金記冰室 (八號花園) (已結業)

金記冰室在大埔開業已經有一段時間，但每次中午經過都有很多人排隊，動輒要等十多分鐘才可入座，對於只有一個鐘頭吃午飯的我，實在奢侈不起，因此至今仍未試過。好彩今日有同事提早去排隊，為人民服務，所以才有機會試一試這間數十年的老店。食物走茶餐廳大路菜式，有套餐、特餐及各款精選等，平日唔喜歡吃乾噌噌白飯的我，看到餐牌有「野菌雲耳魚柳泡飯」，當然要一試。湯飯大大碗，餸料足，有雲耳加幾種菇菌，還有五六塊魚柳，魚柳煎成金黃色，賣相吸引，咬落肉質非常嫩滑，比起平日吃的吉列魚柳好得多，且完全無雪味，湯底味道鮮甜，加上有香芹粒，更加提鮮，伴飯吃，多呷幾口亦唔會口渴，值得推介。這一頓飯唯一美中不足的是沒有跟餐飲，要用正價＄19飲一杯凍檸茶實在有點貴，再細看餐牌，發現只有午市套餐奉送熱飲，其餘部分餐起碼要加＄8才跟飲品一杯，尚可接受，希望金記冰室日後能有所改善，在茶記吃飯配餐飲是常識吧。

最近大埔八號花園附近新開左幾間冰室，其中一間日日都好多人排隊，星期六日晚飯時間條隊仲長。咁岩今日屋企無煮飯，就決定同細佬一齊出去試下依間冰室。 雖然係平日，但8點左右到都有幾位係門口排隊，不過好彩係門口排左一陣就有位啦，入面其實唔係好大，但係裝修就好有古香港味道。 冰室比人感覺係食常餐為主，但依度又唔係喎，小菜既款性都多。我地兩個人最好就一人揀一個小菜，之後就一齊食。 我就揀左滑蛋炒蝦仁，我細佬就揀左黑椒牛柳粒，再加15蚊轉套餐，有白飯，例湯同埋一杯熱飲。 今日中湯係紅青蘿蔔湯，雖然係例湯，但都唔係味精湯，唔錯。 滑蛋炒蝦仁，炒蛋真係炒到好滑，而且加埋左韭王同埋蔥入去炒，帶出蛋既蛋味，同埋D蝦仁大大粒而且蝦肉都彈牙，成碟菜份量都多。 黑椒牛柳粒，牛柳粒份量多，雖然牛柳粒係大粒，但係牛肉炒到唔韌，牛肉熟既程度岩岩好。 飲埋杯飲品，埋單一人80蚊，CP值高。下次再黎可以試下佢D 常餐！

呢個舖位本來係一間大型個人用品護理連鎖店，人流比較少。 估唔到一轉左做金記冰室，食個晚飯都要大排長龍，好誇張。 真係好旺場，幸好流量快，就算排長龍都唔係等太耐，今日大約等十五分鐘就入到座。擺設同裝修都有啲懷舊FEEL。中式例湯有粟米、紅蘿蔔、馬蹄，咁多材料，算係交足功課啦。蜜桃咕嚕肉落單後三分鐘內就做好，超級快手。 以為係一早整定，不過食落就知佢係即做，外皮夠熱夠脆，採用豬頸肉夠晒彈牙同juicy。蜜桃肉只有兩片仔就少左啲，如果多啲會更好！蒜蓉炒白菜仔白菜仔比預期中細碟，夠爽脆，少鹽。鐵板美式雜扒一加汁落去就「吱吱聲」，夠晒熱辣辣。份量好大，牛扒、雞扒、豬扒、腸仔、煙肉，三款扒類都唔細架，仲要有埋炸薯條，食完超飽。綿滑蛋白杏仁茶唔係度度有得飲，真係原隻蛋白放落去。 本身已經有少少甜味，唔駛再加糖，夠滑夠養顏。總體唔錯，唔駛加一。 最驚訝係「快」，所有嘢幾分鐘內到齊晒。

