春城銅鍋米線

营业中

休息中

新開位於朗豪坊附近既米線小店，同連鎖既譚仔三哥好相似，都係先揀湯底再自由配餸，仲可以加配小食。坐低發現店名好有意思，原來春城一詞係黎自「雲南昆明，四季如春，又名春城」，餐廳應該係走雲南米線既路線～🥢蟲草花椰子雞米線朋友仔唔食得辣，所以叫左呢款養生米線！先試一啖湯頭，椰香味十足，有好多蟲草花，木耳同紅棗，夠晒鮮甜又唔會感到油膩。雖然無加錢轉雞脾，但好好彩姐姐都俾左脾位我地🫶🏻雞件切開方便食用，仲俾碟仔裝骨頭！🥢酸酸辣辣銅鍋米線湯頭包左一堆配菜，有肉碎，芽菜，腐皮，酸菜，木耳絲同甜酸菜，叫左bb辣再配一大堆酸酸甜甜既酸菜，湯頭好夠味，米線軟硬適中又以銅鍋上檯，保持熱辣辣！配菜揀左墨魚丸同唐揚炸雞件，前者好粉，食唔到墨魚既鮮味，似係街度買黎打邊爐個種cheap cheap貨色🙈而炸雞炸得幾香口，粉漿小小厚，入口尚算juicy，而且有四大件，cp值幾高！🦐炸脆脆蝦膠豆卜見到差唔多檯檯都有嗌既小吃！第一次見豆卜釀蝦膠，平時通常都係油炸鬼配蝦膠。油炸完好香脆，難得地唔油膩，外層酥脆內層蝦膠彈牙，再蘸少少泰式辣醬，食到停唔到口！📍春城銅鍋米線旺角砵蘭街175號地舖

聽朋友說，這裏的小食好好味，就點了蝦膠豆卜和糍粑，真是名副其實，蝦膠大大粒充滿在豆卜裏面味道很鮮，糍粑外脆內軟，非常之有CP值。然後再叫了一杯奶茶，想不到很有濃郁的奶茶味，入口很滑。米線，很大碗，也很足料，我是平日午餐後來，就不用等太久，有下午茶特價和套餐就更好啦😝。

我的椰子雞松草花米線很好味，椰汁湯底味道濃郁，雞肉也好多，配料也十分足料。我男朋友叫的紫菜蠔仔米線就arm果日生病的他食，因為容易入口。最後小食叫了招牌的炸蝦豆卜，很惹味，一碟有5件，好滿足！！

見網上有人推薦就去試吓點知一試就中伏😓😓落完單等咗半個鐘先有仲要遲過我哋入嚟嘅都仲快過我哋食人哋幾乎食完 我哋先有得食已經催咗幾次單 都keep住問我差啲咩…上完菜仲要錯單😅因為唔食辣先叫唔辣但上碗辣嘅比我本身以為因為啲肉碎先咁辣但愈食愈辣 問佢係咪正常 先知比錯咗我哋上菜之前佢哋已經有check單😥Sorry都冇句腩肉極韌好難咬點咗豬腸 但得三條極瘦嘅豬腸啱先睇返openrice先發現原來成日都係咁總之極唔推薦呢間嘢又唔好食又錯漏百出

之前旺角新開咗一間米線 一直好想試下 經過個陣發現好多人排隊😵‍💫最後過左一排見少人左先食🤣 都排左大約10分鐘左右🙈米線一上枱都幾有驚喜 一個個銅鍋🤩 幾有新鮮感～ 而且新鮮煮出嚟熱辣辣 望落雖然細細碗 但食完都幾飽👍🍜 酸酸辣辣銅鍋米線（+蘿蔔 雞肉） $52充滿酸菜嘅米線～ 唔係食開嘅麻醉辣味 食落幾夠酸味 辣味唔突出 唔太食得辣嘅都可以試下😏 米線配菜都幾多 足料👍蘿蔔同雞肉冇咩特別 雞肉食落都幾多 呢個價錢抵食😛🍜 農鄉番茄泡椒銅鍋米線（+金菇 腩肉 竹笙 牛肉） $79本身鍾意泡椒 好食 好香 而且辣而不油 仲好開胃🤩 但我唔太鍾意加番茄 一係就齋蕃茄湯底😂 總之就係覺得2個唔夾🙈 但湯底係唔錯嘅 唔係齋用茄膏煮出嚟👍餸方面冇咩特別出色 都係咁上下🤣🍗 唐揚炸雞件 $25呢個一定要試下/ 當米線餸叫！炸得好香口 粉唔厚 食落幾有汁 有少少似屯門天水圍個間小鍋米線嘅南乳雞件😉個人認為旺角太子區域太多高質素米線 呢間唔算特別出色🙈 如果想試啲非四川味/清少少嘅米線 都可以試下👍 而且地點都幾方便易搵～🖐️試一次無妨～

