鮮‧港式串燒吧 (已搬遷) 新店位置

是日同舊同事係觀塘食完個lunch，佢趕住返工，我便自己一個人係工廈入面行下，順便買下化妝品。 估唔到工廈而家係有咁多樓上鋪進駐，衫、褲、鞋、襪、化妝品、中藥材、酒，講得出嘅都有，感覺好似行緊商場咁。 行到攰攰地，一個人走入左間串燒店，諗住食一、兩串醫下肚。雖主打係串燒，但入面仲有生蠔、刺身供應，正中我意。 一個人食唔多，所以點左個特選海鮮盤$268及幾串串燒。拼盤好快到，成個set感覺好大陣仗，但當然一個人食就剛好。 有4隻生蠔，2隻南非勞力士生蠔，2隻法國黃金生蠔，雖唔算大隻，但肉質爽甜、鮮味。 大蟶子去左肉，切好一粒粒，幾甜幾彈牙。海螺偏細，但份量幾多，螺肉都有咬口，蝦就一般的正常水準，但整體都滿意。 串燒即點即燒，十分好食，菠蘿好多汁，秋葵亦燒得好惹味；牛舌亦都係水準之作，不得不讚個白鱔，肥大肉厚，肉質好彈牙，啲鱔脂完全唔油膩，反而似啫喱的質感，絕對推介！！ 餐廳有其他飲品選擇，但我點了水果茶消濟。 閒日下午一個悠悠閒咁嘆下生蠔，食下串燒，著實好寫意，工廈呢種小店，就係有呢種隨心的魅力。