樂湯雞麵館 (庇利金街) (裝修中)

先叫胡麻酱手撕鸡捞乌冬，红萝卜青瓜丝加上胡麻酱点缀，手撕鸡肉够足料连埋红萝卜青瓜丝好爽口，手撕鸡肉系粗身既鸡丝，鸡味亦香，胡麻味十分入乌冬，乌冬厚度适中，又够滑同手撕鸡肉很夹。再叫花胶汤是黄白色的汤头清澈而不油腻，熬出鲜味的鸡黄油，数片大块的花胶爽滑富弹性，更加入咸香金华火腿提鲜，健康又滋润。而花雕醉猪手是道冷盘小吃，冻食嘅猪手一只切成几件，猪手非常入味，而且充满酒香味，啲酒味好香但唔系好浓，猪手咬落带有嚼劲，好有咬口，肥膏位都够弹牙，加上伴随嘅虫草花、杞子都煮过酒非常好味。另外叫咗个凉拌海蜇手撕鸡，份量都几多，个海蜇口感爽滑，个鸡丝亦嫩滑好味，夹埋啲青瓜丝真令人超级开胃。而红油花胶鱼翅饺咬开一半见到入面有唔少既鱼翅，好足料好够味道，亦好大粒，馅料澎湃，有木耳丝鱼翅和肉，真系好有口感。乐汤鸡面馆的豆浆非常新鲜美味，它拥有浓郁的豆香味，口感顺滑，并且没有过于甜腻的味道，这是一杯非常适合作为小食的饮品，而乌龙茶也是非常夹所有美食。这间餐厅主打健康为主，少糖少盐，真是非常正，而且食物质素高，价格又唔贵，我哋都会下次再来食，亦都好值得推介俾大家。…查看更多

前排天气转凉 即刻想食番啲暖笠笠既嘢于是揾埋朋友 去咗食呢间「乐汤鸡」Weekend夜晚去食都唔洗排队 入去就有位不过座位之间就比较逼 叫咗个醉鸡药膳汤面面有得拣米线个d 但我就拣咗刀削面原本系贪佢比较有嚼劲 但呢间面当日就煮得比较淋身醉鸡有酒味 但略嫌唔够嫩滑 有d鸡皮上面仲有毛至于个药膳汤 我比100分入口浓郁 仲有药材既回甘味可以encore…查看更多

宜家做生意真系要够厚脸皮，够无耳心。满心期待自家淆制鸡汤底，点知一饮冇味既（本人平时在家系清蒸白烚走调味多，所以味觉相当发达😉)，饮多啖似系猪骨汤底，即系平时打边炉，侍应一大壶，大方到好似唔驶钱，无限为你加汤，𠮶d罐头猪骨化学汤底，但入面系完全冇猪骨成份既呢...（东张都报过哂）跟手求其加几件鸡落去煮，煮时鸡皮又会渗d鸡油出来㖞，咁就扮到自家制爱心靓汤喇，D鸡仲要切得劲薄，再加2旧仔鱼翅饺，咁就当一个𩠌？ 真系人无耳心，便无敌。白饭得半碗既饭量，侍应话好多人食唔哂碗饭，浪费食物，所以转咗细碗来装，唔够可以添饭的，我非常欣赏佢珍惜食物够环保，但又冇写出来讲明可以添饭㖞？人哋鹌鹑唔敢出声啲人咪食唔饱或再俾钱叫多碗饭啰？ 系咪想侧侧膊博食客唔出声悭返米饭，或者赚多碗饭钱呀？豆浆交嚟既，偏甜，冇特别，冇heart，跟餐都仲要加$9，我唔觉得有平过啰，完全正价价钱。食哂d鸡和鱼翅饺后，食风咁，本人女士，最近减肥细食咗好多，都食唔饱，唯有叫多个醉猪手小食，睇睇下原来有沙姜口味，于是乎就转咗沙姜猪手，侍应话好在未整，否则倒咗醉汁落去就改唔到单... 听到呢句我心里一沉，已知又濑嘢...😑原来系叫咩口味倒咩汁落去，猪手系纯白烚既，我心谂，呀...有料！ 求其到咁，都够姜开食店？ 唔驶问，个猪手结果梗系完全唔入味啦... 都算！ 最离谱系58蚊既猪手其实根本得2旧左右，但碎上扮多... 唉... 结果三扒两拨我又食完碟猪手喇，𠮶半碗份量既饭我竟然仲剩下三分一，完全冇添饭的意欲，因为已经冇哂𩠌... 我终于明白点解咁多人食唔哂碗饭了。😆我今次唔会再蠢多次了，果断卖单！永不帮衬！卖单$155，一个人食，竟然唔饱，结果要再买狗仔粉和碗仔翅先饱，离哂大镨！总结：打边炉罐头化学汤底你够姜卖$90？咁既份量我女仔都唔饱，小朋友可能会饱。 咁hi求其都够姜开食店，全靠大家食唔出。D正评系点嚟？ 大家心里有数啦，有钱真好。D分店点开到？ 成本低，利润高，无耳心真好。…查看更多

正所谓：「落咁大雨，唔通连个天都唔钟意我？」作为落汤鸡，都有食好嘢嘅自由！行街遇著大雨，咪去乐汤鸡转换一下好心情！依间乐汤鸡系佐敦都一段时间，咪以为净系秋冬季先有咁多人捧场，连热到傻嘅夏天都会有人等位就知佢殊不简单！今次同朋友一齐变落汤鸡，除咗会试佢地最出名嘅砂锅花胶鸡外，仲叫多咗个口水猪手。砂锅花胶鸡确实够热，不过味道方面可以再重手少少，食落口真系有啲淡之余，亦都突出唔到鸡味。至于入面嘅花胶，大家当然唔好谂住系咩特别花胶啦，不过都算有一定份量俾大家咬下，而且都煮得唔错，唔会融哂落汤，亦唔会好似咬紧旧胶咁。口水猪手切好一件件上枱，都相当贴心，方便大家食。猪手够腍，加埋够香够辣嘅红油，啱哂钟意食辣嘅朋友。佢仲会送多碗汤，俾大家解辣之余，都唔怕食食下太干。餐厅仲有药膳鸡、云吞鸡选择，钟意食滋补嘢嘅朋友真系可以考虑一下。而家都九月，一于揾埋屋企嘅老人家一齐去食番餐先！…查看更多

人到咗一定年纪就会开始注意身体，所以近年都多咗食药膳。无论系火锅定小菜，香港都越来越多药膳类或者有药材成份嘅菜式！今次嚟到佐敦依间乐汤鸡，除咗有药膳鸡，仲会加入桃胶、雪燕等滋补食材，当中唔少仲系砂锅类嘅菜式，相信秋冬季一定好受欢迎！我就叫咗佢地系menu都推介嘅药膳醉鸡配米线，佢仲可以选配粉丝、米粉甚至刀削面。药膳鸡每只都恰到好处，唔会太重药材味而令到鸡味全失，上面仲有几粒枸杞，成件事食落都够滋补！米线汤底都唔马虎，热焫焫咁上枱，闻到阵味都令人流哂口水！店内环境虽然唔大，枱同枱之间确实系有少少逼，不过香港地少人多，大家将就一下食个补身健康lunch又有咩所谓呢？…查看更多