源記甜品小食

营业中

休息中

還以為是從前“西環正街”的源記，真是非常失望，是我食過最難食的合桃露和杏仁露！彷彿只是甜的米糊開出來，合桃露沒合桃味，杏仁露沒有杏仁味，真是失望到我要花時間在這裡惡評，大家千萬不要中伏！！！

我哋等咗差唔多27分鐘，一碗甜品都出唔到（我哋叫咗兩碗，加湯圓，再加一碗外賣）。送到出嚟嘅時候，又出錯。喺呢27分鐘期間，看見同一個職員送甜品比其他客嘅時候，keep 住問每一台係咪你哋㗎⋯⋯啲客話唔係。都唔明點解佢唔睇吓將單🙄⋯⋯最搞笑有一台客都未落單，佢就問呢碗甜品係咪你㗎🙄⋯⋯仲要呢個客遲嚟過我哋成10分鐘，佢已經有佢嘅甜品食先過我哋。由我阿嫲個年代就已經幫襯正街嗰間（我個小朋友都好鍾意食嗰度嘅杏仁茶），自從COVID之後，正街嗰間就執咗。諗住今日同我老公一齊去懷緬一下，點知就令我好失望。我諗我會唔再去咁遠試呢間，根本同之前嗰間冇得比😭😭😭我哋根本就冇試過呢度嘅嘢食，就好嬲走咗，所以please ignore the taste rating

西環源記聽左好耐，一次都未試過。而家開來天后，試業期間即刻試下。叫左杏仁糊、合桃露、芝麻糊，滑無渣，但係好稀淡味，整體無驚艷感覺。天后好多勁糖水舖，做中式糖水既養生糊又平過佢，又好味過佢。對面街仲有名店甜姨姨，有點懷疑源記係咁多高手附近做唔做得住。

我哋叫咗兩碗芝麻糊同桑寄生蛋茶，芝麻糊佢哋應該可以考慮改名叫做芝麻水，碗湯水好稀，同一啲芝麻味都冇，另外一碗桑寄生茶都係同一問題完全無味，我懷疑係因為唔夠賣，所以加水可以賣多幾碗。但亦都可能係因為新開試業嘅關係，需要時間調整質素。但作為老字號掛得太公石塘咀正街源記嗰招牌，都應該首先自己做吓品質檢查先開業，唔係用返以前嘅名同啲碗碟器皿就可以。老實講，啲味道和質素同以前太公嗰間爭好好好好遠! 以前賣得貴但好食，都會繼續幫襯! 希望太公後人可以用心去繼續經營依個招牌!

以前喺西營盤經常都念念不忘，食完飯都要去源記買碗桑寄生蓮子蛋茶，佢獨特之處有3方面:1茶無苦澀味,2蓮子鬆化3蛋有焦香味。但一個疫情，令世界好多嘢都改變咗，而喺新聞得知源記無聲無息咁執笠，都幾失落，之後食過其他糖水舖嘅桑寄生蓮子蛋茶，之後去其他糖水舖都食唔到呢個水準嘅桑寄生蓮子蛋茶。喺2024年11月29號，睇FACEBOOK知道有間叫做「源記甜品小食」嘅舖頭試業，資料顯示都係主打桑寄生蓮子蛋茶同清蛋糕，抱住極大期望去試吓。同以前一樣，門口賣雞蛋糕餐牌多咗幾款小食內櫳裝修簡約，企理光猛要食一定試匀蓮子加蛋蛋一樣係浸到入晒味，仲有茶葉蛋嘅焦香一睇嘅套傢生就知係以前源記先有一試就知，用番以前嘅配方，而且新人事新作風，侍應姐姐禮貌周到，唔似以前班串串貢嘅舊伙記。而且新舖座位濶落，食嘢都舒服好多。好開心傳統老店得以重開，味道不變，又多個食甜品好去處。

收到風一間叫源記嘅甜品小食店在天后出現，好耐以前在西環都有間，不過消失咗⋯咁啱啱在炮台山睇完中醫又未諗到食乜，就去睇下乜環境。環境好光猛，有卡位也有圓檯圓櫈位，時間未夠七點，未到食甜品時間所以店內只得兩三檯各一二人的顧客。本來想食合桃露，但話賣晒⋯咁再望望話蓮子桑寄生蛋茶係鎮店推介，諗住叫一碗⋯在食過幾間甜品店好多時桑寄生蓮子蛋茶係一體化，但原來這家不是。這兒係分開三個項目的，淨桑寄生茶$32，要桑寄生蛋同普通蛋不同的，各$8，如果要蓮子另加$8，所以三樣有齊即係$48一碗。所以諗過度過都係唔要⋯簡單啲試下芝麻糊，就可以知間糖水店得唔得！一上檯⋯望色就覺得唔夠烏黑⋯未食只係用匙羹「不」起，啲色已經知唔得，食落⋯好稀薄無芝麻味，淡而無味，得甜味！我內心掙點扎好一陣⋯$32我食一啖真係好貴，但無乜營養嘅話再食都係浪費quota。芝麻糊完全唔掂⋯ 最後只係食咗4匙𡙡我就放棄！食咁少之後都覺得有啲「確」喉⋯

剛巧经過銅鑼湾，見到源記，即入，新店坐得很舒服，有卡座，糖水不太甜，好啱食，又潤。所有兒時回憶返哂黎。試业中，要收cash,老闆娘很健談，服務不错。源記依然保持水準