海港薈

营业中

休息中

這間酒樓的食物不好吃，總之不對我胃口、不是我那杯茶，服務也強差人意! 😤叫了五款食物，包括招牌燒鵝飯、五彩繽紛、沙薑豬蹄粒、黃豆醬蒸魚雲和流沙煎堆仔。流沙煎堆仔漏了單沒有來。除了黃豆醬蒸魚雲味道可以，其餘食物都不好吃。五彩繽紛賣相還可以，但味道好一般。沙薑豬蹄粒完全沒有沙薑味，只有酒味。招牌燒鵝也不好吃，肉既乾皮又韌。服務態度及質數有待改善，員工好像很忙，至少叫了數次才有人理會，就算有員工應你，但就話自己很忙，叫你找其他人，而且語氣也差，好像欠他錢沒還一樣! 😤😤

第一次來這酒樓飲茶，一行7人分兩枱，但體驗極差，不論經理、侍應及傳菜的服務態度均非常差，落單錯漏百出，將別枱的單落錯我的一枱，當我們表示食物不是我們落單的時候，不但沒有一句道歉，還諸多藉口，埋怨茶客不應合單點菜，但其實是他們自己合單的！將自己服務流程出錯的責任推落客人身上，離晒譜！我和家人一定不會再光顧！

食左3次， 食物其實好OK， 但係服務就好一般啦！✅五彩繽紛， 每樣一件， 可以試多啲嘢，讚！✅鮑魚燒賣, 流沙包、豆苗餃， 蝦餃、黃金糕全部好味！ ✅紅棗糕, 少甜, 好香紅棗味! 熱辣辣, 柔軟✅蘿蔔絲腸粉， 裏面蘿蔔春卷好香脆 ✅$29.8 燒鵝米線抵吃，唔記得影相❎點左五樣點心，職員入機只係入咗四樣❎然後四樣裏面。 又有一樣係漏咗冇黎❎約25分鐘左右追第一位職員， 只係print 張電腦單我哋👀，hea 答話電腦入咗即係有❎再等15 分鐘左右， 再追第二位職員， 今次佢有認真追， 就發現原來真係漏咗單❎再等多15 分鐘左右，未來，再追第三位職員， 佢竟然唔該我哋耐心等候， 話蒸緊❎最後3:55 「五彩繽紛」終於上枱， （我睇返電腦單， 係2:55落單） ✅ 嚟呢度飲茶， 可以訓練你嘅耐性👍🏻

呢間咁嘅垃圾，服務態度極差，所有員工無一個有禮貌，等位唔洗攞飛架，同個帶位熟d就等一陣就有位，然後嗰d所謂著黑衫嘅唔知係部長定經理，全部都經過而不理，仲要話客人點解點心紙唔寫枱號，佢地好忙架喎，唔寫我地d客人會無野食架喎，呢d係客人嘅責任？我出埋你份糧好唔好呀！食物更加唔洗講，真係難食到嘔，初初開係幾好食嘅，越食越難食，煎堆凍嘅，就算熱都係翻熱，鮮竹卷d腐竹『叔』嘅…叫人點食落口，唔肚痛都偷笑喇…更加唔洗係佢公司投訴佢地，因為佢青衣城班人自己打番電話俾你去解決問題，仲要你話番d客人唔啱，好去投訴佢地d員工，勸其他人唔好去，食完背脊骨落呀

喺青衣新開張到而家，前前後後都食咗幾次，有去飲茶嘅、食晚飯、外賣晚餐，每一次都好滿意，而且價錢又唔算好貴，服務態度好好。飲茶：佢啲款式都算多，而且叫嘅樣樣嘢食都幾好食，唯一一樣覺得麻麻地嘅就係心太軟爆，味道唔似朱古力仲有一粒粒嘅口感，唔知係咪花生，每次我都係飲菊花茶，淡淡的菊花味好香，不過如果再加水入去沖就冇乜香味晚餐：每次都係食二人套餐，無論喺酒樓度食定係外賣都一樣咁好食，食物保持到水準，堂食嘅話佢啲擺設好靚，睇得出好有心思同埋係行有少少高檔嘅路線，侍應禮貌非常之好，好勤力幫我哋換碟。外賣攞到返屋企食物仲係好夠熱，條魚好大條仲好嫩滑，份量唔會因為外賣而減少過往青衣冇乜有返咁上下質素，價錢又唔貴，款式又多嘅酒樓，希望可以一路保持到水準！

