泰太廚房

营业中

休息中

見今個星期六天氣涼涼哋，走咗入大尾督食泰國菜，晏晝入咗去行吓，已經去咗呢度留枱，因為望出去對面個湖好舒服好似泰國。叫野食叫左個湯，生蝦，咖喱包，菜，炒粉。冬陰功湯，細嘅分到四碗，蝦都好大隻，好肉地。生蝦刺身，砌得好靚，透明蝦身，新鮮非常！泰國椰菜苗，比較大舊，唔易食，蒜蓉炒沒特別可以唔叫。咖喱麵包焗蟹肉，麵包脆，好多蟹肉，店員會幫你切開佢，呢個必點。蛋網炒貴勺，甜甜酸酸，唔錯。原來仲可以叫隔離越南菜「湖越」食物，我哋叫咗兩碟米紙卷試下，都好正，大大件，好清新。最後唔知點解有甜品送，都不錯，服務質素都幾好，好勤力加水。

朋友介紹之下一早預約咗呢間泰國菜，留咗室內位置，但係我哋唔記得咗訂乳豬，呢間嘢價錢偏貴，但食物質素中上。泰式小食拼盤：有蝦餅，魚餅，蟹鉗，雞翼，春卷仲有咖喱角，都好豐富。炭燒豬頸肉：喺出邊有泰國師傅炭燒，當然好惹味。海鮮沙律：呢個辣得制，如果唔食得辣落單時記得同佢講小辣。泰式乾炒牛河：呢個真係好似泰國嗰啲地踎小店炒出來嗰啲河粉，好友鑊氣好正，最後仲打包左個聽朝返工食。泰國椰菜苗：呢個偏硬身，都正正常常。可以帶多d人黎試下，野食都幾大份

難得同朋友入大美督，行幾步就到泰太廚房，原本諗住位置比較方便就試吓泰式餐廳，點知真係火都嚟，一開始入咗被告知比較多客，剩返出邊樂天位，我哋都好理解繁忙時間，但呢間嘅服務態度認真數一數二。由落單到開始就bad feeling, 我哋改咗三次，首先有人應，因為隔籬枱先我哋就俾佢先落單，點知佢落完隔離就完全唔理我哋，然後又係漫長嘅舉手環節，呢位侍應都係叫我哋等等，終於落到單，佢又要我哋落Number俾佢，啲Number佢又唔係熟晒，我哋都算。等咗20幾分鐘先嚟咗一碟餸，等得耐唔係問題，放低啲嘢望都唔望就走咗，大佬筷子叉碗呢？呢間餐廳係咪要用手食飯？遲過我哋入座嘅人都已經食緊嘢，我哋淨係望住疊嘢，點食。我哋再次舉手，佢掂行掂過，當啲客冇到，舉咗三次數都冇人應，最後我哋真係頂唔順就決定走人。作為顧客我地唔要求你地餐廳有咩服務，但最基本嘅態度你地都冇，當然等唔係問題，問題係餐具呢啲係咪最最最基本嘅，點解都咁麻煩，我地係黎食野，唔係黎受氣。希望貴餐廳檢討服務態度問題，特別係圖中男侍應！真係好冇禮貌！希望你地重視呢個問題，提供優質泰國美食同時俾顧客有更加好嘅餐廳體驗。

今日入到去大尾督食泰國菜，呢一間想試好耐，預早一日book位，要坐室外位置，雖然有點熱，但係幾好環境。先講食物，一早book咗一隻炭燒乳豬，我哋嚟到7:00，都要等到7:30先有得食，可能廚師比較忙，因為當日都幾多人，隻乳豬皮好脆，唔同中式個D，肉好林好濃胡椒味，好正！另外叫咗個咖喱，普普通通，蠔仔蛋，超多蠔仔好脆👍🏻👍🏻，另外侍應話可以叫隔離越南菜食物，我哋叫咗個越南春卷，都唔錯，不過要埋單先，最後侍應送咗個芒果糯米飯俾我哋，埋單$1400，4個人差唔多啦！

