集眾菜館

营业中

休息中

今晚試咗呢間小菜館嘅羊腩煲，味道唔錯，材料新鮮，羊腩份量都幾足，而且食落去就知道唔係雪藏羊腩，炆得好入味又夠林，冬菇冬筍馬蹄同埋支竹都好正，吸晒羊腩啲精華所以特別好食，如果多啲支竹中正，直程可以食多兩碗白飯。同好多地方一樣，佢呢度嘅羊腩煲都係跟一碟生菜，$498一煲加埋碟菜真係物超所值。呢度嘅咕嚕肉係必叫嘅，做到外脆內軟，真係好少地方食得到。白胡椒煎魚卜有驚喜，白胡椒嘅香味加埋煎香咗嘅魚卜，外層香脆而裡面有保留返魚卜嘅質感，真係唔錯。

舊年冬天喺集眾試過佢嘅羊腩煲念念不忘，今日幫襯嘅時候口多多問吓有冇羊腩煲，點知原來已經上咗架，梗係要叫黎試吓，懷念一下大廚嘅造詣啦。今年佢哋個羊腩煲同舊年一樣賣$498冇加到價，啲羊腩炆得又夠林又入味，支竹同冬菇都吸滿羊腩d味，仲有一碟生菜跟埋，超正。上湯花甲浸豆丕好多食，豆丕夠嫩，花甲夠鮮味，連啲蒜頭都入晒味。預訂咗酥炸生蠔，真係炸得好靚好夠酥，d蠔都肥美。避風塘拆肉賴尿蝦食落啖啖肉，無試過咁懶食賴尿蝦。黃金豆腐粒d豆腐外面香脆入面好滑。川椒豬手個汁好好味，其實唔係好辣，食落好惹味。

必食咕嚕肉唔洗多講，真係必食，差唔多個個都嗌，食落又真係唔錯，個口感外面微脆入面舊肉就軟熟有彈性，佢連D配菜都好食嗰吓先勁。川椒豬手呢個係冷盤，唔會太辣，整得幾入味，豐富骨膠源。鐵椒白糊椒煎魚卜第一次食咁樣煮的魚卜，味道有驚喜，唔鯹兼好鮮味，鐵板熱辣辣好正。甜梅菜籠仔蒸菜芯苗呢個配搭唔錯，搞到梅菜同菜芯苗都好食咗。豉油王炒麵炒得好夠乾身兼微微燶，好夠鑊氣，香噴噴，銀芽韭菜蔥段都炒得香，加埋芝麻香味，留個Quota食豉油王炒麵好過叫白飯。

一入去坐低，老闆娘已經用不友善態度表示：「每人最低消費要$200」，我地無理佢，點完菜，第一度菜竟然係咕嚕肉，但我哋叫嘅係鮮菠蘿拔絲蝦球，味道係一流。 但接住落嚟嘅事件，完全反映老闆娘欠缺應變能力。食到一半，我個朋友（落喺部分體機底下）被部冷氣機啲滴水整濕咗件川，但老闆娘完全無道歉，就咁熄咗部機。廿分鐘後，老闆娘竟然想開返部冷氣，我另外一個朋友即時喝住佢，佢先至死死地氣唔開機，但仲要黑面。呢間菜館無下次！

今晚幾個餸之中最令人surprise嘅就係個集眾極品雞，雞味香濃，一d都唔肥，因為我地人唔多，所以老闆娘建議我地叫半隻就夠食，佢嘅半集隻都幾大隻。有埋雞內臟同半個頭，貨真價實。高湯浸絲瓜清清地，估唔到啲絲瓜刨晒皮之後會咁滑，因為無味精所以個湯都可以飲埋，d金蒜都好食。呢個係冷盤小食，叫川椒豬手，啲豬手好入味，另外雖然話係川椒不過又唔係好辣。佢嘅豉油王炒麵炒得好乾身好夠鑊氣，唔算太油，麵上面加咗芝麻零舍香。

呢個招牌咕嚕肉係名物中嘅名物，試過就知道有幾出色，咕嚕肉外面雖然封咗汁但係仍然有輕微嘅脆口。豉油王鵝腸新鮮好味，鵝腸吸晒豉油嘅黃豆香，墊底嘅芽菜仔好正，因為啲鵝油同埋豉油嘅精華都落晒去佢度。呢個金薯安格斯牛柳粒係老闆娘推介嘅，佢話呢個餸嘅重點係啲金薯而唔係安格斯牛柳粒，食落又係真，安格斯牛柳粒固然好味，但係將薯仔炸一炸之後佢又吸埋牛柳嘅味道所以份外好味。小炒王都好好食，韭菜芽菜蝦乾腰果之外最正係佢有炸脆咗嘅芋頭絲。集眾招牌雞真係無叫錯，雞味好出但係一d都唔肥，仲有埋雞內臟。杏汁白肺湯好足料，飲落好斯滋潤，一窩有大約6碗。脆炸一口豆腐好滑，餸酒佳品。上湯浸絲瓜都好正，將絲瓜切咗皮原來係咁好食嘅。呢隻德國啤幾好飲，出面比較少見。