今晚行過見並不是太多人排隊，所以就入去，這裡裝修都好有特色，以火車站為主題，而座位就好似以前嘅木製座位，幾特別！這裡嘅餐牌都好特別，成個月曆，一頁頁咁中式西式任你選擇，除此之外還有精選晚餐，食物選擇豐富，今晚晚餐有最愛嘅金記煎肉餅$68，晚餐跟白飯同是日餐湯，除此之外點了個中式栗米魚柳$58，菠蘿生炒骨$58，兩個人一個套餐加兩個菜，真係絕對足夠！最快就係個晚餐金記煎肉餅，圓圓嘅煎肉餅，煎得好香噴噴，入口彈牙煙韌，肉餅內還有甜栗米粒增加口感，完全開正我杯茶！而個栗米魚柳，魚柳炸得軟滑加埋個栗米汁入口就份外配合！最緊要係啖啖肉，之餘味道夠！菠蘿生炒骨，個汁帶酸帶甜十分開胃，加埋鮮甜嘅菠蘿同紅綠椒配搭，入口一啲都唔覺得生炒骨嘅熱氣，真係夠晒開胃！這裡最抵就係可以加錢轉飲品，我就轉了杯雪糕紅豆冰$13，大大杯，上面放了個雲呢拿雪糕球，下面就係軟熟嘅紅豆，入口嘅感覺就好似以前小時候在冰室嘆紅豆冰嘅感覺！這裡廚房出菜速度快，落單一陣啲菜就好快上了，讚！

去完大埔郊遊完 搭返巴士出返超級城個邊正當我地煩緊食咩之際 見到前面有間門口已經有人龍舖面走壞舊香港路線既冰室 好野真係要等下不過門口排一陣就入得去 唔係等太耐每人我地叫左個小菜 跟飯跟湯跟野飲 上餐時間幾快 個頭落單 轉頭就有湯飲XO 西蘭花炒牛肉話就話冰室 但係炒出黎既都幾有鑊氣西蘭花睇得出好新鮮 色澤幾好 口味岩岩好 唔太濃味我幾中意黑松露西芹炒蝦球另外朋友簡左呢個小菜 哈 西芹原來都可以配黑松露 又有新食法 又ok 喎 蝦球炒得幾爽口兩個菜既蔬菜部分都幾新鮮 值得highlight雪糕紅豆冰另外見今日出左身汗 獎自己加13蚊整返個雪糕紅豆冰我會用好濃郁黎形容 幾好味 天氣雖然涼涼地但係今日出左身汗飲返杯 都幾爽嫁金粒西多配雪糕朋友聲稱未夠喉 order 多左個甜食其實個原理就好似梳乎厘配雪糕咁不過佢係西多配雪糕 我就第一次咁樣食法又真係可以match 喎做到一冷一熱一齊食個feel 正！埋單每人百幾蚊 非常可以接受 街坊價！

話說八號花園附近突然間開咗好多冰室，而每次經過就係唯獨是金記就大排長龍嘅! 最開心就係阿媽，有多一個藉口唔使煮飯，做仔女嘅就排隊等位叫定餸，佢一落街就有飯食！1967 有成50年經驗，裝修十足十幾廿年前嘅大埔墟火車站，果然有心思有特色。Menu 選擇有好多，阿爸阿媽就鍾意食中式小菜，街坊價錢$60-$80到已經有交易首先係我哋都好鍾意 欖菜肉鬆四季豆 $57，炒得好 惹味。蠔王仿鮑片扒時蔬 $58，大大碟西蘭花，蠔汁味道同酒樓一樣好，仿鮑片有口感。然後就係精選晚餐價錢最實惠，阿爸鍾意食魚，豉汁涼瓜炆倉魚 $78，已經有湯又有飯，啱晒佢嘅胃口！本先係已經鍾意食涼瓜，佢話個豉汁好好味，倉魚又夠新鮮，基本上我淨係影咗張相然後已經見到成條魚食到剩返排骨，佢行動表示好好味。我呢就叫杯野飲，特色飲品跟餐都係加$13，我杯西班牙咖啡，有雪糕又有香濃咖啡，好味到冇得彈！冰室感覺經典，港式茶餐廳的懷舊食品，我真係未飲過 綿滑蛋白杏仁茶 $23淨係隻杯已經有晒老香港味道，有成隻蛋白係杏仁茶裏面，感覺好滋潤，又唔會太甜，要推介一下！

