東京一品拉麵 (已結業)

去到朗屏站唸緊今晚食咩好, 經過依間拉麵店, 個門口好有日本居酒屋feel, 望下個餐牌~又唔貴喎, 即刻入去試下先我叫左個晚市套餐, 一碗拉麵加小食同飲品, 都係六十幾蚊, 加5蚊沖可以轉紅蝦頭湯平時成日食豬骨湯麵, 今次試下新野先紅蝦湯叉燒拉麵+餃子+檸水個湯底好濃郁的蝦味,一飲就知無落味精,好鮮甜,無得輸 拉麵夠彈牙, 塊紫菜仲要脆嘅隻溫泉蛋我以為得半隻, 點知係全隻處~一口咬落去爆蛋黃, 真係好美味餃子就一般啦, d皮厚左小小。絕對係可以encore的拉麵店

今晚收工收夜左，一出朗屏站就左右望望，睇下有咩好食。因為唔想食雞煲火鍋，選擇少左好多。點知一出天橋，就望到呢間拉麵店-東京一品拉麵-，之前未食過，望望個餐牌，甘平既，就同老公走入去叫野食。我叫左汁燒雞亦拉麵（韮菜麵），配南瓜薯餅，熱菜蜜。老公就要北海道九州拉麵（原麵），加5蚊配紅虎蝦湯，配芝士年糕，凍檸水。食拉麵最重要係個湯要夠熱，呢度個湯上到枱仲好熱，抵讚。我個湯底正常冇特別，但老公個蝦湯超正，蝦味好濃，早知我都加錢轉湯。雞亦好正，皮脆肉嫰。韮菜面要慢慢食，先食到韮菜味。其他好正常，係個麵吸收唔到個湯味，差少少。

個湯飲完真係唔錯，無味精得黎，但係又唔會太淡。最重要係飲完唔會口渴。拉麵我就最中意豬軟骨配韭菜拉麵。環境方面，坐都算幾舒服，唔會太逼，又有wifi，打下機睇下片都唔錯。係人多要等耐少少先有野食，可能我去個時係繁忙時段。今次係趕時間經過又好想食拉麵先再食多次頂硬上，同半年前黎食真係差好遠，聽老闆講係因為換左廚師自己煮番，依家d食物認真有質素，本人真係好鐘意食拉麵。睇其他人食評，曾經半年前中過伏嘅人可以試下再食多一次，包唔會後悔，同之前真係差天共地。

又一篇遲黎既食評🙇🏿‍♀️ 只可以講係一間好抵食既平民拉麵。而家出面有小小名氣都成7，8十蚊一碗拉麵仔。。。呢間餐廳，唔洗咁貴，仲要大大碗，唔好諗住大碗就一定唔好食，冇質素。首先講下湯底都幾濃厚，麵條夠爽口，有次我係日本食到拉麵係有鹼水味🤦🏿‍♀️而且佢lunch set 會有杯飲品同可以+小食。呢個豬扒炸到岩岩好，跟埋個拉麵 真係飽到上心口。老闆話佢仲有其他唔同口味既湯底同拉麵，所以叫下次我地要試下。

係元朗睇完紅葉，經過呢間拉麵店。見到入面都幾多人，一於試試啦！店面同店內裝潢都幾有日本風情！豬軟骨烏冬：湯底濃味，而且豬軟骨入味又夠淋身，可惜烏冬唔算彈牙～不過$68已經包烏冬加小食，「墨魚丸」同「炸薯餅」都唔錯。加$5仲有飲品。另外再叫左「雞骨腸」，反而有驚喜！皮脆咬開有肉汁，熱辣辣好滋味！埋單價錢都好合理～

下午買餸前專登去試下呢間手作拉麪，環境一般，但招呼好好，客人不多。叫左個下午茶＄39蚊送熱飲，性價比一流我叫ge係豚肉原味拉麪（我試任何嘢都喜歡先試原味），有3片幾香口豚肉，係薄左小小（＄39我接受），一隻流心溫泉蛋，蛋黃同小量蛋白都係流心，仲蛋味濃，同我吃開日本蛋一樣味，應該係日本蛋。口感好過x蘭，豚x。配料仲有玉米粒同雲耳絲。主角當然拉麪同個湯底啦，先試一口豬骨湯，滿意，不油膩，只稍嫌淡口左小小（真系無味精，所以淡口好正常），重口味者不要選擇。我加左＄5黑蒜油，香好多。再試一口手作拉麪，幾爽口，無傳聞中ge鹼水味，我好欣賞，份量都多，我都剩左面同湯無飲嗮。（平時去其它吃都食得嗮）建議湯可以濃返d，係濃唔係重口味，等面可以掛帶湯更加好吃。下次再試試紅蝦湯

