金牌鴨店茶餐廳 (已結業)

前前後後都黎過呢間食店好多次, 都可以講細細個已經黎食, 早兩日師傅再次路經此地, 不如入去回味下啦!入到去唔係好多人, 見有個卡位就走埋去坐, 跟住睇下有咩好味, 左睇又睇最後要左四寶飯加凍檸茶!等左一陣四寶飯就到, 一眼望落去賣相唔錯, 見到有半隻咸蛋, 燒肉, 紅腸同埋豬! 先講下半隻咸蛋, 咸蛋唔算好咸, 連埋咸蛋黃送飯都幾好味; 燒肉就燒得好脆, 不過就勁肥加上咸左少少, 一般啦; 紅腸就普普通通, 少少硬咁啦; 豬就直頭不知所謂, 又咸又鞋都幾難食, 成碟飯最好味算係燒肉! 凍檸茶就幾夠茶味, 檸檬酸但夾埋d糖水就好, 夠凍夠味, 得喎!總括黎講食物質素同印象中相比係差左, 加上地方一般, 唔算太乾淨, 服務又係普通, 但價錢唔算貴, 三十二蚊一碟四寶飯加杯餐飲, 都算抵食! 可能係情意結關係, 所以就算好似差左, 師傅下次都會再黎, 不過笑臉就比唔到喇!

星期日下午茶時間去到,一心想食下午茶餐,點知星期日無餐要散叫,已不快.心想又不是什麼旺區名牌食店,星期一至五才有下午茶餐.叫了一個常餐,一個雞亦,一個奶醬多.一開始食都覺得味道唔錯,點知越食越咸,係勁咸,勁多味精,我同我朋友食完已很口渴,成日飲水,第二日仲一齊喉嚨痛,以後一定唔去食!

金牌鴨店的鴨飯是什麼味呢?..答案係:一般!我食左一客,鴨本身比較多肥高(可能咁啱我嗰碟係肥),肉唔算多,而且好像有點靭!個酸甜醬一般,點左開胃啲,但係又無咩特別!下次未必會專登再嚟,或者行過會飲杯凍奶茶,因為太就腳了!

曾幾何時,也有人云亦云之時候,年前聽到吳君如推介過在花園街的"金牌鴨店",跟著去試,吃罷不過爾爾.其間也聽過身邊的朋友對此店的負面評價,其後日子已沒有再去,一別數載,路經此地,姑且再比多一次機會.這間"鴨店"折舊得都幾快,店內已開始"殘殘地".既然自誇金牌鴨店,好自然地要個燒鴨,今次就要個鴨瀨.燒鴨在瀨粉上排得整整齊齊,不過真係得個樣,吃落燒鴨皮並不很脆,鴨肉味亦不濃,而且沒有多餘的鴨油,與底下的瀨粉溶為一題.瀨粉又是沒有什麼米味,得個滑雪雪口感,滑得來還有點假.湯底沒有滲進鴨油,點喝都那麼清,相信是唯一可取之處.連杯凍檸茶也淡而無味,還有甚麼話可說?難為自稱自己為金牌,同之前在油麻地某間茶記,自稱"燒鵝王子"一樣地搞笑.大家同樣包裝多過一切,多瀟洒失禮.

2007年4月23日。金牌鴨店茶餐廳。兩夫妻叫了:叉鴨飯: 叉燒比鴨好味D，D金牌鴨無乜味。蘭花賽磅蟹套飯：西蘭花幾好，不太生也不太熟，但鹹了一點點。不過不失去啦。

中午行完花市去搵食，隨便入去試下。叫了星洲炒米，幾好喎。夠辣，多數廳餐D星洲米都唔夠辣，可能要大眾化。炒得不太油，剛剛好。我老婆叫了叉燒湯米，D叉燒好準很好，不太油不太乾。我見周圍枱好多貎似街坊的人都係叫燒臘，我估這間D燒臘應該都唔錯。環境和招呼都OK啦，一般茶餐廳咁上下。

是晚花墟作業。志不在食，是但叫了個叉鴨飯扣底：上檯時蒸氣上騰，精神為之一振；一口...點解個免費升級既燒鴨脾咁凍既？叉燒，紅色肥膏扣肉是也，拍案叫絕。雖然預o左燒味飯係pre-made 貨色，但似乎「收藏方法」應加以改良。奇就奇在平平無奇但熱乎乎的白米飯身上：靚仔無加色，粒粒乾身，齋食更見和味。現代人飯送餸，此役喚醒我「餸送飯」的微妙憶記。沾一口附送的梅醬：比坊間的少料，但竟比坊間的更「梅子」，酸得來又非盲公開眼，登然胃口大增；來貨與否，無從稽考，正中下懷就是。黑白奶熱奶茶，口感偏淡。笑口，是給教我嘖嘖稱奇的熱香米飯同梅子醬。