試過呢間店嘅出品就明白爆場名店真係千祈唔好諗住可以wall in。必試咕嚕肉一啖咬落去少少脆口少少軟身，加埋唔會一味得個酸字嘅汁，真係名不虛傳。豬肉係新鮮豬肉，另外佢用嘅波蘿係新鮮波蘿，$158仲要免加一真係物有所值。豉油皇鵝腸又係用新鮮鵝腸，同雪藏嘅真係好大分別，一食就知道。仲有佢嘅蔥絲同芽菜仔吸晒啲鵝油所以特別好味。小炒皇夠乾身，最欣賞佢嘅炸芋頭絲，卜卜脆好正。呢個小炒皇一啲都無求其炒油淋淋嘅感覺，真係唔錯。什菌豆腐煲啲豆腐好滑，個芡汁味道啱啱好唔會太鹹唔會太杰，成個餸好清新。呢度嘅啤酒選擇除咗藍妹青島嗰啲之外，呢隻德國啤酒好好飲，真係要試吓。

2023.6.23 星期五 8:30pm星期五晚飯時間，好多人聚會，幸好在門口等一兩分鐘就有兩個位。••••••••••••••••••••| 鮮菠蘿拔絲咕嚕肉 | $158🔥🐖🍍🫑拔絲甜得來也很脆，吃到尾都可以保持脆度。咕嚕肉大塊有咬口又夠腍，菠蘿好新鮮，三色椒炒得夠爽。酸甜度調教得恰到好處，好開胃，讓人吃不停口。| 蝦乾蒜蓉蒸勝瓜 | $98🦐🥒🧄這道菜是來清清喉嚨的。擺盤好看，勝瓜蒸得好腍，入口融化，基本是沒有什麼味道的，但有大大隻又鹹香的乾蝦，點了豉油，完全提升了美味度。| 金沙鮮魷魚 | $148🔥🦑🥚外層佈滿鹹蛋黃碎，炒得好均勻，炸衣鬆脆，有少許油膩。魷魚新鮮，也算不錯。吃金沙鹹蛋黃為主，好邪惡的一道菜。前菜 $10白飯 $12••••••••••••••••••••食物有質素，味道和賣相都很好😋冷氣夠涼，夠氣氛，適合聚會。店舖職員都是一家人，好忙好趕，不過反應很快👍🏻

當晚3個人去食，咁坐低後就睇下有咩食，諗左一陣都未知食乜好，咁就叫住碟小炒皇同兩支啤酒先，點知個老闆娘就好無禮貌咁講左句，每個人最低消費要$200，當然我地就唔知有最低消費黎樣野啦，咁我地就話ok啦，其實我地一直都仲睇緊食乜，最後諗到食乜餸，咁就叫侍應落單，頂點知侍應唔會落單，一定係要個老闆娘落，咁叫左個咕嚕肉、魚鰾、叫一隻乳鴿，點知個老闆娘乳鴿一叫要叫兩隻，咁我地就話唔要乳鴿，就落左咕嚕肉、同魚鰾，隔咗一陣老闆娘走過黎講話有人外賣一隻乳鴿，問我地令一隻乳鴿我地叫唔叫，咁好啦要隻乳鴿。到上菜，個小炒皇得D韭菜花、炸芋頭絲，幾隻冇味嘅蝦乾、幾粒腰果，味道真係麻麻。跟住就係個魚鰾，完全一啲味道都冇😞到個咕嚕肉，炸得係脆既，不過就好厚粉漿，正式係粉多肉少，同咬落去有部份D肉係有D怪味😩乳鴿就同其他地方食既就冇乜分別。一路食就一路講，唔會再嚟呢間嘢食，一來冇禮貌有冇服務，我仲以為自己去咗卡拉OK，每個人要最低消費$200。

雖然佢嘅樣子唔係好起眼，但係真係我食過最好味嘅咕嚕肉，無論維持熱度到肉質，調味，炸都唔會好粉好老，真正係民間高手，估唔到一碟咁平凡嘅菜式，都可以做到咁好，真係媲美酒店嘅中菜廳。今次同朋友食，另外好想帶屋企人嚟食添啊。至於其他菜式都不過不失，好有鑊氣，又係抵你咁多人排隊等嘅。食飯嗰日係，星期五晚嘅時間，記得要預早少少去排位，因為要人齊先可以入座，因為其中一朋友未到，俾咗下一組人士入去，我哋等多半個鐘先有人走。

