影片
啲人成日话「蓝色总系畀人忧郁嘅感觉」，计我话要睇吓系咩蓝，Dark Blue阴沉，Light Blue轻佻，Aqua Blue独特，Tiffany Blue港女最爱... ...蓝色千变万化，惟独天蓝色最令人心动，试问有边个唔钟意晴空？但如果大家见到嘅系天蓝色嘅富士山，又会唔会更心动呢？适逢小妹嘅平日假期，一个人去观塘呢个文青聚集地影相，行到攰，就上「开饭喇」睇吓有冇Cafe可以坐吓饮杯嘢，咁啱见到呢间位于敬业街工厦嘅工作室兼Cafe，发现一个食评都冇，于是就胆粗粗上去一探究竟，冇人试过就最好，愈冇人试愈激起我好奇心！其实揾路都需要一啲时间，尤其系呢个工厦多过大厦嘅观塘，地下就系货车上落货嘅位，都唔知入唔入去好，终于挣扎入去搭Lift，又畀佢个门口吓窒，心谂「似住宅多过似Cafe㖞！」于是Send一个Whatsapp畀店主，佢一开门，我劈头就问佢系咪Cafe，佢点一点头，见到入面，先发现装潢「骨致」，舒一口气。店主将餐牌展示，惊见「富士山」，原来呢个系小店特色甜品Mr. Fuji ，富士山造型嘅白凉粉以日本嘅京豆水制成，质感似蒟蒻，味道清淡，但食落水润Q弹，配合糖浆同冲绳黄豆粉一齐食，香甜而不腻，再配埋个像真度咁高咁得意嘅造型，小妹喺食之前都忍唔住举机狂拍！如果你嗌Set（The Nature Set，$70），仲可以试埋另一款天蓝富士山系列，就系饮品Place You'll Go，面层系软滑嘅香草Cream，之后系盐味奶盖，再之后系牛奶，底层系蓝色糖浆同日本汽水，四层Layers层次分明，就好似积咗厚雪嘅冬日富士山，非常吸睛！小店内仲有好多书刊供客人阅读，其中仲有一本专门介绍富士山嘅旅游书，一路睇一路食住「富士山甜品」，感觉真系好奇妙！小妹未去过日本富士山附近嘅地方行，食完呢个甜品，真系好想一个人出走去一趟！
继续阅读