泰.夯蝦 (堅拿道西) (已結業)

上網見到有介紹， 就黎試下， 點知限食2小時真係唔夠時間…… 可能我地食得慢，又同朋友傾下計……冇蝦可以叫員工fill蝦……員工見到有死蝦， 都會撈起既， 有d蝦都算大隻。

愛海鮮既我當然要一試任食燒蝦啦! 地方雖然不太大，但食物味道不錯，新鮮大頭蝦放在座位旁水槽任你揀，紮紮跳，唔洗驚仲有筒冰水比你浸暈佢先燒!侍應服務又一流，食7:15兩小時任燒雖然趕，但可能夜場乜人訂位，無追我地走，仲比另一個位置我地切蛋糕，超讚!記得要食雞翼，好入味!

限聚令放寬，諗住開開心心同朋友出去食餐好，一早預約左呢間嘢食燒流水蝦，點知食到火都嚟！無乜心情影相，得兩張相。個爐唔夠熱，啲嘢食燒好耐都唔熟，呢排又有咁多病菌，啲嘢食唔熟點敢食呀？問個職員可唔可以轉爐之類，佢話係咁架喎。態度勁差，幾百蚊位，食唔到嘢仲要受氣。我勁肚餓，望住啲嘢又唔熟，得個兩個鐘，燒極都唔熟，點食啊大佬，我唔想肚痾。心情好差你睇下，蝦勁易熟架嘛，都可以得個尾有少少橙，啲扇貝啲水滾都唔滾下，個殼dd燶都冇啊，你就諗到個爐係幾咁弱。大佬你85折左都幾百幾蚊位架，咪同平時啲價差唔多，得兩個鐘我食得少少嘢，肚餓住咁走，我食放題都唔洗呢個價啦。成肚火咁走，無下次！

咁啱朋友嘅更期可以日頭出嚟食嘢，見到呢一間做緊個特價88加一 90分鐘~人就唔係好多始終可能因為係下午， 飲品雪櫃係放題任飲， 亦都有雪糕任食，試咗冬陰功就偏淡少少~但味道正宗嘅， 啲蝦片就一流呀，燒泰式香腸冇影不過好食， 咁仲有咖哩魚蛋同燒賣嘅~ 但係就冇咩人試…相信同太飽肚有關，所以我都冇試~ 有三種味道嘅shake shake海鮮可以揀，但係揀咗就只可以 keep住食嗰種味， 冇記錯轉味就要加50蚊， 海鮮新鮮嘅~ 都幾多大頭蝦仲有鮑魚， 都有好多菜同埋少少薯仔，我覺得以飲食角度嚟講係平衡飲食； 90分鐘有少少趕~都食咗四轉， 呢個價錢下午茶都抵…

特別推薦大家✅午市任食海鮮桶90mins《午市任食海鮮桶》熱辣辣嘅海鮮會倒係你面前❤️，有三種醬汁口味，建議揀⭐️泰式拉差達甜辣醬，Ho Fresh輕微辣，味道唔會好濃，唔會掩蓋海鮮嘅鮮味😛海鮮桶包含多種海鮮同蔬菜🥦🌽，大頭蝦🦐 勁多蝦膏、肉質彈牙，鮑魚軟身有鮮味，不過就得一舊😂，蜆、青口、元貝食落都好新鮮仲可以出去任攞野食😍😍記住要食泰式春卷、蝦片、炸蝦、酸辣鳳爪、海蜇、台灣腸、榴槤雪糕🤤不過每樣試下就得😌主要係嚟食海鮮架💰$128 (Adult)💰$88 (Children & Elderly)*海鮮桶係要食完一桶先可以再添加🗣，加$50可以試多一種醬汁口味(美式卡邦尼芝士醬 / 韓式甜柚子蜂蜜醬)，加$138就可以追加波士頓龍蝦🦞**唔好睇少個海鮮桶，食落都好飽下🤰🏻，唔好浪費食物😌***有海鮮桶take away🏠

開業價$88任食海鮮袋的確吸引。預先book位，去到先付錢後食，坐位都舒適，感覺幾好。飲品任飲，選擇都好多，值得一讚。小食方面，只有幾款，台灣腸，咖哩魚蛋，炸薯角，炸魚蛋，冬蔭功湯。不過以上各款小食係好耐都唔refill，基本上好快夾晒，好耐都無出食物，同無小食差唔多。雪糕任食，正常口味。最差就係海鮮袋，等左30分鐘先黎第一袋，仲要無蝦，大部分係菜，菇，三色椒，薯仔。有一兩隻青口，蜆，2隻扇貝，雞翼，魚蛋。海鮮袋會唔會係咁呀？之後再等半個鐘再黎第二袋所謂既海鮮袋，其實又係菜。之後就話夠鐘要離場。$88就算啦，但如果正價，你食埋我果份。

疫情關係已經好耐無試過堂食，咁啱呢間銅鑼灣分店剛開價錢吸引就去試下，$88蚊加一海鮮桶任食。去到發現都幾多人，而且3點打後都一路食一路有人入，要讚的係佢的蝦好新鮮又有膏，好好味。2個醬汁都好配海鮮，最值得讚係食完一輪可以比換醬汁，咁就可以試曬2款，泰式甜酸同芝士。廣告話有魷魚，青口，鮑魚，完全無見過。。。。。。一包先得每人2隻蝦同蜆，一隻扇貝同勁多蔬菜。食曬d蔬菜已經食飽。問左之後話因為1點已經無曬食材，所以都係剛剛去買。佢14號開業，我去食係15號第一個星期六，12點開門1點已經可以無曬食材，咁佢個預測同管理能力都幾差下。小食refill得都慢，去到差唔多走先出冬陰公湯。。。如果要正價肯定唔會再試。