經朋友介紹嗰啲下，一星期前已經訂枱，我哋一行15人坐室內位置，預早安排將枱切成正方形方便我哋坐，室內位置有冷氣，不過室外位置有環境啲。預先訂咗一隻乳豬，佢哋會斬埋，但係我想吹蠟燭先，所以叫佢哋唔好斬。乳豬皮脆肉嫩，我哋15人食啱啱好，仲可以叫多啲其他餸，有冬陰功湯，咖喱蟹肉麵包，菜，海鮮，少少炭燒食物，上菜速度好快，啱晒好肚餓嘅我，這要講下個咖喱包，侍應幫我切開時，咖喱爆出，好creamy，滿口蟹肉落足料，最後侍應仲送咗甜品俾我哋食，個芒果糯米飯有生日牌，呢間泰國菜味道，環境，服務都唔錯，埋單$4200，真係捧住個肚走。

今日同朋友慶祝生日，合共六個人訂咗泰太廚房，去到都幾多人不過仲有位，打開餐牌超多嘢食，價錢中上，不過原來份量都幾大。頭盤嚟咗個生蝦刺身，新鮮辣汁正。之後嚟咗個生菜包，份量好多，辣味適中，非常好味。之後嚟咗個炒芥蘭，無咩特別，都係份量多，$90一碟。沙嗲串燒雞肉，呢個普普通通，不過個沙嗲醬好香花生味唔錯。之後仲叫咗個咖喱大蝦，不過我冇影相，因為個陣電話冇電，個份量超大夠哂6-8人食。最後店員見到我哋同朋友慶祝生日帶咗個蛋糕，都送咗個芒果糯米飯俾我哋食，呢度仲要唔收切餅費，不過呢度啲份量都起碼六個人起先可叫多D。

見OpenRice個個食評都咁正面，影相睇落咖喱包又好正，就試吓啦…閒日7點幾去到，諗住唔係假期，少人係正常啦…呢個想法太天真🙄叫咗咖喱蟹肉焗麵包、沙嗲串燒，本來想叫酸辣魷魚筒，但落單時介紹炭燒魷魚筒更好味，又鮮甜，咁就試吓啦！▶️咖喱包初初食個面脆嘅都唔錯，包底吸咗啲汁，淋晒😓咖哩都係普通茶餐廳質素。唔抱期望，感覺會好啲！▶️沙嗲串燒好dry，唔容易咬開。每人食一串已經想放棄…▶️炭燒魷魚筒，呢個真係最垃圾！上枱已經唔熱，食落無味，失敗到相都唔想幫佢影…千祈唔好聽佢介紹，實係賣唔出先要head sell 3樣嘢，加兩杯飲品，埋單七百

與朋友介紹吓入去大美督試吓呢間泰國菜，我已經一早訂咗枱，當日星期六我6:30去到，都已經超多人，我們三大一小坐入邊，冷氣超勁啱晒我，因為我哋去完沙灘玩當日40度真係超熱。我哋叫咗幾樣食物，有蝦醬炒飯，有青咖喱雞，小朋友話想食咖喱包，於是嗌多個咖喱，仲有個菜，蝦餅同埋湯粉。收得咁嘅價錢份量真係俾返咁上下你，好足料，隔籬枱枱都八個十個，我哋根本食唔晒啲嘢，都要打包走，炒飯有鑊氣好香，青咖喱雞都好多雞肉，個咖喱包小朋友都食咗四件，滿滿蟹肉，蝦餅彈牙無偷風減料，炒菜正常，唯獨是個湯粉麻麻哋，太多粉啦索哂水，最後係呢個冇打包，其他都非常好味。順帶一提佢而家有1$杯龍眼冰解渴一流埋單$800合唔合理，見仁見智。

