问题不出在味道

开胃快递等级3 2011-06-19

103 浏览

FRIDAY NIGHT三姊妹约埋，两个临时改咗SCHEDULE（其中一个系我：P）当机立断，唔约响九龙，改去中环。原本想去Y记，但都预咗冇位，ZZIP系后备﹣﹣因为九成有位。一如所料，Y记一副”唔志在做你生意“格局，扭头即上THE LOOP。唔驶等就冇位，周五晚八点嚟讲唔满真系有啲难度。个人嚟过三次，绝对够资格讲句：问题并不出在食物。呢度啲蚝系得嘅，算系餐厅“米饭班主”，老板一贯地SELL得落力﹣﹣侍应亦一贯力不从心，欠缺圆滑。蚝款冇MENU写得咁足，但都有十款左右。是晚澳洲蚝相当出色，爽甜肥美，虽然冇大大件美国蚝助阵，不过IRISH同SCOTTISH两双中坚抢返好多分，法国蚝上映“黑珍珠”，踢走白珍珠，单呢组合嚟咗两ROUND。连蚝连海水一气呵成，开蚝技巧都OK，得两双食到啲啲蚝瞉。蚝嘅鲜美将姊妹们一星期工作嘅劳累怨气一洗而空：）开咗支白酒﹣﹣结果都系冇睇到个LABEL。WINE LIST ﹣WHITE WINE ﹣第二个OPTION。带少少花香，少少DRY，送蚝一流。基本上食蚝话要开白酒佢都系SELL 呢只。红酒煎鹅肝嚟咗两转，之前同其他朋友嚟食大家都REQUEST ENCORE呢一度菜，相信同佢大件肥美相当有关系，而助唔会煎得太干，人多过两个其实一件多数唔够喉。伴碟蓝莓味道配合得好好，酸甜味道稍减油腻，就带出肝脏的特有香味。CAPPACIO，份量相对细，生牛肉小小一块块圆片加上火箭菜为主O既沙律，但黑醋同橄榄油份量啱啱好，系开胃嘅餐前小菜。（见之前啲食评都有包，而理论上佢都应该提供面包，但系冇。）呢度LASANGNA我系有信心O既，食咗几次虽然第一次最好食（芝士香气扑鼻，同一般LASANGNA用嘅CHEESE明显唔同），之后好似都冇咩特别，但朋友口碑都十分正面。今日都冇令人失望，肉酱嘅份最充足，唔会太“漏”，濶面够薄，好滋味，不过我比较想试到表面烘脆𠮶个VERSION。后加O既MUSHROOM RISOTTO就好普通，虽然味MUSHROOM味浓，但意大利饭煮得略硬，呢个DISH上厨师功力未见突出。甜品：法式姜汁焦糖炖旦：姜汁好味，但份量少，而且热食似乎会好味啲。拿破仑：有啲古怪O既造型，似STRAWBERRY CUSTARD 塔，不过味道香甜，饼层酥脆，值得推介。心太软：之前经验话我知﹣﹣师傅系人，系人就会有失败嘅时候，心太软更加系失败命中率较高嘅一环，所以虽然佢加大咗SIZE，仲变咗讨喜嘅心心造型，我都提醒朋友：即刻“开嚟见我”。点知重做都系失败，似乎系“炉之过”，而夜已深，LAST ORDER早过，都唔想再为难师傅，照吃可也。侍应都即刻提出呢一客免费（其实已经埋咗单），后尾仲补个木糠CHEESE CAKE，算系咁，而失败咗嘅心太软 AS 一个 BROWNIE，其实仍然好好味，只要姊妹尽兴，餐厅都算尽咗力，是晚聚会亦告圆满结束。问题既唔出在味道，咁出响边？嚟过几次，EVEN落力SELL蚝又颇友善嘅老细，都未曾有一次令我有“宾至如归”之感。佢晚间环境以黑取胜（咁多次都系我点菜，点解？太黑，朋友都睇唔到MENU上啲字，直头要开电筒），角落有VIEW，食材合格，但服务方面总系徘徊于MK 同 CWB 楼上舖嘅水准同样式之间。佢哋好似永远拿掐唔准同顾客之间嘅距离，叫佢落单，佢遥遥掉低一句“转头过嚟”，明明倾紧计，又多次突然杀入介绍蚝呢样𠮶样，黑住面叫你试酒，介绍菜式时过份热切殷勤，明明唔客满，一杯水仍然要催四次先有，漏咗包／冇包，呢头明明话我哋有一个人未到，俾住两只杯，𠮶头第二个拎三只埋嚟，是但问都唔问放低就走，第三位嚟到，又冇人帮佢斟酒问佢要唔要ORDER，俾蚝你，但唔记得俾SOURCE，俾咗SOURCE，冇叉... 老板事事亲力亲为，又分身乏术，身后永远一个“急”字，侍应诚意欠奉，训练未算有素之余，更睇唔出有任何热诚，身上多数只有一个“烦”字。明白生意难做，仲要响呢个地段生存有佢嘅难度，我都想佢个个客走嚟食十打八打蚝开三五七支酒俾佢赚到笑，但做生意，做饮食，仲要做呢种小规模餐厅，适度地亲切，适度空间，适度距离，知人察人，用心待客，方为善策。希望下次FRIDAY NIGHT LAST MIN 结果系“连ZZIP都冇位”。﹣﹣太黑太攰，冇影相﹣﹣ 大概同前人食评相若。继续阅读