益新美食館 (已搬遷) 新店位置

老友在跑馬地開展覽，一班朋友去完開幕禮就拉隊來食晚飯。一行七人，其中有食素的，亦有之前已食過一餐的，加上之後打算去蓮園食糖水，所以寫菜時都要就住下。叫左一斤煙倉魚﹝要之前訂定的﹞、鳳凰焗魚腸、葡汁豆腐、溫公齋煲同雪菜蒜子豆苗。一斤煙倉魚有兩件半的份量，配雜果沙律上，價錢係$208，都唔平。煙倉魚味道都唔錯，但煙的香味不強，個人認為鼓油煎封的煮法更好食。個沙律都幾好味，被清得一乾二淨。鳳凰焗魚腸就乾左D，味道仍然是OK的，但少了魚腸的豐腴感。葡汁豆腐都好大砵，葡汁煮得好好味，釀魚肉的豆腐煎得幾靚，底下的芥菜煮得好腍好入味，D男士們係連汁都清埋。溫公齋煲好香南乳味，雖然有少少底，仍然係有水準之作。雪菜蒜子豆苗幾清，雪菜亦唔會太鹹，都唔錯。總結來說，益新仍然係食粵菜的好選擇，新店地方細左好多，當然係坐滿人，唔訂定檯分分鐘冇位。價錢是較以前略貴，但畢竟係跑馬地區，食物質素亦都值回票價。去完朋友的展覽，不禁有D身痕想攪番轉solo 。唔，要勤力D至得啦！

雖然今晚唔可以同大家一齊去食中式私房菜，但我都因為同同事farewell，去左跑馬地0既益新度食飯，估唔到仲有意外收獲。同事中有另一位食家，介紹大家黎呢度食，一圍12人，好彩訂左位，因為呢度勁細，得六七張枱左右。同事事前已訂左煙熗魚同埋洋葱雞(一隻)，去到再加埋出名焗魚腸、檸檬雞半隻，仲叫左陳腎冬瓜湯、煎魚餅、咸魚香酥肉、粉絲蟹砵、豉汁帶子蒸豆腐同炒菜。出名0既菜式真係做得好好，焗魚腸都無腥味，同彭慶記有得fight，而且仲好大砵添﹗檸檬雞唔酸，但雞肉仍然嫩滑。最正係個煙熗魚同埋洋葱雞，煙熗魚跟沙律醬，沙律醬中有生果同椰果，幾特別，最重要係D魚肉係勁滑，連唔鍾意食魚0既我都食左三大舊，可想而知係幾好味。而個洋葱雞真係勁大鍋，個汁送飯一流﹗而個煎魚餅都有少少驚喜，因為好彈牙同好滑，唔錯。成餐做得最差係個咸魚香酥肉，就咁炸豬排，又無味又鞋柴柴，不叫也罷，所以我地都食剩好多。其次可以唔食係個粉絲蟹砵，因為D粉絲好乾，成個餅咁，唔好食。而最後有個驚喜就係個甜品，綠豆沙，以為只係綠豆沙無乜特別，但係原來係勁足料0既陳皮海帶綠豆沙，係起晒沙0既綠豆沙，真係好多時特登俾錢都食唔到咁好味0既綠豆沙啊﹗

這裡的西檸雞別處吃不到,味道剛剛好, 甜甜地.地方就細左少少,不過都還算舒服.

不知是否地方細的關係﹐出來的菜都很熱~~ 焗魚腸最吸引﹐出來的時候還漲卜卜﹐味道剛剛好~ 可是地方小了一點﹐我看最多可放3圍大臺~