黑樺牛 (已結業)

店如其名，主打日本直送A5和牛「黑樺牛」，120分鐘任飲任食，八款和牛質素甚高，牛魔皇齋食牛肉超易回本。目前預先訂座每位奉送三隻日本生蠔及一隻海老，店員會協助燒及開蠔，無須自己動手。日本生蠔蠔肉非常肥美飽滿，帶淡海水味，蠔味適中，味道清甜。湯底選左每日限量嘅北海道豆乳玫瑰芝士鍋 (無須額外加錢)，芝士及豆乳味濃，質感奶滑鮮香，愈煮愈濃，愈煮愈香，味道與牛肉幾夾。頭盤必點嘅鬼馬油炸鬼，一開二嘅油炸鬼加墨魚滑及蟹籽，外脆內滑，非常香酥惹味。其他食物唔多講，因為主要都係食和牛，餐廳共有提供八款部位，有埋圖講解，但其實都要自己試下先知有咩分別。「玉子後腰肉」肉質細嫩，拌蛋漿後更滑，肉味突出，口感幾濃郁。特上牛小排脂肪含量相當高，油香突出，肉質幼嫩，卻不乏牛味，各方面都十分平衡，係其中一款不停追加嘅牛肉。肩胛梅花肉質更加柔軟嫩滑，油香豐富，牛味鮮濃，個人認為稍勝牛小排。其餘牛肉質素都唔錯，例如肉味濃而嫩滑嘅牛頸脊就應該人人皆知；但其中一款「和尚頭」肉味雖較濃郁，但肉質太韌，好唔好就見人見智。齋食和牛有啲膩，飲下無糖茶解膩一流。