一食就知道佢碟豉油皇鵝腸選用嘅鵝腸質素極高，一來食到有鵝油嘅香味，二來佢個彈性同埋煙韌度，真係好味道。唔好睇呢個鐵板白胡椒煎魚卜嘅賣相麻麻，食落好有驚喜，出面常見嘅魚卜煮法都只係薑蔥，用白胡椒煎真係比例少，而且又真係幾好食。酥炸生蠔用嘅生蠔都幾肥美，而且外面D炸皮都真係夠酥夠鬆化。集眾招牌雞唔肥而且雞味濃，肉質鮮嫩，呢一碟係半隻嘅份量，仲有埋雞膶雞腎雞心雞腸，真係正。籠仔甜梅菜蒸菜芯個重點就係D菜芯要同D甜梅菜一齊食，咁樣先至食到佢嘅精髓。豆酥蒸蟶子都好正，D蟶子剛剛熟所以好鮮嫩，配豆酥就味道濃少少不過都幾夾。金銀蛋菠菜苗都好食，當然比起上面嗰D就會變得普通咗D。

夜媽媽11點幾打算去食個宵夜先至打道回府，於是就去咗呢間小館坐低，叫咗咕嚕肉同埋豉油皇炒麵。佢個豉油皇炒麵好食，炒得夠晒乾身，個火喉掌握得好好，要炒到少少燶先至夠香，但係過咗龍就成碟都唔食得。佢D芽菜、韭黃同芝麻令碟豉油皇炒麵嘅香味提升，另外又唔會好油，大廚嘅出品好掂。咕嚕肉係呢間小館嘅招牌菜，又真係煮得好好味。咕嚕肉青椒黃椒紅椒同埋菠蘿都好食，尤其是佢D菠蘿，食落覺得應該係用新鮮菠蘿，用D材料都有D要求。

鮮菠蘿拔絲咕嚕肉果然係招牌菜，真係好好食，佢能夠做到外脆內軟，唔會太乾身，入面舊豬肉仲留有少少肉汁。另外新鮮菠蘿味道果然不同飯響，成本高湖但係味道好令我非常鍾意。呢間嘅小炒王都做得好，佢唔似出面好多地方咁樣用啲餸頭餸尾加啲韭菜腰果就話係小炒王。我最欣賞佢個小炒王入面有炸脆咗嘅芋頭絲，好食，另外佢個蝦乾又唔會太硬太韌咬唔到。金樹安格斯牛柳粒看似平凡但係味道非常出眾，尤其是係個薯仔，炸香咗再同啲安格斯牛柳粒一齊煮，吸收晒啲牛肉味，好正。三個餸看似平凡但係真係做得非常出色。

🌈這間餐廳位於地理位置方便的太子區，餐廳面積不算太大，桌與桌之間的空間感不大，但衞生情況還好，更表現出香港小炒店的地道感覺。食物方面，最令人眼前一亮的就是熱騰騰的‘’紅燒乳鴿‘’，皮脆肉嫩，更保留到乳鴿的肉汁，配上一杯冰涼的啤酒，更顯出小炒店的風味。另外‘’金薯蜜餞牛柳粒‘’都令人一試難忘，金薯炸得很酥脆，牛柳粒也炒得剛剛好，再配上甜甜的蜜餞醬汁，真的非常好吃，對我來說，比起牛柳粒我更喜歡吃金薯。除此之外，‘’拔絲咕嚕肉‘’也是必叫的菜式之一，本身咕嚕肉的豬肉質素很好，有肉汁，再將炸得香脆的咕嚕肉配上甜甜酸酸的醬汁，可謂香港特色之一的美食！不逐一介紹了，總括而言，其餘的菜式全部都很高水準，是一間力推的小炒店。 

鐵板白胡椒煎魚卜真係好掂，用咗白胡椒再加上鐵板嘅熱力，辟走晒魚卜原本嘅魚鯹味，而且亦令到魚卜的味道大大提升。集眾招牌雞果然唔錯，提升成本選用本地嘉美雞，雞味濃兼脂肪含量偏低，另外雞肉都好滑。豉油皇炒麵炒得夠鑊氣兼且夠乾身，炒到帶少少微燶，芽菜韭黃等配料加埋落去真係幾好食。籠仔甜梅菜蒸菜芯嘅甜梅菜香味被菜芯吸咗，所以食D菜芯嘅時候就可以感受到陣陣嘅甜梅菜味，值得一提嘅係D菜芯好鮮嫩。冰火魷魚用嘅魷魚都幾新鮮，呢味餸都算辣，D青瓜好食。呢隻啤酒好飲，出面好少見。