18樓雞煲火鍋專門店

营业中

休息中

限聚令關係幾個月冇出過街食飯，呀囝突然話想食雞煲，上網搜尋一下就出咗18樓雞煲，近近哋又方便就去咗旺角分店試試！食雞煲同時又可以打邊爐，正！平時平日都滿坐，好彩有訂定位，地方都好闊落。個雞煲好足料，味帶少少麻辣，醬汁好濃，啱晒我哋呢啲重口味嘅。食完個雞煲就開始打邊爐，必叫嘅一定係墨魚滑、海鮮同花膠，啲蜆大大隻好甜。唔怪得知佢寫住唔駛點豉油啦，個雞煲湯底會越嚟越濃，真係已經夠晒味最後甜品有乳酪同軟雪糕，我哋飽住個肚都一人食咗兩杯埋單每位都唔洗$200，性價比好高嘅雞煲放題，一定會再嚟！

今日涼涼哋幾個豬朋狗友約埋打邊爐。豬朋友話之前係荃灣食過好味，今次就帶咗我哋嚟旺角分店試吓！18樓雞煲名副其實真係係創興18樓架，好易記。等緊位嘅時候已經聞到陣陣好香好濃烈嘅雞煲味，口水都流埋。仲諗緊食套餐A定套餐B嘅時候話咁快就有位喇！地方都好寬躺，坐位都好闊落，裝修有少少70、80年代街頭feel。最後幾個窮L一次通過套餐A，夠晒經濟，食完個雞煲仲可以打埋邊爐雞煲分咗微辣及大中小辣，我哋就脆脆地叫咗個大辣挑戰吓，就算咁多辣椒都嚇我哋唔到嘅！雞煲真係要夠辣先惹味，仲帶少少麻味，個醬調得好出色👍🏻，雞件份量好足，又啖啖肉，幾個大男人都夠食。自家製響鈴、墨魚滑、肥牛片、豬肉片，時令海鮮小弟最滿意，真材實料，必食！最值得一讚嘅係上菜速度，手機按完傳送訂單，2分鐘唔駛就到👍🏻👍🏻👍🏻！自家製台式手搖好有誠意，飲返杯，即時冇咁熱氣

同一個好耐無見既朋友約左收工打邊爐，今次就揀左呢間位於創興既18樓雞煲～精選美國雪花肥牛價錢每位$178加一，任食120分鐘。有醬料區，有需要既客人可以自己去拎～菜類同飲品都係放係雪櫃入面自取，種類都幾多。特別係飲品，有好多款冷泡茶，自家製冬瓜茶，涼茶，同埋常見既汽水。入座後會先上雞煲，可自選辣度，今次因為朋友唔食辣，所以我地揀左唔辣。跟住都造就左我第一次覺得原來雞煲可以咁清淡😂雞肉算滑，份量適中，唔會太多太少。醬汁味道唔錯，朋友都幾鐘意。食到咁上下可以自己去拎湯，加落去變火鍋。配料方面都係大路既肥牛，豬肉，羊肉，雞件，丸類等等。我特別鐘意羊肉～而肥牛都唔錯。加完湯之後我覺得有少少太清淡，所以都係出去拎左醬料點菜食。而朋友就覺得味道剛剛好，口味呢啲野因人而異呀～

已經係第二次食18樓了😍佢有另一間分店喺荃灣個陣時已經覺得好好食 今次食都一樣咁滿意😍呢間個環境特別啲 有種香港既風味😌雞煲可以揀4種辣度 今次嗌咗小辣 味道啱啱好 如果驚辣可以揀微辣 個人覺得有啲啲辣味先夠惹味雞肉一如既往好嫩滑 同埋好入味 每啖都有醬汁 食到停唔到口食完雞煲緊係要用佢個湯底打邊爐啦呢度好既地方係可以掃QR code order野食 而家疫情期間要出去拎野食好麻煩 要帶返口罩 咁樣落單大大減少麻煩😍同埋店員送野食都好快！兩款肥牛都好好食！肥瘦適中 而且好重牛味另外要特別講既係菠菜豬肉餃子 好夠料同埋好特別 要試！芝士豆腐都係必叫的想食菜都可以出去拎 有好多款 生菜 娃娃菜 西洋菜都齊！同埋野飲有自家製！個人推薦東瓜茶 唔會好甜！啱啱好雪糕是必須的！今日有乳酪味雪糕同埋雲呢拿😙個人較推乳酪 酸酸甜甜very good!!!中意食雞煲又中意打邊爐既你一定要試！而且每人都唔洗$200🥳

