DPD大牌檔 (已結業)

真係好耐太出過街食飯。 每日唔係自己煮就外賣, 食到好悶。難得朋友生日, 人少少出黎興祝食下飯。今日約到食lunch, 朋友提意試下旺角新開這間DPD。 現在堂食lunch都唔會好多人, 但這間目測都9成滿。朋友點左冬蔭功米線, 我就點左海南雞飯, 仲有個炭燒豬頸肉share。份量意外地多, 可能真係好耐冇堂食過😅味道好唔錯, 雞好滑, 有埋雞髀雞翼, 唔錯wor. 油飯剛剛好不太油, 而且仲有d花生味，幾特別。而朋友既米線都唔錯, 夠彈牙, 冬蔭功湯少少辣，好野味。不過豬頸肉就麻麻, 等左半個鐘先黎，但落單時冇講要咁耐, 黎到個賣相ok, 但食落原來未熟透。 冇辦法唯有退左佢。生日飯當然要有蛋糕，餐廳既蛋糕幾靚，就點左: 伯爵茶蛋糕, 柚子檸檬, 雙層芝士。 3款都各有特色, 味道好好。 一點都不輸比cafe. 有機會黎食tea都得呀。今日大家都食得好開心😆

一入去，裝修同員工真係會令你眼前一亮港式早餐只係36$，真心覺得抵食不過佢地公仔麵一定係出前一丁，仲要加$4，有d被迫加$4 既感覺，當然你可以話食通粉/ 米粉咪得囉...但通常茶記轉唔轉一丁我話事...好啦，總括然而，港式早餐味道唔錯，食埋服務同環境係抵既但問題係，我地仲叫左個西式早餐佢個西式早餐 一款係$78 揀雞扒/豬扒 ； 一款係$98 all day breakfast 心諗呢間有中有西揀唔錯，上埋openrice 睇到前面個post有兩大塊雞扒，okay, $78都抵俾點知黎到，一睇，絕對失望！！！1）明明薯餅，黎到係薯角，問先話無薯餅，我就係因為薯餅而嗌。我已經覺得俾你呃左2）楓糖雞扒，楓糖去左邊？大家樂都做得好過你，你只俾左塊燒雞扒我！我亦因為楓糖而叫雞扒。 3）份量同我尋日食茶記既港式西式早餐無分別。人地收緊$40，你憑咩收$78（加埋一$86）足足港式早餐一倍？憑呢3點，我完全覺得受騙亦唔會再去食

Mocha n cappuccino 兩杯飮品口感甘涼、豆香、值得一試。黑松露薯條、估唔到黑松露好多呀！太好啦haha 因此，更加好味，原本想試cheese cake 可惜sold out,最後選了袖子cake 是職員介紹、她話唔太酸，幸好cake 質數幾好，仲有生果粒在內及不酸、cake 鬆及不太甜，讃下服務員好有禮貌。

旺角本身已食肆林立，想不到疫情下仍有新店進駐，位置坐落於朗豪坊隔鄰的砵蘭街。選了星期五早上先試早餐，餐廳坐位較一般茶記舒適及寬敞，但可惜早餐的選擇又與附近的茶記分別不大。因為並不太餓的關係，選了較輕量的蛋白鮮奶燕麥、北海道牛乳炒蛋多士配熱咖啡，HK$36加一，價錢貼地食物質素整體不俗燕麥夾雜不小新鮮蛋白，質地較我在其他地方吃的燕麥幼滑好吃最讚是多士有牛油香亦夠脆與嫩滑的炒旦是絕配，最後的熱咖啡是我愛的茶記味道，因我實在不喜歡現時巿面有些精品咖啡那種帶酸的味道

《鮑汁金貝福建炒飯》$60 連飲品一杯 呢個福建炒飯都算足料，所有餸都好味😋 個芡都唔錯，唔會太咸，濃度啱啱好，整體味道都幾好。飲品揀咗凍檸茶，茶味同檸檬都唔錯，冇澀味👍🏻💕地點好方便，就喺正朗豪坊對面，有堂食有外賣👍🏻

係朗豪坊返工，出出入入都好多人買依間野既Lunch box，所以特登去試試佢。以旺角鋪頭黎講，依個大牌檔真係超哂班。因為地方寬敞，d侍應又夠後生，環境乾淨企理，氣氛都好Chill。繁華鬧市的馬路，一門之隔竟然格外恬適。既然都係一個人食，食飯盒就不如揀堂食，起馬野食熱辣辣。我叫份乾炒牛河，論賣相有80分，最緊要係條條河粉炒得分明，上色均勻，份量還好！最好味係佢個辣醬，堅辣堅夠味。本身牛河就容易飽，辣醬咸低個油膩感。加返算咖啡，舒舒服務就坐左1個Lunch time。只可惜依家晚市無得堂食，否則我ot都肯落黎食。

