A.B.D.茶餐廳 (已結業)

豬扒出前一丁，多謝 HKD25 連凍齋啡，都幾貴喎，不過合理價錢啦。香煎豬扒喜出望外 ﹗醃得甜美入味，煎得乾爽軟棉又香口，水潤充滿肉汁，好好食喎。出前一丁用猛火煮，仍保留點嚥韌，口感都唔錯，滿意。湯底濃郁，仲搭左幾條鮮爽生菜添，湯都有點菜甜味，好似兒時阿媽煮既味道呢。突然好想食出前一丁，lunch 時間到處都滿座，難得經過見有位又見有出前一丁供應，即刻 9 秒 9 衝入黎座低。舖位略細加 open kitchen 夏天熱到爆，冷氣又唔夠勁，坐得唔多舒服。

好耐無黎幫襯，員工轉晒人、氣氛唔同左、老闆轉埋，連電視都唔開，但感覺乾淨左、環境又靜左。熱奶茶，不過不失啦，有點鞋，唔滑囉。芝士肉醬意粉，只可以叫做芝士粉茄汁肉鬆意粉，真係做得非常之差劣啊 ﹗肉碎一舊舊，似肉塊、肉丸、肉粒意粉。口感又鞋烚烚，汁還汁、肉還肉，叫咩肉醬呀 ﹗跟住係啲汁上面洒啲芝士粉就話係芝士意粉？好可怕喎。味道都有啲相似，但偏重蕃茄膏味道。意粉發脹廿十成熟，腍劈劈又黐笠笠，救命。

最討厭啲客 lunch 時間走上黎搞搞陣，搞到我連 lunch 都無得食，無得離開公司輕鬆吓 ~ 今日又要陪客留係公司食飯盒，頂 ﹗咖喱什扒飯炒底，又係什扒配咖喱，最穩陣呀，次次什扒既配搭都唔同，幾得意、又驚喜 ﹗上次搭條菜芯比我添呀，幾鬼高興呀。今次一條腸仔略炸，有點咸。半塊豬扒先煎後炸，都幾咸。半塊雞扒先煎後炸有點乾，味道正常。一隻全熟蛋，廿十成熟，老過既婆，鞋過阿伯。半塊火腿，無作任何加工，掉落飯盒搞掂，勁 ﹗炒底？近乎見唔到黃色同蛋絲既炒飯，精髓所在。

突然好想食咖喱牛腩飯炒底，咁一放 lunch 就衝黎依度，點知原多依度係無牛腩架，好失望又失落，咁是但叫個什扒飯炒底啦，點知佢地落甩左，無炒底呀 ﹗喊都無為，唉。咖喱什扒飯，每次什扒配搭都唔同，幾搞笑，今次係腸仔、荷包蛋、半件雞扒、半件牛扒，今次仲加左條菜芯添。一早煎定既雞扒、牛扒，掉落炸爐返熱，好油好乾。腸仔同煎蛋大路野無問題啦，但一向我都係食太陽蛋架呢。加條菜芯咁有心，多謝師父，好凍吓喎，唔知幾耐之前烚定，都新鮮爽口既，只係少少渣啫。

以茶餐廳質數黎講，算唔錯架喇，茶餐廳味道 ~ 炒粉麵夠鑊氣，味道夠濃、份量足，選擇多 ~ 推介咖喱汁、黑椒汁，各類炒飯。如果飯市唔叫 set lunch、簡單快餐、雞牛豬的話，真係等廿分鐘都未必有得食呀 ~ 舖仔細細、枱櫈都好窄，坐得唔舒服，但有電視睇囉 ~黑椒什扒飯炒底，有太陽蛋、雞中翼一隻、半件雞扒、煙肉、豬扒。我記得之前好似有腸仔架喎，不過叫什扒係咁架喇。黑柒柒既黑椒汁微辣、濃味，撈炒飯勁香口。炒飯口感可以啦，再乾啲更好，飯市繁忙時間，求其左啲。蛋少，有啲孤寒喎，蛋香不足。雞扒、雞翼、豬扒石接受啦，係煙肉乾左啲囉，啱鬼佬食。