今晚約左朋友食飯呢排天氣涼返少少把握最後打邊爐既好機會即刻book左18樓雞煲之前食過荃灣嗰間今次試旺角 發現店面裝修同荃灣唔同有好多霓虹燈招牌 充滿本土特色而且店外等候位置亦都比荃灣既寬敞整體環境好舒服有3個set選擇我哋揀左套餐A $179/head牛包括美國雪花肥牛同特級肥牛兩款而雞煲既辣度揀左中辣（記得之前揀小辣 比朋友嫌棄唔夠辣）食得辣既朋友記得試中辣/大辣一坐低先出去攞飲品除左有罐裝同樽裝飲品仲有冬瓜茶同冷凍茶選擇都幾多返埋位雞煲就上枱了Staff幫忙拌勻 就可以即刻食了雞煲份量唔惹少顏色好吸引 食落去香辣 加上芫荽同洋蔥 味道好豐富 亦都有層次好彩冷氣夠大 先唔會辣到出汗之後就落單叫火鍋料用手機掃qr code就得叫左幾轉都冇漏單 唔錯！選擇都算幾多海鮮 丸類 餃類 肉類 蔬菜 炸野應有盡有當中雪花肥牛好正雪花分布平均食落去鮮嫩嫩滑響鈴都唔錯唔係外面一般嘅響鈴而且呢到除左有魚皮 仲特別有蝦片鐘意食炸野既朋友仔必叫最後甜品有乳酪但因為太飽就有食到2個鐘keep住食同吹水 非常滿足既一餐仲要價錢唔貴！

昔日學傳的Trainer Trainee 再碰面，已經昇華到互相砥礪的程度。雞煲（小辣）小辣就應該係我本人極限。我平時係譚仔都係清湯嘅Friend。但雞煲之辣就以麻為主，大概出自花椒八角——係辣得幾爽同幾正。雞嘅肉都幾足夠，比我想像中嘅份量多。比期望好少少。飲品方面：其實好似其他的放題咁，野飲選擇都有好多。但雞煲熱氣騰騰，所以就好想飲啲feel-like清熱嘅野食。佢有兩款特別啲嘅：1. 自家製冬瓜茶：味道調得幾好，但飲得出係會加咗少少糖。但襯上雞煲就啱嫁啦2. 冷泡綠茶🍵 味道清淡，淡，淡。綠茶味道唔太濃，但就係無糖嘅。
我覺得值得要食的1. 蟹籽蝦滑：與其食蛋類⋯我覺覺得食蝦滑好似抵食啲2. （稻庭？）烏冬：索哂個湯啲味道，好正。3. 炸響鈴：呢度嘅響鈴十足十新年食品咁，係mega size ～ 係一大塊皮捲成嘅。4. 蜂巢豆腐：索得湯汁嚟又有種清淡嘅味道健康食品：新鮮准山：唔係果種煲湯嘅「lum be be」准山，而係新鮮，浸完咬落爽口嘅。秋葵：好少地方見到有呢兩樣野，中醫話健脾嫁

好耐冇食過雞煲，今晚終於同朋友約好去食返夠本。之前有朋友介紹過創興開左lee間18樓雞煲好抵食。 最重要料新鮮又乾淨, 所以今晚就去試下。真係好耐冇係旺角食飯, 真係開左好多新舖。同朋友一放工早早就黎到, 坐底唔係好多人, 但坐底冇耐就坐滿場咁制。地方真係幾舒服, 乾淨。一坐底侍應就上左雞煲先。 我地叫左中辣, 黎到睇落唔錯, 仲好香。係煲緊既時候，侍應都教左我地用app落單。 好方便, 好多野簡。忍唔住更係食雞煲先。 中辣我地都覺得ok. 佢辣味剛剛好, 唔會好搶, 係麻味唔太夠，而且有d偏甜。 所以唔使怕會令人食得好辛苦。 所以反而感覺良好。 雞件好大件，好好肉, 唔會太肥。火鍋料好快就到。 食完雞煲，再加湯就即刻可以打邊爐啦。 雖然，佢既餸好似好細碟，但食下食下, 唔覺又食得好多。 佢續少上仲可以控制客人唔會咁易浪費。佢既菜係好新鮮, 脆肉鯇都好彈牙, 煮耐左都唔會散晒冇得食。最正佢個炸魚皮好脆，就算煲稔晒都係脆。 出奇地好食。食雞煲當然要飲啤酒。 我地叫左3罐竟然都有冰桶比我地, 真係超好服務。