29-1-2006 0556與朋友行完兩大花巿兼練完車後，在等待頭班車返屋企前，在附近食過早餐，記得有次路經這裡，見到個名改得「衰衰格格」，佢地該時得子夜及燒味餐。唔想食咁飽，就要了子夜餐，其實只是豬扒芝士腸加蛋，豬扒「鐵」一般的硬，麵亦都係冇乜味，凍啡還可，自己投鬼其食野都覺得差，但係唔知點開檯可以開到出來，埋單28，唔係好平，當係破財擋財。一年將至，但事實上老了二十年，應命！

早前新年，很多食店都沒有開門，見這間有開，又不用加一，就來這裏吃特餐。食物包括，牛油方飽、豬扒公仔麵、腸仔煎蛋和奶茶。牛油方飽- 溜單，沒有來，算數。豬扒公仔麵- 豬扒都唔知比什麼娜過，味道怪怪的，食了兩口便放棄了；公仔麵又腍又無味。腸仔煎蛋- 最正常的一樣，沒有難道掛。奶茶- 茶味幾好，叫做今餐最好的了。之前食過燒味都唔錯，原來其它食物會這樣差。

星期日去完花墟, 一行六人, 三大三小搵食, 記起附近有間金牌鴨, 係openrice食評唔錯, 便去一試.當日點了粟米斑塊, 肉鬆浸菜心, 西檸雞及招牌鴨.老婆試了第一口鴨, 立即吐出來, 一來係涷的, 二來又騷得很厲害! 有很多肥膏, 很可能是鴨尾巴! 其後對整碟"招牌鴨"冇哂興趣.廁所又污穢不堪, 地又滑, 很危險.

前言：繼續在直通巴士站附近找吃。同行的男同事建議到隔鄰街食飯，遂走入這條酒吧和茶餐廳林立的街道上，見此店有煲仔飯和燒臘供應，遂一試。食物和評語：茶餐廳格局，食物種類繁多，點了煲仔飯、招牌燒鴨飯、油菜。 1. 金牌燒鴨飯（$28/份）：選鴨脾要加五塊錢。從點菜至上桌，前後不過三分鐘。涼涼的燒鴨脾肉，配以熱熱的白飯，一冷一熱，對比強烈。不槐係招牌鴨，放涼了仍然美味。鴨普遍少肥多肉，肉質扎實，口感清爽，不會吃得一嘴巴肥油。 2. 臘腸滑雞煲仔飯（$32/份）：正常速度，約廿分鐘上桌。煲一上桌，同事便急不及待，把蓋子打開，澆下豉油，便「起勢」用湯匙把飯從煲仔淘出。心知不妙，連焗都冇焗一焗便食，唉！果然，雖然有相當飯焦，但中間的飯是濕濕糊糊的，頗難食！幸而，雞很滑，很入味；臘腸很甘香甜美，仲好大條！結果，因為餸比飯多，而要以「招牌鴨飯」裡的白飯拌吃煲仔飯的滑雞臘腸。 3. 蠔油菜心（$14/份）：一碟約十二棵灼菜心，蠔油另上，味道一般。 4. 餐飲點了較穩陣的熱杏霜和熱好立克，夠濃味。註： a. 茶餐廳格局，環境擠迫，相當吵耳。地面微濕和有垃圾。幸而，店員動作頗爽快和俐落。

又係facial前o係依度食, 佢講到金牌係燒鴨, 當然要試試喇~ 叫o左碟燒鴨油雞飯~ 但係....... 點解d燒鴨係凍o既?? 唔係"唔熱", 係"凍"喎~~~ 唉............

一間茶餐格局的餐廳, 不過一坐低有少少嚇一跳, 因為佢菜牌都好誇張多選擇. 之前試過外賣燒味唔錯, 所以叫左個燒味三併燒鴨, 差燒, 燒肉. 三樣都幾好, 而且唔肥. 燒肉皮仲幾卜卜脆. 另外再叫籠仔荷葉咸魚肉餅蒸飯, 同煲仔飯好唔同, 飯有荷葉味, 幾欣賞佢, 而且個肉餅好厚了, 不過可惜因為太厚, 食到一半發覺中間未熟, 要佢返蒸. 覺得佢地有D失手. 不過蒸飯都要等幾耐, 二十分鐘已上啦. 加埋飲左三支大啤, 約$200.服務幾好, D侍應都好識介紹菜式!

講真......我都因為時常在附近搭直通巴士,成日去食, 我就覺得他們的蒸飯和燒味好掂, 無錯...係就係烏糟D...但味道和價錢...好~

呢間餐廳係d典型地道港式茶餐廳，即係咩都有得食，價錢又化算，地方污污穢穢咁o個隻。見個午市燒味餐好似幾抵咁，一碟雙拼燒味飯，加例湯或餐飲，29至33蚊，咁就叫左碟cha鵝飯試下。cha燒又幾正o番，半肥瘦，幾有咬口，又夠甜，不過如果燒到有少少焦就更加prefect；燒鵝都幾唔錯，夠熱辣，又夠肉味，不過d皮唔夠脆就要扣d分，不過以茶?廳來講呢間d燒味真係算幾高水準，認真食得過啦！