今日試下呢間泰國菜真係好有驚喜，餐牌豐富，我地得兩個人食得唔多，叫左個生蝦刺身，豪華冬蔭爐魚片，一個清湯豬手煲，呢兩款我係其他泰國菜館都無見過。先講生蝦刺身，個名叫新鮮，問經理佢話全部新鮮貨，食得出爽口彈牙，非常新鮮，透明蝦身，點埋個綠色酸辣汁，實在好似泰國無緊！豪華冬蔭爐魚片：湯惹味酸辣，湯撈飯都一流，魚片無骨，份量多。清湯豬手煲，未試過，成隻豬手煲都係啖啖肉，索哂湯汁惹味非常，我地兩個麻甩佬食到超飽，份量足夠，味道近似泰國，會有下次。

今日星期六諗唔到食咩，遊車河去咗大美督泰太廚房試下，入門口見到環境幾好，我哋兩個人食唔到咁多嘢，都係要多四樣餸，有泰式蝦春卷，沙嗲串燒雞肉，仲有新鮮生蝦刺身，不過店員話得五隻，俾咗半價我哋（原本係有八隻），同埋泰國椰菜苗。先講吓蝦春卷，啖啖肉，蝦膠豐滿，其實呢五條野就已經夠飽哂😂泰國椰菜苗，無咩味，太清新，菜有D老生蝦刺身：非常新鮮爽口彈牙，酸辣汁勁正沙嗲串燒：雞肉嫩滑，沙爹汁滿滿花生第一次嚟大美督食飯有驚喜，下次會多啲人過嚟

其實呢間泰國菜我都食咗好多次，咁多年未到始終如一，尤其是咖喱炒蟹同埋炭燒乳豬，開始以來我都係必食。今次唔同屋企人去，介紹個朋友食呢間，佢哋都一致讚好。首先講吓環境一落車佢哋已經話好似去咗泰國咁，門口一部篤篤車，人山人海，最好訂咗枱先好嚟。炭燒乳豬：唔使講呢個招牌菜必食，雖然在泰國未見過但餐牌寫明是在泰國曼谷帶過嚟，又俾更多香港人試吓，皮脆肉嫩，點埋酸辣汁好惹味。椰香咖喱炒蟹：時價七百，蟹有斤幾重，新鮮多肉，又多咖喱汁，四個人都清晒仲打包汁走，一致好評。另外仲有炭燒串燒在門外炭燒，聞到都香。柚子沙律：正正常常咖喱蟹肉麵包：唔使拆蟹，淡淡蟹肉，非常美味，不過我喜歡拆蟹多D。

朋友在大埔新居入伙，當然上去痴餐，佢話呢間泰國菜好食同免費送外賣，咁一於試下啦。我地叫左唔係好多野食，叫左個泰北冬蔭雲吞雞湯，唔係橙色，酸酸辣辣，同冬蔭公湯有別，個人比較喜歡橙色個隻，不過呢個都好飲。炭燒豬頸肉，好juicy，送到來仲熱辣辣好香炭味，正！泰式椰菜苗，不過不失，比較硬，味道ok。馳名冬蔭爐魚，呢個好正，魚無骨，冬蔭湯酸酸辣辣，之後仲加個白飯撈，好出色。炸蝦餅，正正常常，好實正好彈牙。呢度埋單500都唔貴，送埋貨都算抵啦

