青越亭 (瀝源廣場) (已結業)

第一次寫食評係獻俾呢間餐廳。見佢第一日營業，裝修餐單選擇都唔錯，就同朋友入去一試。揀咗個鮮茄和牛漢堡芝士焗飯，等4個字後，見所有朋友都食完咁滯，好奇一問侍應仲有幾耐。佢問完話你嗰個係焗飯嚟，即焗起碼4個字以上。Ok，合理既，我繼續等，前後等咗半個鐘，忽然斜對面有個男客人投訴話又耐仲要嚟錯，要走。心知不妙，想再問到底我個飯仲有幾耐。一分鐘唔到，即到。一睇，鮮茄？芝士焗飯？鮮茄無鮮茄；係咪和牛我唔知，但就連麥當勞塊漢堡排都大過佢；芝士焗飯喎，啲飯係香雪雪既白飯加咗啲係鮮茄既茄汁，焗個位得塊芝士，無睇錯係得塊芝士仔有「焗」過咋，焗定用火槍燒呀？仲要燶埋呀！茄汁燶芝士漢堡仔配白飯下話？我真係唔識嘢，等半個鐘，嚟碟咁嘅嘢，當時人唔多，如果漏單就直接講啦，等我半個鐘嚟碟咁嘅嘢，食咗都背脊骨落呀。點解佢開張咁耐而家先寫食評？因為佢新開張到連Openrice都未知有呢間餐廳呀，我仲試過幫佢開餐廳想做第一個寫食評既人，不過Openrice話我資料唔夠開唔到咋！總論：不可一，不可再PS. 圖中嗰兩舊好似蕃茄的食品，只係紅蘿蔔。

呢間鋪應該開左一段時間，我住喺隔離完全唔知，因為佢零宣傳，平時又好少行過瀝源，嚟試個兩次早餐，打開menu有廿幾款選擇，普通茶記早餐至西式沙律菜芝士焊麵包都有，仲有粥麵餐都係$34，有個粥+煎蛋+炒麵，價錢合理，味道合格有餘，餐廳地方寬敞，坐得舒服，之前逢星期六日就會去翠華食早餐，勁多人勁密集，而家會選擇嚟呢間，建議可以派傳單入附近屋企信箱，唔洗兩次嚟食早餐，都得小貓三四隻，非常冷清，希望佢唔好噤快執笠啦～