雖然身為一個大埔人，但已經好耐冇試過係大埔食飯。難得今日要北上開會，可以早小小番到黎，即刻相約中同食晚飯。呢區既變遷越來越多，食肆都比以前更多選擇，云云新開既餐廳中，我對金記冰室最有興趣，記得之前試過灣仔同銅鑼灣分店，裝修很有老香港情懷，食物質素亦很有保證。八點多去到，門外大排長龍，幸好店鋪面積頗大，等左大約十五分鐘就可以入座。鐵板西冷牛扒以茶餐廳既質素黎講，呢塊牛扒絕對值一百分！上檯非常熱辣辣，淋上燒汁之後會聽到吱吱聲，很治癒🤣肉質嫩滑得很，有咬口🤤唔會好似一般茶餐廳咁用鬆肉粉將塊牛扒餣到體無完膚👍🏼麻婆豆腐飯份量十足，整個醬汁偏辣，中同表示十分滿意紅豆冰都十分大份量，紅豆蓉又唔會太甜，讚

話說好日都唔去大埔，同朋友行下行下又唔知有咩食，見到呢間金記冰室新開～又幾多人排隊，就一於試下佢☺️👉🏿✨咖哩雞扒飯 hkd 53 💸📌晚餐黎講價錢都算係咁～咖哩汁會分開上，自己中意落幾多就幾多🤣帶有小小微辣，食落又係惹味👌🏽佢啲雞扒煎到脆卜卜，好香口🤩👉🏿✨炒蛋叉燒飯 Hkd 52 💸📌佢啲蛋都算炒得幾滑，叉燒唔會得個2-3舊，加埋啲豉油撈埋飯一齊食超正！👉🏿✨白雪公主 Hkd 13 💸📌黑牛就飲得多，好小似白雪公主呢👀呢款係雪碧加雲尼拿雪糕，唔會好甜，有埋雪糕一齊飲係正啲既！

呢間餐廳在大埔新開無耐，次次經過都見好多人排隊，好誇張。尋晚見有時間多，都去排下，好彩等咗十分鐘左右就入得。有雜扒餐，所以一次過可滿足食慾，雞扒同豬扒好食，牛就一般啦。我個餐無飲品送，唔建議食，價錢貴，但係質素好一般。女朋友個D1餐係全蔬菜，係素食餐黎，好重白胡椒味，好好飲，秋冬飲可以暖下身。有白飯、例湯（可揀中式或羅宋湯）、飲品送，反而就幾抵。餐廳裝潢幾好，上菜都快，不過因為太多人食，要等位同搭枱，想同朋友食飯傾計就要再諗諗。

金記呢個名聽得多，港九新界都有分店，但始終未食過，今日入到大埔，朋友話這間冰室新開，大家一齊去試下。店內裝修既新穎又有懷舊feel，店員制服是民初唐裝衫，有趣呢！小菜跟餐有白飯、例湯及餐茶，可以選擇中湯或西湯，這個蓮藕煲豬骨湯材料豐富，冇味精，好好飲。熱奶茶，茶夠香濃，奶可以再多一點。綿滑蛋白杏仁茶冇得輸，熱辣辣上枱，蛋白好香好滑，杏仁味香甜。滑蛋韭黃炒蝦仁，大大隻蝦球泡過油先至同蛋一起炒，蛋炒得滑，炒得香，仲有絕配韭黃是不可缺少的。XO西蘭花炒牛肉，西蘭花翠綠爽口，牛肉入味唔韌，仲有什菌椒絲，XO醬十分惹味。咖哩豬扒撈麵，香濃咖哩辣辣地，豬扒好淋，咖哩汁撈麵這個食法係第一次，沾滿可口咖哩汁吃這個麵另有一番滋味，推介大家不妨一試。最後忍唔住點咗個雪糕紅豆冰作甜品，紅豆夠淋夠香，唔只奶，食到有椰汁，加埋雪糕，完美極了。臨走時見到隔離枱食海南雞飯，賣相唔錯，下次一定要嚟試下。

越來越多出名食肆係度進駐開業，唔駛下下都要搭車出去先食得到，時間都慳番大家雙贏，今次食晚飯就去左呢間新開張冇耐金記冰室如果有食開都知好抵食，而且現家新開張仲有優惠凡買現金券$500即送多$100，即係八折就食到夠晒超值，係餐牌上都有幾多選擇由中式小菜、大廚快炒、港味小食、懷舊飲品等，總有一款啱你口味我地都點了幾款小菜食住先，凡惠顧各款小菜再加$15有白飯、例湯同熱飲仲可加$升級其他特飲添，先有秘製咖喱牛腩，牛腩肉質香嫩，牛筋軟滑，薯仔香脆，再食啖香濃咖哩汁配埋白飯食就最正食法另一款係椒鹽豬扒，炒得好惹味，豬扒肉質鬆軟食落啖啖肉，再來金磚風沙炸豆腐，豆腐炸得夠香脆滋味，內裏滑溜味香甜再飲埋杯特飲黑牛真係冇得頂，一口雪糕一啖汽水已經品嚐左幾款美味小菜後，當然要點個特製豬扒飽同金粒西多配雪糕呢D人氣美食，豬扒肉質細嫩帶點肥美，連埋香軟麵包食口感十足至於西多配上煉奶食落更香甜飽滿，再食番啖雪糕一冷一熱完美組合唔覺唔覺又食完一豐富晚餐。