今晚揸車入嚟大美督，架車未泊低已經見到煙霧離漫，相信係呢一頭唔少嘅泰國餐廳同燒烤店，最近啲生意都好返啦。無獨有偶，我兩次嚟都有嗌燒烤食物，都係呢一度最佳嘅出品。嗌咗炭燒牛仔骨，我喺外邊食好多牛仔骨都韌到不得了，唯獨係呢一度，係真正嘅名火炭爐上面燒，見到佢餐廳正門放咗個大炭爐，由一師傅處理，就對呢度嘅燒烤食物好有信心。好細心，咁幫你切開左啲牛仔骨，肉質鮮嫩，係啱啱熟嘅狀態，而且仲有一陣陣嘅炭燒香，調味唔重手，唔點醬就食到香料嘅味道，點佢酸酸辣辣嘅肉醬之後令到肉味更加突出，上品！蛋包泰式炒金邊粉，不過不失，咁靚嘅蛋包先聲奪人，切開入邊係飽滿嘅金邊粉同大蝦，屬於正常水平，唔會太鹹，亦都唔會太辣，最貼身嘅係佢加咗砂糖喺隔離，俾你食到一半嘅時候撈落去，令到金邊粉嘅酸味更有層次。自己啲蝦就……一般啦，都唔會期望係新鮮。最後就係椰子雞湯——泰式椰子雞湯，果然係酸字行頭，我個人認為佢太稀，而且用嘅係普通雞柳，略嫌未夠入味，感覺上唔係用新鮮嘅材料煲咁⋯⋯雖然有香茅、辣椒、香葉等等嘅香料味道搭救，但係椰子味唔太重lah…. 最後講吓環境，作為大美督最入嘅間餐廳，有有proper嘅泊車場算係唔錯，坐戶外嘅話

一直都係依間泰國菜嘅忠實粉絲知道佢哋有新嘅菜式必須嚟試吓🥰咁當然我每次嚟到必要嘅一定係生蝦🦐一定新鮮、一定夠凍、汁又香😋真係一個人都食得晒❤️今次試咗佢哋嘅新菜式冬陰功鱸魚👏🏻👏🏻因為我哋今日兩個人嚟食，又唔夠膽叫咁多嘢本身想叫冬陰功飲，但係又怕太飽，因為又要飲酒，所以就淨係叫咗依個魚估佢唔到咁大兜冬陰功湯🫢🫢🫢真係一石二鳥👍🏻👍🏻👍🏻又有湯飲又有魚食，仲有🍄同菜仲有好多香料檸檬葉咁樣超香超甜超正直程想叫個白飯撈嚟食咁嚟到一定要識炭燒嘢啦今日揀咗個豬頸肉，一定好食㗎，佢啲炭燒唔會唔好食叫多個飛天通菜有啲塞始終健康啲其實我哋兩個女仔已經好飽，不過都係叫多份串燒冇辦法㗎，見到隔離食得咁香自己都想食食唔晒咪打包囉其實氣炸鍋飯都好好食，但係其實我都食晒先走🤣🤣🤣佢好似仲有其他新嘢，好似火山骨、冬陰功pizza、紅咖喱魷魚蝦球等等登登我都唔記得啦食完今晚已經約緊朋友食吓一餐🤣啲嘢咁大碟我都食得晒，睇來我對好食嘅嘢係冇抵抗力💪🏻💪🏻💪🏻

公司有提供渡假屋玩，就當然要試下，係疫情之後先開放比大家玩😎 今次揀左大美督的渡假屋，抽中左頂樓個層，開心🥳走上天台BBQ都好方便😎第二日既早晨，就係附近找找有咩餐廳，見到間環境幾好既,好有泰國風味，出面仲可以泊車👍👍 而且天氣又唔係好熱唔太凍，好適合坐戶外chill😎因為係我地既早餐所以叫既野又唔可以太過辣😂所以就無叫冬蔭公湯，叫左個椰子雞湯，好好味呀，好補暖☺️咖哩泰國菜係必叫喔，佢地唔會太咸，好啱我口味😋野飲方面原本好想叫佢的泰式奶菜，點知佢話暫時無得供應🥹 唯有叫個泰式咖啡，都好好飲👍連我唔飲開咖啡都鍾意飲，另一杯想試下佢個薄荷味咖啡☕️要提提大家唔好點，好伏，佢既薄荷糖漿好甜😫其他所有都好好