青悅·越泰料理

营业中

休息中

朋友來港旅行，去送機。上機前吃點食物，選擇這間。18:30左右到。去到餐廳門口沒有人主動招呼我們，見到食客不多只有兩三桌，我們自己找座位，也沒有送上清水，只見職員在閑談閑聊。掃碼點餐後送上食物，沒有說多謝等等的字眼。送餐員把食物放在桌子旁邊，感覺不太良好，食物很一般。價錢就係機場價格，呢個冇得說因為全世界都是這樣。期間也沒有人過來為我們加清水。這間餐廳給旅客和消費者帶來很差的體驗，有這樣的餐廳，難怪咁多香港人北上消費。

在機場找食店，看似氣氛還好，但一進內帶入去兩人位，都還沒夠1點午餐時候，且空枱一堆堆。我們想找張沒太陽哂的位置居然說沒法子。態度很差，沒禮物且像只有這家店有得食咁樣。連對不起位置緊張都不說。太差啦！

地方寬敞，食物味道正常，份量足。如果坐廉航無訂飛機餐，喺呢度食早餐啱晒。三文治用越式法包。個包本身好大個，切開三份，方便進食，配埋薯條，好飽。不過個包可以再脆啲~ 湯河正正常常，份量夠，可選擇另配腸粉或滑蛋加多士。今次揀咗滑蛋多士，滑蛋真係滑，好食，好似有兩隻蛋嘅量咁。坐得舒服，又夠食。搭早機不妨喺度食個舒服的早餐。

開工前趕快同老公在機埸客運大樓吃個午餐，最終決定到《青悅·越泰料理》，可能上左八樓的原故，無人排隊，地方又大，午餐時段還可直接入座。點了海鮮喇沙檬粉，海鮮都很豐富，湯底惹味，奇怪在明明平時食開應該是油麵，這裡麵底給予太多選擇了🙈另一個點了青咖喱豬頸肉飯，咖喱送飯一流，多多飯都食得曬，豬頸肉薄薄切片不膩口，香脆爽滑，真係好好吃😋機埸員工仲有85折添！😉

點了餸15分鐘，叫侍應跟一跟單，他說係咁耐㗎啦，我話嘢飲都可以先上吧，他說今日全場爆滿。如果機場嘅服務都係咁樣樣，香港個市真係要多謝呢班害群之馬。未食嘢，已經一套氣。

難得6位家人一起係機場，晚飯時間。經驗人士推薦了呢間泰國餐廳.因為已經過咗夜晚8點，餐廳也只營業到夜晚10點，客人已經唔多，我哋6人也拿拿聲落order（by barcode）1）軟殼蟹菠蘿海鮮炒飯 HKD112.- （8/10）味道與賣相一樣，不錯！可以推薦👍2）海鮮冬陰功湯 HKD98（2人份） （8/10）冬陰功湯係泰餐招牌食物，一般都唔會失敗，呢度也OK啦👌3）鮮蝦炒金邊粉 HKD92.- （9/10）物美價廉，性價比最高的一碟！推薦👍4）青咖喱豬頸肉 HKD116.- （8/10）5）炭燒厚切香茅豬扒 HKD88.-（8/10）與配料一起食，味道不錯👍，推薦👍6）馬拉盞炒通菜 HKD78.- （8/10）7）泰式魚餅 HKD92./（5件） （8/10）8）香芒芋茸黑白糯米 HKD68.- （9/10）好味！尤其係黑白脆軟的雙色糯米～推薦👍飲品：3個椰青，3個特飲連10% 加一，HKD1,062.-/6人，抵！

突如其來嘅快閃台灣，真係放工即刻趕去機場。由於未食晚飯嘅原因，今次試吓青悅。我哋一行四個人，我覺得份量都算正常嘅，可惜味道偏鹹，同埋湯唔夠熱。唯一係覺得春卷真係好好食😍

初二去旅行，早咗出機場所以醫肚先，機場好多都係大眾化嘅餐廳，然後見到呢一間餐廳，因為泰愛泰國嘢食，唔洗考慮即刻入去。估唔到咁繁忙嘅餐廳，職員依然Keep到咁好禮貌，尤其一個叫Bobo嘅女職員，超好笑容，不停留意每一檯嘅需要。仲有一個幾靚仔男職員，都係著便服嘅，應該係負責人，雖然餐廳好繁忙，但佢都keep住餐廳運作，令到我哋唔係等咗好耐就有嘢食，見到隔離檯有啲人落單兩分鐘就催單，仲嘈嘈閉，真心覺得香港服務行業真心辛苦，尤其做機場更加分秒必爭。講返食物，兩個人叫咗一碟蝦餅，一碟馬拉盞通菜，一碟豬頸肉濕炒河，一份越式豬頸肉+札肉飯，一份芒果糯米飯，一杯泰式奶茶，一杯凍檸茶埋單平過九龍城😳😳味道仲要超好味，估計廚師係泰國人，所以先有咁好風味，本來機場食嘢冇乜期望，但係今次竟然喜出望外，下次去旅行之前都提早啲到機場，返嚟呢度食嘢!!