近排喺fb見到佢有賣廣告，今日特登嚟到呢間新開嘅餐廳。下午三點幾去到，Tea Time人唔係特別多，但都有三四成枱喺坐咗人。一入門口就見到個裝修都幾靚，雖然出面玻璃位有景睇，但入面光線充足，好放鬆。咁我就嗌咗個金牌馬來咖喱配白飯海魚柳，食物都上得幾快。嚟到首先就撩咗啲咖喱汁試咗先，一入口其實比較淡但好快佢浸香料味就浮返上嚟。然後魚柳個魚肉係真係好嫩，然後個皮炸出嚟真係又薄又脆。但比較可惜嘅喺佢個魚柳魚味唔係好夠，咁當然好嘅地方係佢亦都無咩腥味同怪味。佢成個飯總括嚟講層次係真係幾豐富，好味又無乜負擔。如果你係expect係茶餐廳果種濃烈厚重嘅咖喱，我諗你係會失望。但如果你係嚟食精緻啲嘅咖喱嘅話，咁佢又真係做得唔錯。價錢真係精緻食物、精緻價錢；高檔餐廳嚟講，有靚裝修都算食得抵。啱晒帶女朋友嚟打卡、拍吓拖仔。

行開旺角，見到朗豪坊對面新開一間DPD大牌檔，所以入咗去試。門面用大嘅落地玻璃窗，入到去有好多綠色植物裝飾，座位好闊落，坐得好舒服。我地今次叫咗兩份早餐：DPD早餐：鮮蕃茄濃湯鮮牛肉通心粉 配埋 北海道牛乳炒蛋同牛油多士番茄湯底味道超濃郁，通粉軟硬適中，牛肉嫩滑，配埋一齊酸酸甜甜夠開胃又好食！跟餐配嘅北海道牛乳炒蛋同牛油多士，牛油多士香脆好食，必試！美式早餐：楓糖鮮嫩雞扒、香脆薯餅配埋北海道牛乳炒蛋同牛油多士早餐好大份，雞扒肉質嫩滑多汁，加上甜甜的楓糖汁，皮脆肉嫩。而滑蛋就加入北海道牛乳一同炒，令炒蛋濃稠滑溜，好好味！另外一題，佢地嘅服務質素好好，同埋見佢地LUNCH、DINNER同TAKEAWAY MENU都好吸引，門口仲有CAKESHOP有蝴蝶酥同蛋糕買，下次行過一定要再試！

好多人都知呢個位之前係翠華，翠華走咗之後估唔到响疫情期間，可以有一間幾靚仔嘅食肆開業，我覺得風險係大嘅，但係都留意到香港做飲食業越來越高要求，係因為香港人越嚟越識食，所以點解會有OpenRice嘅出現，又有咁多飲食節目嘅出現，節目還節目，餐廳還餐廳，要將電視裏面嘅食物實現出嚟比客食，而食完又要有好似果d節目主持咁嘅反應，就真係唔係容易，食神話齋，最好食又點，都要有收視有service有reasonable price先會被市民長期支持............

行經旺角翠華舊址開了間新餐廳，DPD 大排檔門面高檔裝修簡潔優雅，決定入去試試。甫進內即感受到店員禮貌同殷勤服務👍，店員好有禮貌帶我入座，再遞上餐牌細心介紹餐牌內容，並介紹今日餐湯是霸王花煲豬骨，我對中湯一般問西湯是什麼？今日西式餐湯係龍蝦忌廉湯店員抱歉話西湯一早沽清，我有點失望🙍🏻店員即補充日後會叫廚房預多少少，非常欣賞他的反應及態度，我就試下中湯喇！🍴午市套餐😋🥄霸王花煲豬骨 霸王花煲豬骨感覺有點家的味道，味道香甜有序火喉十足不是一般例湯，有種家的感覺。🍴醬燒鹿兒島豬軟骨配意大利麵 $78豬軟骨用紅腰豆、黑椒及洋蔥熬製，味香汁甜豬軟骨入口鬆化軟腍，紅腰豆更是我的至愛一粒也不留👍，醬汁加了木魚別有另一番風味。意粉個人口感比較硬故欠糯香，份量都較少。☕️ 咖啡口感香滑溫度恰好，可能我平日喜愛黑啡故個人感覺奶味比較重。我在品嘗咖啡時店長走來輕聲問食物可啱口味？一間新店開業此舉最為重要，我非常欣賞誠意。還有何解我用酒店級形容，隨了服務這家餐廳的餐具都什有質素。

一入到嚟嘅招呼方式係感受到同一般茶餐廳有分別，不過先生講得好啱新開張丫嘛，要睇下之後仲keep唔keep到先環境新啦舒服好坐但係同一般茶餐廳有分別嘅係坐低係無水嘅而一直都係無提供水隔離枱auntie有叫話想要杯水其實係會比你但唔會主動serve呢樣野可圈可點因為好多時茶餐廳提供嘅水都係用嚟洗餐具未必會飲但呢個格局又覺得好似應該要有水提供先生係焗豬扒飯fans即使唔係午餐都堅持試一間茶餐廳係應該要以焗豬為基準飯炒得好食無限車厘茄豬扒夠厚夠大已切芝士脆面好食我食咗午餐嘅焗葡汁雞飯本身一心嚟試乾炒牛河但覺得午餐有霸皇花老火湯好吸引所以轉咗同焗豬一樣好多汁，呢個係有太多汁嘅感覺但係超級香花生🥜味唔知點解紅洋蔥同有炸過嘅薯粒好好食雞扒一樣係厚又大已切芝士面都係好食以上兩個飯包括個湯都係好滿意但係美中不足係凍檸茶唔夠茶味作為「大排檔」又或者茶餐廳格局檸檬係香同好味但茶真係失望好想呼叫換咗個茶膽佢啦完全唔夠味希望有下次同下次嘅茶係會有進步