由新開張開始。 我一值跟進佢的外賣自取服務。疫情之下。 大部份青衣城食肆都容許。 打電話落單。 然後付款自取架啦。今日終於比我望到～ 即刻落定order 到時到候搵人攞貨😌 方便晒！ 🦞上湯龍蝦伊麵！ 最近澳洲龍題蝦當造， 148$ 一隻 ， 真係忍唔到口架！ 澳洲龍蝦爽口鮮甜！ 沒有霉味或者太熟。本人最怕龍蝦尾overcook 似擦膠！請不要用波士頓龍蝦做比較！ 絕對係唔同層次lor. 上湯伊面就差小小。 個上湯稀左小小。不過算啦。龍蝦送伊面。 送的仲想點？🐷黑豚咕嚕肉。48$ 大大份。好味。 低食。 配菜好足料。可惜冇骨。🤭 🐟 酸菜魚～ 148$ 原本諗住得幾舊魚肉。 點知原來入面有成條魚！ 搵得返魚頭魚尾魚鮫。配菜瓜同粉皮都齊料！ 大大碗好底食！海港薈呢～ 勝在海鮮真係平靚正！ 街市都未必買到的價錢， 但係煮埋比我食！ 利申一下，我冇股份😂

今朝飲完佢地既早茶諗著都還可以，就趁住限聚令前同2老去試埋個晚市，一入到去已經見到得幾台客，心諗唔通野食唔掂，不過橫掂都黎左就試下喇，首先叫左個燒鵝＋豆苗孖寶，黎左燒鵝半個鐘都未黎個豆苗，催下幫我地落單個位經理，佢重好似發緊夢咁望著張單唔知咩事咁，極度懷疑佢冇落到單，最搞笑係個菜單上面寫著半隻乳豬幾多錢，落單個時同我講無得叫半隻，佢同我講賣晒我都冇咁嬲，佢竟然話你叫左半隻邊個黎食埋個半隻！？之後多口又問下另一位同事係唔係半隻唔賣嫁，佢話係呀唔賣嫁，你真係好想食就要搵經理落單先得，我話岩岩個個未經理囉，佢又答我我地依度個個都係經理，你要搵最大個本店經理，個下真係O晒嘴，最後埋單個時收銀檯大大個支付寶Hk貼紙痴係度，佢答我冇支付寶付款方法，其實我係唔係可以搵海關告佢商品說明條例呢

今日下午我們喺青衣城食完個下午茶之後，諗著距離原定約咗食晚飯嘅時間仲有兩個鐘，所以我們就喺商場內行吓，行到去三樓，見到原來「海港薈」喺呢度開咗間新分店，所以我就即刻打電話取消原定去嘅拉麵，改為去「海港薈」食晚飯！一坐低，店員就問我們開邊款茶嚟飲，我們就同平日一樣，都係揀普洱！但店員就話唔駛急選擇，可以出去茶葉專區睇吓，之後再慢慢選擇！我們見到喺茶葉專區度擺放咗十款茶葉供人客選擇，包括有大眾化嘅普洱、鐵觀音、香片等等等等⋯⋯但仔細再睇就連大紅袍、龍井、碧螺春都有，我們就問店員係唔係每款茶葉都唔同價錢？店員話無特別另加收費呀，祇係收每位人客茶錢價錢！感覺真係好優惠呀！而且仲好有心思咁用個心形茶壺座，一直用蠟燭熱著個茶壺，可以等人客就算一邊用餐都唔怕啲茶會擺放到凍晒，隨時都飲到熱茶，真係值得一讚呀！喺我們未諗到想食咩嗰陣，我們見阿拉斯加長腳蟹做緊優惠價，所以我們就叫咗一隻清蒸嚟食先，一如往常蟹肉非常鮮味彈牙，蟹膏相當甘香軟滑，所以我就突然諗到將啲蟹肉同蟹膏用嚟撈白飯食，食落啖啖蟹肉蟹膏，真係超正呀！但喺我們食到一半嘅時候，突然有位靚女店員好親切友善咁問我們係唔係好鍾意食蟹？我們話係呀！於是靚

今日星期六，黎新開嘅海港薈飲茶。都幾多人等位，冇得網上攞位，等餐懵。一坐低屋企人就話張凳唔好坐，因為比較細張，飲茶張凳唔好坐真係死穴。啲茶幾好味，唔係有顏色水，真係有茶味，而且會用一枝蠟燭一路暖住，唔使飲凍茶。叫咗好幾樣點心，我認為最好食嘅係芝麻流心煎堆仔，煎堆好鬆脆，唔似其他酒樓嘅咁韌，芝麻亦都比較流心。其他嘅點心質素一般，釀茄子嘅茄子完全冇味，係靠外面啲汁，而且釀嘅肉比較少，感覺比較小氣。黑金流沙包質素麻麻，包一啲都唔香，食落去成舊粉咁樣，流沙餡亦都好普通。鮮竹卷都幾過分，個外皮完全冇炸過，似腐竹雞蛋糖水嘅腐竹，軟林林，裏面嘅餡料都唔紮實，非常鬆散。燒賣比較細粒，又係軟林林，完全冇彈性，係咪師傅唔記得撻啲豬肉餡？總括來講，環境幾開揚，但係就唔好坐。茶幾好飲，但係點心麻麻哋。