知道有呢間鋪頭，係因為俾個店名吸引咗。
入到去，睇埋menu，個感覺就即刻覺得風格同西灣河一間咖啡店幾乎一樣，有好多好多款嘅咖啡，而且好平好平，係走最平民化嘅路線。
即使係最貴嘅藍山咖啡，價錢都係同老M差唔多。
真係平到令我懷疑係咪真係飲緊藍山咖啡？一杯100%牙買加藍山咖啡，我估可能會貴x3倍價錢。
唔知點解可以賣到咁平，仲好似用虹笈嚟沖。
但既然佢店名話明係藍山咖啡「專門店」，都要信佢喇。
就算只係仿藍山豆，杯啡確係比一般齋啡texture「實」少少，佢呢個價錢已值回票價，冇得再有多要求及投訴。
總之，用個腦諗住「藍山」嚟飲，呢杯就係藍山咖啡。
呢度好明顯就係賣人情味，街坊化嘅餐廳氣氛。
嘆杯藍山咖啡，叫碟港式西多士，成件事真係街坊價錢高質素思維享受。
