生記滷味

营业中

休息中

呢間老字號既鹵水店，好處是開早上9點，今日就剛好可以去食個飯，當早午餐。店員在厨房裡面，我就同師傅講要個鹵水鵝髀鵝腸飯，沒有例湯，要成$80蚊，碟飯又少，份量不足，性價比好低。隻鹵水鵝髀好細隻，鵝腸又比得少，幸好兩樣鹵水好入味，味道還可，跟西件鹵水豆腐同一點咸酸菜，食完好似冇食過，唔夠飽。整體不滿意。口味：🥚🥚🥚环境：🥚🥚🥚服务：🥚🥚🥚性价比：🥚

自細幫襯，家人愛吃豆腐，鵝肝同鴨舌。今日買餸加料去朋友屋企，我一開口話要一隻鹵水鵝，店員即刻話好大隻㗎喎，結果我要左半隻，二百幾蚊，滿一盒，再搭啲豆腐，鵝肝同鴨舌，師傅仲送左啲紅腸比我。支持老店

一直都覺得生記既飯好味，所以一直都有幫襯，但今日一入到門口，仲望緊個餐牌，都未開口講野，只係望左個職員一眼，職員個樣好不滿，好大聲講，叫野食就大聲d啦 聽唔到你講野啊，個聲線係大到全間鋪坐係到食緊野既客人都望過黎，我知道帶左口罩係好難睇到有無講野，但唔洗咁差態度，唔想做生意可以直接d ，唔想比錢買難受

堂食我就未試過，每次都係買返屋企食。今次就外賣咗個飯盒返公司食，超足料，啖啖肉，唔會好似某啲店鋪咁比啲頭頭尾尾嚟。滷水鵝夠入味，不會死咸。佢地既鵝翼仲正，太晏去會買唔到。

今日喺紅磡嗰邊工作，然後想食啲比較特別嘅嘢就嚟咗這間生記滷味，喺外面見到有蔡瀾同老闆嘅合照而且見到門店外面有不少報章，所以就入咗去食,食完先覺得呢間野麻麻地。今次叫咗滷水鵝飯配老火湯,滷水豬手滷水蛋先講咗滷水鵝飯6/10分，質素麻麻，師傅刀功唔得……切岀黎太薄🤨而且肉質麻麻唔太入味，唔推薦…老火湯好正常的，冇乜挑剔滷水豬手7/10分，質素都係麻麻，應該要成件上，唔應該斬開好多件，十分無言！滷水蛋7/10分呢個質素正常，都叫入味

多年前放工見排晒長龍，我一直無試過今晚試下，好味喎鵝肉有質感。汁唔會太多，唔咸，好過大坑有間米之蓮附送的中湯唔差。是日中湯是白羅白花生唔知煲咩湯，勁多白羅白。食唔晒飯，明早早餐再食。加上今日買的炒麵食唔晒。慳番早餐錢

生記滷味琴晚阿妹斬料返屋企加餸！呢間d滷味夠入味，唔會死咸，鵝同鴨d肉唔會好硬，而且唔會太瘦，瘦中帶少少肥，好正！😋😋😋1.滷水鵝 下莊$150（8/10）2.滷味鴨$75（8/10）個人口味總評分：8/10地址：紅磡蕪湖街62號地下

一直有朋友推薦紅磡這家鹵水鵝，適逢週六在紅磡考試，中場休息時間便來朝聖一番。兩個人叫了一個鵝脾雙拼飯，外加一份鵝紅及豆腐。先試鵝腸，濃郁鹵水汁令人當堂醒神，過往食潮州鹵水多半是參雜味精味，今次這家舖頭的鹵水汁屬真材實料，桂皮八角香味十分突出。再來便是鵝紅，亦屬有驚喜，沒有鵝腥味，入口滑溜，值得推薦！

「經過漫長的等待，門鈴終於響起，粉紅風衣彷佛為千篇一律的孤寂帶來一點生氣；蒼白如死灰的盒子裏裝滿了令人興奮的溫度，沉穩而沉悶的大人頓時綻放小孩一般的笑容，沉醉於久違的香氣；繩結打開，機關一轉，濃厚香氣頓時充斥著家中每個角落，流入身體每一個細胞。一匙入口，細細咀嚼，順著食道滑下，廚師精心預備的飯菜溫暖了口腹，更溫暖了寂寞的心靈。昔有蘇東坡指著月亮祈願千里共嬋娟，今日你我捧著一樣皎潔的塑料盒，嘗著不同的菜式，彷彿回到匆匆數年前，相邀舉箸，把酒談歡，並肩攜手之境，落寞的心一刻得到了慰藉。」～我作嘅🙃喺呢個🥲氛圍🥲氣候🥲季節🥲底下，我地難免又要遇到離別嘅毛文🥲所以呢🥲就去左人地屋企度食餐好😀笑住咁走🙂🙂🙃🙂🙃🙂🙃🙂🙃🙂🙃🙃🙂🙃講吓呢餐係咩嚟啦👴🏼🌊🦢👈🏻冇錯就係老……咳哼…滷水鵝嘞係啦由於時間唔夠所以招呼不周啦盡量買好啲去人地屋企食餐好嘅咁呀…此生記不同彼生記啦😂上個post真係小嬲mode小到人地一棟都冇呢個生記就認真不負所望地好食😋呢間生記滷味馳名遠近50年，店鋪外大大張蔡瀾同成堆報導，每日放飯放工一條條龍就喺出面等斬料，平時真係冇咩事都唔會去食😂但既然係Farewell，就呢間啦實冇死哇

