九井水産 (已結業)

今日老婆大人話試吓新嘢，咁一行五人去咗呢間餐廳。一坐低睇到餐牌基本上就知道瀨瀨地野，因為成個餐牌上面啲嘢都食唔飽嘅。因為太肚餓，諗都唔諗就嗌咗個$998扮特價套餐，有生蠔帶子龍蝦長腳蟹，另外再加個苦瓜沙律，串燒拼盤同埋兩條壽司卷。點知一開始就上了串燒拼盤，之後沙律同埋壽司一齊嚟，出菜個次序錯晒。都算啦，點知見到嗰兩條壽司卷，仲幼過我隻手指公，可能我指工比較大啦，或者我見識少未見過咁苗條嘅壽司卷。食完晒啲散叫野之後，我諗都等左起碼有20分鐘都見唔到啲燒海鮮上枱，問問侍應幾時到，點知佢哋啲藉口仲多過Menu上面啲菜，再問經理依依喔喔一輪之後終於見到啲海鮮出現。啲海鮮一律都係喺你面前用炭爐燒1分鐘之後拎入廚房再煮，可能佢驚啲海鮮唔新鮮啦，全部都煮到110％熟。唔可以唔講嘅係個蟹蓋膏鞋過瀬石屎地，過帶子我以為食緊乾瑤柱，其他嘢就中規中矩。食完個海鮮拼盤之後完全好似冇食過野一樣，個份量真係好細，最後叫多個泡菜豬肉鍋，女士們有福了，嗰幾塊豬肉肯定薄過0.02mm，唔好話食完唔怕肥，食完可能仲會輕咗添。好耐冇試過喺香港食飯，中伏中得咁應。好有耐性同鍾意減肥嘅人，可以去試試。