今次黎到18樓雞煲，位置於創興廣場，地理位置就岩曬大家喇，係正旺角呢個香港既中心點，唔洗好似以前咁要去到荃灣大雄輝18樓先食到，真係方便好多，約朋友黎呢到都夠曬正。雞煲就叫左小辣，真係岩岩好比d平時唔食辣既人，醬料夠曬足料，加埋d洋蔥真係幾惹味。18樓雞煲既配料都出名新鮮好味，尤其係佢個蝦，食落好鮮好彈牙，一d都唔會霉，仲有湯底既微辣口感，都真係幾惹味。魚類方面，有脆肉鯇，脆肉鯇骨，仲有本人最鐘意既白鱔片，呢隻魚肉真係幾岩打邊爐，魚脂味幾正，感覺好肥美，仲有少少辣，真係幾正。甜品方面，有乳酪雪糕，真係幾正，唔會太甜，加埋d脆脆，簡直好食過名牌子既雪糕呀！響鈴都特別推介一下，因為佢唔係用盒裝響鈴，佢鮮炸左既大份響鈴，食落好有口感，夠曬新鮮同脆。

🐔雞煲 （bb辣）（8/10）⁣不得不說佢勁多醬汁🌞個汁鹹鹹甜甜帶微微辣。個辣度真係啱啱好～唔會辣到食唔到又幾惹味🔥兩個人雞嘅份量唔算多～雞件冇話好滑好嫩～正正常常的⁣⁣配料：⁣款式好多！任食黎講都幾抵😗😗所以揀幾款推薦的🧡🧡🧡⁣⁣🐮雪花肥牛 特級肥牛 ⁣相對比較肥，厚薄適中，食落都幾重肉味。⁣⁣🧀芝士豆腐⁣打親邊爐見到有都會嗌！入面嘅芝士真係精髓黎🥺🥺⁣⁣響鈴🔔⁣想講超大舊！烚完好似手巾咁吸晒啲湯🤫🤫但想對油味有點重～～⁣⁣🥤冬瓜茶⁣幾好飲😛😛唔會好甜！味道啱啱好～⁣⁣🍫朱古力雪糕⁣朱古力味幾濃郁🤎🤎🤎好味過牛奶味🖖🏻⁣⁣整體食物唔差同幾抵🔥最緊要係地方幾大幾新同仲好乾淨🖤⁣

呢間18樓第二次去，環境寬敞舒適。雞煲同樣有辣味程度選擇。小辣去到打邊爐階段會愈食愈辣，唔食得辣嘅朋友要留意返。 雞煲雞肉都算嫩滑。醬汁味道好濃，除左辣味仲帶點甜，如果唔鐘意咁濃味可以加少少湯底溝淡。份量多，我同男友兩個去都食剩好多雞。套餐我地揀咗第二貴果個，多左幾款食物選擇。不過個人覺得食最平果個已經好足夠。呢到落單用qr code，完全冇漏單情況。我覺得三款肥牛， 雪花肥牛最好食。另外兩款就一款多肥肉，一款騷味重。海鮮蜆，蝦，鱔都幾新鮮。不過扇貝就差咗啲，去過兩次都一樣咁多沙。響鈴大大舊，好脆好食。豬紅正常。飲品自取，除左一般罐裝紙包飲品，仲有健康茶飲。個冬瓜茶係我致愛。又解渴，又唔會太甜。呢個奶凍最平個餐冇嘅。味道好好食，奶味濃，又夠滑。甜品仲有雪糕。

一向鍾意食放題，就係鐘意18樓雞煲，可以先食雞煲，之後再打邊爐！呢度全部以卡位為主，對方頗為寬敞，而且氣流都算唔錯，依家出去食野最緊要安心！蔬菜、飲品、調味及雪糕都係自助，食品就用 QR code 落單，都幾方便，而且上菜快。先來了一個小辣雞煲，小辣容易入口，而且非常惹味，雞件大大件，剛剛好唔會太靱。火鍋配料種類分得好清楚，有肉類、海鮮、丸類……呢度嘅海蝦非常新鮮，好彈牙爽口，來回嗌左幾轉已經值回票價。