買咗鵝飯、鵝肝、鴨飯、豆腐，想買埋鵝血，可惜師傅話今日冇。D 鵝肉鴨肉都係好正，又滑又鮮甜，暖暖地入口連飯嚼好正。兩件大豆腐切厚片細食，都係嫩滑之佳作。反而件鵝肝有啲過熟，麻麻哋。打開食物，食一口就唔停得，冇影食物相，唔好意思⋯ 其實外觀真係冇乜特別，食落先知道係有檔次。

今日放工去開紅磡拎嘢，到食飯時間肚餓， 行過見到呢間， 見到蔡瀾張相即刻衝入去。嚟到滷味店一定係食滷水鵝， 所以我諗都冇諗就叫咗滷水鵝飯，上到枱時見到係鵝脾，內心即刻充滿驚喜。之後店員好有禮貌送個例湯給我，其實呢啲滷味/燒味嘅店舖，嗰個例湯一定好好味，每日大量頭頸，根本就唔需要加味精，個湯已經好飲，呢度嘅例湯亦都係，飲完唔會有口渴嘅感覺。講返滷水鵝飯，我嘅數量唔算太多，應該有7/8件左右，開頭我以為係滷水鴨，仲諗住叫個師傅對一對，但望多兩眼應該係滷水鵝飯，相對其他嘅滷水鵝飯，份量係少咗啲，而且亦都冇豆腐同埋酸菜。味道方面，我食第一口，已經感覺超級鹹，我唔知點解，佢係有滷水嘅香味，但比鹹味蓋過了，雖然叫做鵝髀，但係都比較偏瘦，最重要一樣，係師傅沒有將佢起肉，因為之後每一件鵝肉，都充滿細骨，而且啲骨仲跌咗落啲飯到，食嗰陣時要非常小心，而且嗰啲飯仲好似唔係好熱，食落去嘅感覺唔係太好。一碟滷水鵝飯多謝$55，對比一間咁有名氣嘅滷水鵝店，係一個合理價錢，但係味道就真係有點失望。可能因為有蔡瀾嘅原因，所以大家對呢間店舖嘅期望值都會提升，如果呢間是街市或者無名氣嘅舖頭，我相信一定冇投訴。

雖沒有標誌的裝橫，但人流不絕已足夠顯示小店的滷味實力。今次下午茶屬輕食性質，我點了豆腐滷鴨雙拼飯，豆腐、滷鴨皆新鮮選料，一入口就知，再配上惹味滷汁，把整體味道再次提升。飯餐會加上一碗涼瓜黃豆廋肉湯，湯味清爽與重味的滷味飯成絕配。

鵝拼腎飯，鵝肉雖非熱上，可仍是彈牙軟淋，滷水味並非死鹹，一路咬鵝肉，淡淡的滷水味慢慢滲出。juice，有鵝肉味。什錦飯，好多種類的食材，有豬耳：軟骨中帶爽脆口感豬大腸：唔肥。豬頭肉、紅腸：沒有因浸了滷水汁而變色及鹹咗。滷水蛋：惹味，送飯一流。豬頸肉：軟熟入味，還有滷水豆腐，又軟又滑。腎也很新鮮，軟中邊位帶些咬勁。伴有咸菜，微酸帶甜且爽。堂食價錢唔太貴，且份量亦大，叫咗2碟不同的飯就可試到差不多10種的滷水食品，讓你一次過試晒不同的滷水餸。

講明要一斤左右，明明有二份下裝，各四分一件，專登攞半隻，切一大大舊超過四分一，結果係斤半，我明白滷水鵝唔會咁準確，但根本老屈，咁做生意，只會幫襯一次，真係冇下次，差

香港人嘅生活從來都係晚上先開始今日係紅磡處理完啲事一行十人就想一齊食餐飯之後先散見到生記唔駛等一於入去試下一入去坐低咩都未叫老闆就先一人上一碗湯 湯嘅蘿蔔相當入味之後我地就叫左一隻鵝 (上圖係半隻)份量都算多 而且鵝片厚薄適中 配上滷水汁相當可口 而鵝整體黎講都幾夠肥 食落唔會太乾鵝雜係去滷水品店不可缺少 上面嘅鵝雜分別係由 鵝腸、鵝腎同鵝肝組成先講鵝腸 爽口之餘亦食到啖啖嘅油香 配上滷水汁真係十分適合做送酒小食而鵝腎 爽口之餘亦相當入味 食得岀滷左好耐最後嘅鵝肝點綴左成個拼盤 真正又粉又入味完全無因為處理不當嘅內臟腥味 不得不提呢碗鵝血 (只限堂食) 食落彈牙 ~~~~~~~~~~~~~~~~~~~~~~~~~~~~~~有經過開紅磡嘅朋友十分推薦你去試下佢地嘅鵝雜真係會令你想一食再食