盛記

营业中

休息中

中區鐵皮大排擋都幫襯過幾間,喱間環境都算惡劣,坐滿後巷斜路,地面超濕,但眼見唔小OL及西裝友幫襯,所以都試下(我就坐坑渠蓋上面).坐底見人地一兜二兜,即刻唔識叫,亞姐介紹"西洋菜湯啦!大眼雞啦",唔知咩意思,但都好啦!就試.上原來係西洋菜湯煮大眼雞,睇落相當核突,但食落不得了,超正!大眼雞首先去皮,然後兩面煎兩煎,鎖住魚肉,到煮o個時唔會煮散晒,而且煎香小小再煲就令到啖湯更鮮甜,難怪碗西洋菜湯好飲成咁!極鮮甜.大眼雞並唔係最新鮮,但食落都ok.最重要係每兜(湯+魚)都係即叫即整,雖然等得耐D,但完全值得.另外,喱兜野$25,白飯$4,超大碗,建議將湯倒入飯中做成湯飯,超正.

放夜斑,一支公四處搵野食,沿威靈頓街行,眼尾'目及'到八九點都未收檔,仲有四五檯客,心諗差極有限掛?雖然四週濕漉漉,有點烏煙瘴氣feel,不過有特色嘛,點了一個蕃茄豆腐大眼雞湯,只見大厨刀法伶俐,將三四條手掌咁長既大眼雞劏得乾乾淨淨,有時坐係度睇大厨的手藝,都係一種欣賞.唔駛十分鐘滾熱辣又充溢魚香既湯用銻砵仔上,賣相真係唔得,但自有一番吸引力,魚細又多骨,食得幾狼狽,不過d湯用黎泡飯好正.

無冷氣的熱爆環境下，預上一班會「乞吐」的地盤人。衛生劣爆到坐坑渠邊，係平，一舊水兩個人，不過就會加送小強，仲有咸爆的豆卜班腩。但生炒骨就掉轉頭甜爆。大牌檔真唔係間間食得過咖。

我都問過老細呢個問題，佢話因為吃的大都是靠勞力工作的，佢地好多時又會一支煙仔一支大啤咁送飯，唔咸會唔夠味道。湯又係油水十足，想唔油可以叫豆腐魚滾湯。因為成日在威記食早餐，睇住佢地八點未夠已經在準備下午的湯及菜，可以咁講湯是落料煲的，如果唔係要煲爛滾湯果條魚要壓力煲至做得到。當然合不合口味還是見仁見智。

每次經過見到人食好似好好食。今日lunch終於親身嘗試過，平時唔多覺，今日好似好多地盤佬，得我o地一台OL，有D唔習慣。佢d菜比較咸，蝦仁炒蛋同蕃茄紅衫魚都係，而且買相麻麻，碟蝦仁炒蛋炒到好黑，蒜蓉炒勝瓜較好，而個西洋菜豆腐肉片湯好肥，我懷疑d湯底係煮好晒，你要d咩料就加落去。好似隔離間陳泗記比較企理d，同事門都話過幾日試o下。

成日朝早在威記食粥都見到呢度老闆，率領四、五個伙記在劏魚切菜斬雞剪尤魚，準備一天的菜式。來食過幾次，先決條件是天氣不能熱，好多時是傍晚時份，叫碟豉椒鵝腸同咕嚕肉，兩支啤酒，炒碟牛河，一百蚊唔駛，已經好正。午飯以套餐形式，菜因事先整定故只一般，但最正係個滾湯，呢度的魚湯好鮮甜，淨係睇湯渣都知足料，另肉片滾湯清清地都唔錯。大排檔在中環皇后大道附近絕對是異數，除左呢條史丹利街尾外，就只有波記。何況呢度真係坐街邊的大排檔，唔怕穿套裝坐圓櫈的話可一試。