見依幾日涼返少少，就忍唔住約朋友出嚟食雞煲😬見到創興開咗間18樓雞煲，上網睇啲食評都幾好，好奇心之下梗係想過嚟試吓啦。試左個套餐A，個價錢都幾吸引，$178加一可能我哋都比較早嚟到啦，初初入去嘅時候都係見到得三四張枱有人，成個環境都好寬敞同闊落，裝修都好靚好有特色。嘢飲方面，分咗三個雪櫃，主要都係罐裝飲品，另外仲有冬瓜茶同蜂蜜綠茶，啤酒雖然吾包，就算自費 但啤酒嚟講 比起其他餐廳平。調味料方面款唔算太多，淨係好簡單嘅辣椒炸蒜蒜頭同蔥，比較特色啲嘅醬料就冇乜。另外有個雪糕吧，嗰日就係乳酪味同雲呢拿味嘅雪糕，仲有簡單嘅配料。 兜咗個圈之後終於坐低試吓個雞煲啦，由於有位朋友唔食辣，我哋叫咗個唔辣嘅雞煲，個心都好驚會好淡冇乜味道，點知嚟到嘅時候真係有驚喜，啲雞幾滑，又夠味，雞煲來講我覺得都有80分以上，佢嘅火鍋配料種類唔算太多，但係好明顯餐廳比嘅貨係啲平嘢，全部都係好有誠意。配料方面肥牛、午餐肉、手打丸、蝦、蜆、萵筍、脆鯇腩，全部都係誠意之作，質素方面都幾好喎，完全唔會覺得係任食嘅火鍋配料。總括嚟講，吾使$200一位，食到呢啲質素嘅雞煲加配料，真係冇原因去say no 。吾掛得之去到7點左右已

性價比算高嘅雞煲放題，好濃味，本人比較鐘意濃味，配菜種類好多，野食新鮮乾淨，兩人份量雞件唔係好夠喉，所以食完雞可以加上湯再打邊爐，就會好飽了，我地由荃灣食到旺角嘅雞煲，之前一直係因為收工近荃灣成日唔知食咩過陣會同男朋友揀食裡間雞煲，同男朋友一致認為好味嘅雞煲，之後好耐無食過行旺角果陣又見到有就諗住試下有咩唔同，多左個揀餐功能，但旺角裡間環境好有特色，坐位又寛落舒服d，味道都唔差，會再食，雞煲友值得一試

朋友約我食飯先知道原來旺角都有18樓雞煲！爭啲去咗荃灣嗰間🤣旺角呢一間重大仲光猛，坐得都幾舒服！價錢好似冇乜點加價，都係最抵食！佢哋個雞煲真係食過咁多間最好食嘅雞煲，麻香得黎又唔會太辣，雞肉又滑，醬汁好入味！最鍾意佢哋可以用電話落單，因為一定唔會漏單😂同埋來得好快！每樣嘅份量都係啱啱好，覺得好食就可以再嗌！同埋菜嘅選擇都好多，仲有一個皇帝菜！好少打邊爐嘅地方有得食皇帝菜架！最後仲可以食杯yogurt，仲可以加toppings，解膩消滯一流架！臨走見到原來七點前埋單仲抵食！下次可以考慮吓！

呢排都少左出去旺角食野，今次重臨始創，發現係荃灣既18樓雞煲，原來係始創都開左間18樓雞煲，即刻成為左創興最好味雞煲之一了。除左呢間任飲無啤酒外，食物質素，甜品，環境裝修乾淨程度黎講，都係完勝其他幾間打邊爐放題。先講講個雞煲喇，雞肉量都幾多，最緊要唔係比d頭頭尾尾去hea你，而係真係d雞脾肉，雞胸肉黎，叫左個小辣，因為本人就唔食得太辣既，食落都非常惹味，個汁非常之香。食完雞煲，就梗係到打邊爐料喇，個響鈴係自家制既，唔會好似出面咁比d盒裝既你，夠曬大件，而且仲好香脆，夠乾身唔會濕，所以都幾新鮮下。另外，白鱔片都非常之推介，外表好有光澤，而且食落又無乜泥味，仲好肥美，絕對係呢度靚既海鮮。甜品就有乳酪雪糕，酸酸地勁正！