前排見到車站隔離開左間拉面，今日終於一試，我食左個豬軟骨拉麵套餐，有野飲有小食，我經濟能力咁差都覺得65蚊一個晚餐好正常。好，講返質素，面有少少硬不過我見佢有唔同口味既面，斷估係有自己製既先係咁，sorry呢方面冇研究，不過食落接受到，湯底亦唔錯。環境係有拉麵店既風味所以都ok另外朋友食既豬扒拉麵，個豬扒好大塊食唔晒，亦冇厚粉情況，抵食！食完見到咁多人彈呢間野真心覺得好奇

湯底個人覺得唔係日式，有啲大6感覺，麵質就一般，吉列豬排，唔記得整，其他嘢到晒再等咗 15分鐘至有，味道還可以，係粉厚咗啲，炸雞應該小小變咗，總括嚟講，麻麻哋，唔會返轉頭。

晏就肚餓經過門口，見好似新開，裝修都似模似樣咁，而且門口既相片都幾多選擇就入去試試，坐低叫左兩碗午餐拉麵（午餐選擇唔多）同兩杯凍菜蜜。拉麵到就試一試，嗚～啲麵係生生地，一團麵粉，係湯到浸耐左，先叫入到口，紫菜係隔夜既，好淋，根本都唔想食哂佢，我對食唔高要求但都覺得食物好差，自己煮辛辣麵仲好食，仲要成55蚊一碗，另外杯凍菜蜜要等到食完野提一提先有，仲記錯要熱既，環境麻麻地，可能算新開，啲野算乾淨，但結論就真係不值一試！

星期六中午一個人喺元朗覓食，記得朗屏西鐵站附近新開咗一間拉麵店，於是試咗個午市套餐。套餐內容係一碗拉麵加一罐汽水，坐喺吧台嘅我揀咗汁燒雞翼拉麵，而湯底就要咗蝦湯(加5蚊)。拉麵嘅份量唔算好多，溏心蛋稍為凍咗少少，不過蝦湯飲得出係真材實料熬製而成，值得一讚。即製嘅汁燒雞翼有三隻，而且size唔細，味道係中上嘅水準。由於拉麵店仍然係同區較新嘅餐廳，所以客人相對唔算太多，環境尚算可以，而服務員嘅態度都幾好嘅，希望大家會多多支持一下新開張嘅小店啦！

心思思想食拉麵，見到呢間新開，就入去試下。點知奶野！啲麵偏硬，湯底冇特別。每碗麵既份量都唔多，價錢就幾貴下。味道上真係好普通，同去壽司店食既拉麵冇咩分別，唔係拉麵專門店應有既水準。一試無妨，一試就夠！無可否認，呢間野地點上幾方便，完全係正元朗西鐵站隔離，夜媽媽懶得行既好就腳。不過都係果句，想食好食既拉麵唔會揀呢間，行遠少少就有其他更好既，況且呢個價錢一定有大把選擇。簡單講句，性價比相當低，應該就唔會再黎。

呢一間拉麵之前買野嘅時候無意中經過，個位置對我嚟講唔算好就腳，不過出於好奇之下都行左過去試下！見佢主打拉麵，梗係要食拉麵啦。佢嘅拉麵價錢都唔算平，諗住質素應該都會有番咁上下掛。叫左一個汁燒雞扒黑蒜油拉麵試試先！雞扒同拉麵分開上，雞扒上面放左木魚。木魚就好多，塊雞扒就好細。我食量唔算大食埋個麵都覺得唔係好飽。至於個麵底我覺得淋左少少，食落又無咩特別。對比價錢，佢嘅質素只可以話係普通，湯底亦都唔覺得有咩特別！上枱嘅時候，塊雞扒深深地埋藏左喺木魚下面 =.=另外叫左碟餃子，餃子算係平，算係咁啦！價錢唔算平，質素普普通通，試一次就夠喇！