒想到雖然係平日晚上，店子都竟然坐滿食客，惟有先去 APITA 地庫超市入貨。回程時，見客人已經走得七七八八，馬上入座。細看四周，一如銅鑼灣店，設計以柔和的淺木色為主調，配上一室和式裝潢及開揚嘅落地大玻璃，令整個用餐區添上清幽雅致的氣氛。翻開餐牌，甜食嘅選項和銅鑼灣店分別不大，同樣分為甜點、雪糕、雪山、芭菲和蛋糕等，不過鹹食選擇就比之前更加豐富，除了麵食外，還新推出咗三款焙茶料理，包括京式鰻魚飯、林屋和食料理及金目鯛定食。反正三款都未試過，就一於每樣點一客，先填飽肚子，再掃甜品。率先送上的京式鰻魚飯 ($98/單品、$118/配自選茶) 同平日食開嘅蒲燒鰻魚飯有點不同，鰻魚先烤香切粒，並加入以鰹魚和昆布熬製的芡汁及蛋絲等作配料。另外托盤上亦附有麵豉湯、醃漬蘿蔔、醬油及
選了星期四晚到訪，沒想到雖然係平日晚上，店子都竟然坐滿食客，惟有先去 APITA 地庫超市入貨。回程時，見客人已經走得七七八八，馬上入座。細看四周，一如銅鑼灣店，設計以柔和的淺木色為主調，配上一室和式裝潢及開揚嘅落地大玻璃，令整個用餐區添上清幽雅致的氣氛。
翻開餐牌，甜食嘅選項和銅鑼灣店分別不大，同樣分為甜點、雪糕、雪山、芭菲和蛋糕等，不過鹹食選擇就比之前更加豐富，除了麵食外，還新推出咗三款焙茶料理，包括京式鰻魚飯、林屋和食料理及金目鯛定食。反正三款都未試過，就一於每樣點一客，先填飽肚子，再掃甜品。
率先送上的京式鰻魚飯 ($98/單品、$118/配自選茶) 同平日食開嘅蒲燒鰻魚飯有點不同，鰻魚先烤香切粒，並加入以鰹魚和昆布熬製的芡汁及蛋絲等作配料。另外托盤上亦附有麵豉湯、醃漬蘿蔔、醬油及芥末。店員建議食用時可將鰻魚飯分成兩份，先嘗原味，再按個人喜好將餘下份量加入少許醬油及 Wasabi 同吃，說能提升味道和層次。烤過後的鰻魚，汁多肉鮮，而且皮下脂肪好豐厚，配滲出陣陣茶香的焙茶飯一齊食，味道甘濃。
這一款金目鯛定食 ($88/單品、$108/配自選茶)，水準亦不俗，據說金目鯛係以糖、清酒、醬油及味醂等調味料煮過。挾起一試，魚肉質地好嫩滑，油脂豐厚，入口甜鹹適中，而伴吃的焙茶飯，無論茶味及飯味嗒落都咁甘香濃郁，加上焙茶本身具清新去膩功效，與油份重的金目鯛簡直是 Perfect Match。
至於這客以時令菜式入饌嘅定食，就叫做林屋和食料理 ($88/單品、$108/配自選茶)，而碟上四款賣相精緻小巧嘅餸菜，就包括有木耳絲配野菜豆腐漢堡、原粒帆立貝配惹味乾魚仔及芝士腐皮卷、照燒汁鯖魚、海鮮沙律。幾款當中，筆者就比較喜歡照燒汁鯖魚，魚肉食落不但口感綿滑，而且魚味鮮濃，配爽脆酸香的醃蘿蔔和軟糯的焙茶飯吃，「和味」無窮！
其中兩客料理配咗自選茶，點了玫瑰蘋果煎茶和桃味焙茶兩款，上桌時店員會連同說明書一起放下，上面有詳細列出品茶的程序、方法和竅門。茶葉沒添加任何甜味劑，而享用前客人可按指示，自行在小茶壺注入熱水沖泡，再用小漏斗計時半分鐘。細意品味，前者入口帶少少甘甜、有玫瑰花香的餘韻，頗啱女士飲用；而後者嘅桃香味亦非常之突出，簡直是撲鼻而來，入口既溫醇又順喉。
也嘗了一口兒子點嘅焙茶牛奶忌廉 ($48)，焙茶入口帶煙燻味，伴以北海道牛奶忌廉，兩者混在一起，茶香與奶香融合，而且飲落毫不甜膩，味道極佳。
食完鹹當然就輪到吃甜，先來一客焙茶芝士蛋糕 ($88)，成品選用了京林屋自家茶園所產的焙茶粉和日本忌廉芝士炮製；入口焙茶味非常明顯，散發著濃郁茶香，反而芝士味不太重，質感亦較一般日式芝士蛋糕實淨，不過比起美式芝士蛋糕仍算輕盈濕潤，伴以焙茶雪糕、清甜的紅豆和煙韌彈牙白玉丸子吃，令人回味！
至於這款法式聖馬克抹茶蛋糕 ($88)，頂層是焦糖脆面，接著是抹茶海綿蛋糕、椰子慕絲及抹茶慕絲，幾款食材層層相間，看起來非常足料，層次豐富。叉起一角，入口滲出微微嘅抹茶甘澀，質感輕盈，配上伴碟的幼滑抹茶雪糕、煙韌軟糯的白玉丸子和大粒粉甜的紅豆，無論味道和賣相，都一樣咁討人歡心。
壓軸呢款係集軟滑、茶香、果味於一身嘅香港限定芭菲 ($98)，成品以一隻高身杯盛載，細心一數，材料有成九層，有抹茶軟雪糕、蕨餅、抹茶啫喱、白玉丸子、寒天、忌廉、士多啤梨，連紅豆都有原粒及紅豆蓉兩款，用料極之慷慨，絕對適合心多多的香港人，連我這個非抹茶迷，見到都不禁心花怒放。抹茶雪糕很幼滑，味道清新，甘香得來又唔苦澀；蕨餅口感煙韌，食落有清香抹茶味；抹茶啫喱質感軟彈水嫩，與軟糯嘅白玉丸子和帶啖啖紅豆香嘅紅豆蓉十分夾配，吃罷大滿足。
店子設最低消費，每人至少要點一杯飲品或一客食品，不過講真，一場嚟到，叫一款又點會夠喉呢！
张贴
