1
是日本來係嚟食早餐、但嚟到過咗11：30am。好彩一心係想食全日早餐、All Day Breakfast 係All Day same price, 呢款午餐同早餐一模一樣咁就冇問題喇。
入店都九成滿好彩仲有一張枱、之後啲人食完早餐陸續離開就鬆動番少少。
一入嚟個感覺係重Bakery 概念 (尤其餅乾）多過係一間咖啡店（雖然見過啲好特別嘅拉花相）
個廚房好似好大、可能仲大過店面？
2
【 All Day Breakfast 】
2
正常賣相、比較深刻印象嘅係啲菇類、菇好有菇味。第二係個酸種包、脆口「插插」聲、而且有啲葡萄乾、橙橘乾之類釀咗入去、誠意度加分、另外牛油果醬亦都好唔錯、好食健康之餘又可當搽麵包用。格硬話普通嘅可以話係啲菜、火腿腸可以再升級啲、但咁做可能亦會將貨就價、因為呢個餐係包飲品、杯美式咖啡都要廿幾卅蚊。所以依家呢個狀況實屬滿意。
【 Americano 】(set drink)
正如之前所講、第一印象係間著重曲奇餅、麵包之類嘅食店、我係估唔到杯咖啡係咁出色。
齋啡飲過無數次、出面好多美式做得好唔掂、所以平時只會叫Long Black、呢杯第一啖已經係覺得好嘢嚟。
厚身嘅crema、媲美Long Black、啡味香濃至極得嚟又未到苦。
除咗好嘅豆、有可能同佢哋用靚咖啡機有關、以美式咖啡呢個範疇、我覺得可以俾佢5✰
呢杯餐飲啡俾到我驚喜。