啲食物就不過不失去啦，叫左碟豬頸肉，估唔到有三塊咁多。啲職員態度就好過茶餐廳少少啦，悔悔氣氣唔想做咁咯，請唔到人咪唔好開門咯，洗唔洗我地幫埋佢打工。如果食茶餐廳係咁既態度我又接受到既，其他就無乜特別啦

原本諗住喺非禁區買個M記來食嘅時候，無意中發現咗原來隔離都有泰國菜食，於是即刻同朋友嚟呢間有得食越南菜同埋泰國菜嘅餐廳食個晚餐先～馬拉盞炒通菜💰HK$78份量多，味道正常，不過不失～香辣肉碎甲拋飯配泰式醃蛋💰HK$86隻蛋煎到好香脆，味道唔錯，但略嫌香辣肉碎個味道唔夠正宗～牛柳粒沙嗲(4串)💰HK$92牛柳粒粒粒juicy，點埋沙嗲醬，超惹味～海鮮泰柚子沙律💰HK$96材料都算豐富，有兩隻大蝦兩粒帶子，個汁酸酸辣辣幾開胃～(凍)越式地道奶茶💰HK$32用樽仔裝住幾得意，但味道太甜，有啲失望～

今日難得入香港機場做野，終於有機會約喺機場做嘢嘅朋友食lunch。大家都話呢一間泰國🇹🇭餐廳，選擇種類多、味道都叫唔錯。大約12點入到去，差唔多已經坐滿，可能好多都係機場員工😝店員安排咗bar 枱路口位，好快就俾咗兩杯水我哋 & QR code 自己落單。咁啱我哋大家都想食泰式撈檬，所以一人叫咗一個炭燒厚切豬扒配扎肉檬粉 & 炭燒豬頸肉配扎肉檬粉味道不過不失，機場食品來講算係咁。可能冇期望冇失望，埋單因為機場員工關係所以有折，每人$85有找可以再去

好一般咖哩飯🥹去旅行前係機場非禁區😌搵咗間叫青悅·越泰料理☺️午飯時間都幾多人幫襯😂黃咖哩牛舌牛筋飯🍽叫咗個黃咖哩牛舌牛筋飯，真係好貴100蚊，數過有三大嚿牛舌，牛舌肉質柔嫩，口感絲滑，富有彈性，咀嚼感柔軟，可惜得三嚿，牛筋仲衰得兩嚿，味道正常，黃咖喱汁重椰奶味，大量洋蔥同薯仔送飯食，整體而言，黃咖喱牛舌牛筋飯的口感結合了牛舌的柔嫩同富有嚼勁的牛筋，但份量太少，朋友點嘅豬扒撈正常好多😅😅個人真實食評，唔建議點黃咖哩，費事影響心情😅

機埸入禁區前唯一比較有特式既一間餐廳，越南泰國菜，兩個人選了喇沙及馬沙文咖喱牛腩，味道豐富，實在太惹味了，喇沙食落去辣左D, 價錢都好合理，比起禁區內7樓Foodcourt 價錢平點。

我响機場工作，機場內餐廳選擇唔多，呢一間係我心水之選，性價比高，價錢合理。近呢半年服務水平同食物質素都有好大嘅改進。餐廳環境寧靜亦寬敞舒適，員工親切友善，經理有禮貌，落力又有效率，會聽取客人意見，order 有問題亦會好主動即時幫你解決。個人口味推介：1）炭燒厚切豬扒扎肉飯豬扒煙靭鬆軟，有炭燒味。2）鮮蝦炒金邊粉鮮蝦彈牙，金邊粉有鑊氣。3）紅咖喱三文魚飯咖喱汁甜度適中，三文魚夠大塊。4）泰式奶茶香甜，奶茶味好濃郁，正。總括而言，會繼續幫襯，加油！

真的很久...很久...沒有來過機場了，適逢有事到機場，便順道觀光一下。 哇！真的多了不少食店，食飯也較方便了！這店的環境不錯，而且地方也很寬鬆，容易找位（可能時間早，或者上機的人都在市區食完才來吧！今天叫了：1）海南雞飯$90+餐飲要另（+12）, 還要加一服務費~ 雞的份量正常，雞皮也算是滑，但雞肉就沒有甚麼雞味了，而且肉質有點腍和脢的感覺，還有少許水，整體來說：過得去吧！~ 至於醬汁有3種，分別是：姜蓉、甜甜的醬油和另外一種不肯定（疑似蒜蓉加一點點辣椒），但也是較為好味的醬汁😅。 ~ 還有一碗似是用浸雞來做的湯，有一舊冬瓜和少許肉碎粒；湯的味道也不難喝，是可以接受的。~ 另外也另加了一杯泰色奶茶，茶的顏色和味道跟其它泰國餐廳有點不同；茶色沒有那麼紅、味道也較為偏淡，不算是好甜，是可以接受的。~ 整體來說： 這碟海南雞套餐不算太好吃，但也不是太難食。 ~ ~餐廳出餐算是很有效率，但味道就可能遺忘了！ 但可取之處就是：地方夠寬闊，店員也不太理會我們，所以，客人可以坐到夠鐘才離開也可以。😊 ~ ~