影片
【九龙城区】【锦成牛什粉面茶餐厅】几日冇做，唔代表我忘记咗 1am红馆 系列，之前都同大家解释过原因呀，原理呀，操作呀等等。不过虽然话系帮紧红馆嘅人，但系其实都可以帮到附近嘅团体，例如香港理工大学，或者红磡嘅殡仪馆群落嘅。咁今日我想讲呢间嘢呢，其实就超近𠮶堆「大酒店」，因为平日都真系比较少走过嚟呢边，所以我就连有咩餐厅都唔系太清楚。行到入内街，见到好似有啲车房，又有大量花店，当然都系制作花圈、花牌𠮶啲花店，加埋棺材舖，都系蔚为奇观嘅。咁无办法之下唯有走返出大路，即系机利士南路，起码有巴士经过热闹啲，似系会有多啲餐厅食肆嘅。不过，我一个人啱食嘅嘢又好似真系唔多，所以最后都系拣返大路嘅第一间，开喺超市隔离，位置都几便利嘅一间粉面店，就入去试吓佢。入到去都几好招呼，侍应都有马上安排位置，不过由于个餐牌都几多嘢食，所以我都谂咗一阵。佢有客饭，有汤饭，有蒸饭，好似乜都有咁。又有生滚粥、小菜、蒸鱼，都算几包罗万有嘅茶餐厅，适合晒唔同需要嘅客人，不过我就选择困难喇。咁我见佢餐厅名写自己系牛杂粉面，就叫个「牛腩牛什捞面」，本身觉得都 okay，但系食食吓觉得啲嘢都几咸，感觉要反个肾出嚟洗。叫杯「冻柠茶」少冰，有返啲甜度中和吓，就好咗啲喇。而我亦都叫多碟「菜心」扮吓健康，咁样 $60 都合理。撇开个咸字，其实呢间嘢招呼算周到，冷气又算几够，又有电视睇，都冇咩可以再挑剔。只不过有好多客人都系清一色黑色衫裤，大家明咩事，因此气氛上可能会有啲奇怪。我算系𠮶种百无禁忌嘅人，喺得呢头食饭都预咗，多啲理解同包容就好。。。（地址：红磡机利士南路21号地舖）
继续阅读
依个舖位旧时租俾另一间茶餐厅,晚上一般都有7, 8枱客.自从转租俾依间茶仔之后,感觉上生意比之前果间仲差左.单睇舖头名,再加上舖头外面既座地牌都系推销粉面餐,会令人以为系净食牛腩河,水饺面果种舖头,其实依度一样有小菜.店内既装修格局同上一手茶餐厅一样咁滞,唔够光猛,真系唔太中意.相信连餐具都继承咗上一手,睇得出明显地残旧.本来叫左香芉炆腩肉,但香芉卖晒,就转左做春菜炆腩肉,无咁滞都好既.全场得六个客, 大约1/5满,厨房嘅压力应该唔大,但都要等15分钟先至有得食.餐汤先到,系青红萝卜煲粟米.汤都几甜但依个唔系重点.青红萝卜厉害嘅地方系每一粒都有渣,咁我梗系预计粟米会淡而无味啦,点知系出奇地甜㖞.算系食完萝卜渣既补偿啦.食春菜煲最紧要试下佢𠮶啲汤,一口呷落去,太咸,但系咁样用嚟捞饭反而啱啱好.春菜煮到淋淋地,非常好嘅质感,虽然汤系咸咗啲,但系都冇令到春菜过咸,食落甘甘地,有啲似食芥菜嘅感觉.腩肉就可能分2批唔同时间放落煲度,有几旧非常咸,另外几旧就相当淡.而且腩肉切得太大件,切细一半就差唔多.
继续阅读