王子廚房 (已搬遷) 新店位置

第一次寫食評,決定獻俾王子廚房星期五晚接完主公收工,去荃昌中心搵野食,本來諗住去試下和食快餐,不過有唔少人等位,最後主公發板試下呢間王子廚房王子廚房環境淺窄,一眼已經望晒成間舖,星期五晚正路坐滿人,雖然要搭位但勝在唔駛等。坐低首先當然睇下menu,有唔少咖喱選擇,一睇發現比預計中平得多,set dinner連湯、飲品and雪米滋都係四,五十左右,再望下小食,平均都係廿零。落單果陣等左陣,因為收銀同傳菜都係疑似老闆娘既人一腳錫,小本經營就將就下,至少服務都幾nice下。最後主公叫左沙律伴春卷,我就試左個黒咖喱龍脷柳,再加多雞軟骨、煎大蝦同牛柳粒,等左一陣好快就到講左小食先:雞軟骨幾好食,咬落剛好唔會話硬,而且都幾入味,份量又充足牛柳粒賣相平平,但食落都唔差,不過我都係比鐘意黑椒煎多d煎大蝦睇落都唔細隻,味道也不錯之後到主菜沙律伴春卷賣相很好,春卷咬落脆口又好味黒咖喱龍脷柳,味道比較奇怪,有少少甜,好難形容,只係奇怪,唔算難食,老實講食完都唔知咩係黒咖哩.........食完最後埋單都只係$151,絕對係抵到爛,主公讚不絕口,下次再試下其它菜式

公司同事近排突然間成日係呢間嘢度嗌外賣食，搞到成間office都係咖哩味......我心諗咪又係咖哩飯有乜咁特別都無搭單......今日荃豐shopping大袋細袋，行過佢地門口，諗住頹食完就趕返屋企......原來真係好好食！試左巴基斯坦咖哩牛脷餐，包熱飲同餐湯，40幾蚊，呢個時勢真係幾抵不過最有驚喜係個特濃羅宋湯，真係足料夠濃，連我唔多飲羅宋湯既人都飲到乾乾淨淨咖哩方面原來有五色咖哩揀，今次試左巴基斯坦咖哩，味道層次豐富，唔淨係得個辣字，牛脷亦夠腍入味，推薦~ 不過唔食得辣既最好都係叫小辣，呢款咖哩都幾勁下架我最like係可以加10蚊有一大碟沙律菜，唔係只得肉肉肉，fresh d......佢俾你揀雜菜同沙律菜，個人覺得沙律菜望落醒晨d，雜菜未試過但望落有d清淡臨尾仲送粒雪米糍仔俾你，幾有誠意美中不足係店面太細，得幾張枱，多人等位時最好都係叫外賣，同埋睇落係小本經營，有時出菜慢少少，但整體都好滿意，主要係抵食

行過見這間袖珍餐廳,只有十多個位置,然而食品製作十分用心,而且超值魚柳意粉:意粉調味及炒過,十分細心,魚柳亦香脆可口,醬料惹味五色咖喱薄餅:正!有特色加$10有機菜沙律,新鮮大碟=)炸三文魚腩,可吃可不吃

尋晚同朋友試左新開張既王子廚房, 雖然有D遠, 不過真係好好食, 而且好抵,7個人都係食左5百幾蚊.我地嗌左D小食先, 有串燒, 牛柳粒同蜜椒雞翼, 不過唔記得影相個雞翼真係超級好味, 我地食完仲再encore, 串燒同牛柳粒都好好味另外我地叫齊五色咖哩, 有紅咖哩雞, 青咖哩雜菜煎蛋, 白咖哩大頭蝦, 黑咖哩吉列龍利柳, 巴基斯坦咖哩牛坑腩同牛仔膝.極力推介巴基斯坦咖哩, 朋友同我本身都唔太食得辣, 所以叫左小辣, 嘩超好味, 牛坑腩好琳, 牛仔膝好嫩, 我要鍛鍊下, 下次挑戰中辣.除左必食巴基斯坦咖哩外, 個人比較鍾意白咖哩同黑咖哩, 白咖哩好椰香, 配左大頭蝦, 正! 從來未試過黑色既咖哩, 我以為只係係卡通片先有, 硬住頭皮都要試下, 咖哩唔太辣, 甜甜地, 好得意好特別, 龍利柳外脆內軟, 又一推介.下次再黎擦過.

今日下午去荃灣Facial, 早少少出左門口去食搵下有咩食, 行行下發現昌寧中心開左間食5色咖喱, 好入去試下先, 睇完餐牌發現呢度原來出名巴基斯坦咖哩, 不過一陣做Facial, 都係唔好喇, 同美容姐姐面對面, 唔好意思嘅, 試下黑咖喱吉烈豬扒飯先, 四十幾蚊有埋熱飲, 睇下咩嚟都好, 嘩嚟到嗰陣有D返左去讀書時嘅感覺, 塊吉烈豬扒好大塊呀, 好脆同脹卜卜, 咬落都好軟熟, 試埋黑咖喱汁先, 顏色真係黑色完全貼切, 但原來係甜甜地, 仲有香蕉香味, 好得意, 加埋吉烈豬扒個味好夾, 不過美中不足係要自己切塊豬扒, 有D煩, 不過味道搭夠. 下次要試下巴基斯坦咖哩先, 見到貼係牆度嘅相好靚. 平時無寫開食評, 但見到廚師老闆用心經營, 同食物味道創新, 服務OK 試下寫下推廣下

尋晚同朋友兩個人係E度食 dinner, 望到4款 set dinner 都好抵, $4X 左右有野飲, 坐咗入去先發覺完全唔岩食. . . 款式太少啦散叫menu上既野食: 咖哩薯仔飯同黑咖哩雜菜煎蛋飯. 兩個飯既送都唔錯，係佐敦吳松街巴基斯坦咖哩既港式版- 平好多同少少少少少辣，雖然撈住飯食到最後都有D辣，但同個D成層油係面既沒得比，不過都幾岩我地香港人口味。黑咖哩雜菜煎蛋飯視覺震撼都幾大, 但沒咩味，完全唔辣又唔咸唔甜，勝在蛋煎得靚菜夠多，不過未試過都可以試下=P咖哩薯仔飯係正常既黃色咖哩,好好味呀! 洋蔥薯仔都好入味，個笑係俾佢既!P.S. 下次去試紅白青咖哩! 

(820)荃昌中心的昌寜商場小型食肆都幾多，最近又有一間新食肆開業，下午茶期間，便來了這店試試。原來這裡是馳名咖哩的，所以選擇了餐牌上的咖哩牛腩撈公仔麵，誰不知牛腩已經售罄，幸好還有牛筋，就咖哩牛筋撈公仔麵吧！牛筋炆得不算軟腍，Johnny 不喜歡太腍的牛筋，這裡的口感煙韌是挺喜歡的，咖哩是巴基斯坦的味道，辣味不算勁都幾香，吃到還有些紅腰豆，軟腍好味。公仔麵有點濕潤，沒有過腍，混合了咖哩汁，味道不錯的。飲品選擇了凍好立克，這裡很少冰，不夠凍，不甜，忘了下糖吧！不過味道都ok。這店之前曾經為Sweetie Home 、心甜及一品香雲南米線，其後又轉過其他食肆，到今天的王子廚房，努力加油吧！