金記冰室好熟，我好似有食過！諗左一陣，原來係APM呀嗰次睇完戲之後食過，難怪阿姨話大埔開左分店，咁面善啦！都未夠6點，幾多人排隊呀！宜家買佢既coupon，買$500送$100，幾抵喎，叫左個常餐，奄列多士配牛麵，個奄列煎得唔錯，切開眼入面仲有蛋汁架！搞到好似半生熟蛋咁，隻蛋都好滑。沙嗲牛肉麵份量都幾夠，牛肉好重沙嗲味。阿姨話呢度既「金磚風沙炸豆腐」好好味，梗係叫個試下啦！！落單等15分鐘就有啦，即叫即炸，黎到仲熱辣辣，金黃色既豆腐，賣相已經好吸引，仲滋味既梗係d「風沙」香料，紅辣椒、香蔥等切碎炒開，就算豆腐無乜味，加左呢d配料即刻升呢百倍，最好係係乜油，仲有成10件，都係$58，唔錯唔錯！臨走點可以唔食個「一口雪糕西多士」呢？一口即炸西多士，炸理金黃色，外脆內軟，配上煉奶，麵包咸既，煉奶甜甜地，口感幾好！其實餐牌都仲有晚餐選擇，下次再黎搵阿姨真係要試下。

假期下午5:00去食下午茶餐，炸雞比冇、炸豬扒冇、薯條冇，叫5個餐，有3個餐冇好失望囉！侍應禮貌係好嘅，食物係唔錯，兒童餐味道幾好, $48有粟米、薯格、煙肉腸，芝士雞翼、肉醬意粉、棉花糖3粒、橙汁一杯。

星期日下午茶要排隊，不過好快已經有得坐，全新裝修，清潔乾淨，落單上菜都快但簡單一句：性價比低第一次來先試餐廳金牌焗豬飯豬扒非常薄，炒底但大部分都是白飯，只有極少蛋粒唔足料，連鎖快餐店勝第二試試雞扒薯條薯條夠熱，亦細心奉上茄汁，唔駛開聲舉手都有，呢樣抵讚雞扒都係細細塊，不過醬汁不錯但份量都是比較少飲品方面，茶餐廳當然叫杯奶茶！但又係失望一般一般值得一題，餐廳有USB充電位非常新式，而且大部分餐具杯碟都有自家品牌設計，不錯

見到網上都討論得幾勁，聽講西環舖原舖搬黎，今日就去試下個早餐先早起的鳥兒有蟲吃9點去到係要排隊既，但都好快有位，但坐位比較迫，我叫左沙嗲牛肉麵餐 炒蛋可以轉煎蛋 配牛油多士個麵黎左 仲有啲硬，食左煎蛋先，蛋黃仲流心既 但無脆邊牛油多士唔太脆但牛油多，當我食晒個煎蛋多士之後個麵係淋左既，但啲湯得返好小所以都幾咸然後我都係落辣椒油 (我都幾中意食辣椒油，幾香但唔太辣)，但我杯餐飲都未到，我見侍應係用盤裝住好多杯餐飲再派 我諗係派一波咁，而唔係邊杯出左就俾客人但我因爲覺得個麵咸就問一下侍應杯餐飲有未，但做到野既就好似得個經理咁講返服務先經理帶位 仲拉埋櫈我坐，落單都係經理幫我，講一次就記到，電子化篤機之後再覆我一次單，眼見其他侍應都係派下餐 無乜點落單，辛苦經理啦，但經理態度幾好既最後既係 希望個麵會多返啲湯 因為都幾咸 擺一陣仔就索晒啲湯咁。。可能網上討論得太多，見有啲好評誇讚得好好咁，但今日試完，不過不失 茶餐廳水準，黎緊對面再會有新冰室開，到時再去試試邊間冰室/茶室好味啲