之前就bookmark左呢間米線，難得同朋友早食dinner就去試下呢間米線🍜我地兩個都叫左豬扒酸辣辣米線，我同朋友唔係幾食得辣，所以叫左bb辣，對佢黎講都OK接受到嘅辣度米線方面，面唔算好出色，正常發揮，但係個湯係幾好食，有好多料，包括芽菜、碎肉粒、腐片、甜酸菜，而且份量都幾多！豬扒好出色，煎得好好食，唔肥而且香口！但係建議早小小到，我地星期五兩個人6點半到，都差唔多滿場，之後7點已經多人等位。

【酸爽麻辣。銅鍋米線】 被銅鍋吸引而來得雲南米線,地點很方便,位於旺角朗豪坊附近的小店, 雲南昆明素以「春城」著稱,因其四季如春。店舖是掃碼自助點餐,米線可選套餐,也可以自由搭配。 ❈ 豬扒酸酸辣辣銅鍋米線HK$52酸辣湯底選了中辣很醒胃,湯底的配料已包括了肉碎、芽菜、腐皮、酸菜、木耳絲和甜酸菜。酸菜帶點甜味很脆口。豬扒是大大的一塊,現點現煎,肉質不乾很鬆軟。❈涼拌芥末魚皮HK$38芥末的味道不會太強烈,不會嗆鼻。搭配上彈牙的魚皮,很清爽。 註：凡惠顧米線壹碗。即可以加＄3 配熱飲壹杯、凍飲加＄6、罐裝飲品加＄8、特飲加$11

米線店香港已很多，但今次好有驚喜，同其他一般嘅米線店舖不同，春城銅鍋米線好有水準有驚喜😁湯底好好味😋我點左蟲草花雞米線，好多雞👍材料新鮮，仲有其他小吃魚皮雞翼值得再去吃

尋日經過砵蘭街，見到呢間餐廳入面幾多人，膽粗粗入去試吓叫咗一個招牌銅鍋米線加腩肉同牛腱，幾有驚喜喎 ，個米線keep到好熱，尤其是個牛腱，好入味另外叫咗幾個小食炸脆脆蝦膠豆腐卜涼拌芥末魚皮頭抽雞翼爆漿紅糖糍粑四樣嘢都唔錯，但我個人推介魚皮，個芥末好香，魚皮好爽口

豬扒麻辣撈米線從未食過咁好食既麻辣撈米線，平時我鍾意食湯米線多，之前同同事一齊lunch是食左佢同一淡撈米，只係食一淡已經好好味，一試難忘，令我對撈米改觀😊豬扒好好食，又大份，唔油膩，剛剛好，建議食小辣，又香又好味😋好滿足小食魚皮：魚皮有啲韌，食佢需要有相當牙力，唔夠脆口，味道還可以糍粑：熱辣辣咁食有流心效果，很不錯，無我食過咁多間最好食既魚卜炸蝦膠好食好脆，外脆內熱軟，好食總結，會再幫親，很熱氣，食完生左幾粒瘡，食完有少少口渴，不過正常既，得閒食下唔錯，員工有交帶，有禮貌，👍

上openrice睇下附近有咩食就搵到呢間用銅鍋上既米線，仲有我未食過又好似好吸引既紅糖糍粑，就打算試下佢！春城麻辣銅鍋米線共$56簡左bb辣豆卜+$7生菜+$7因為佢最少要簡2款餸凍檸茶+$6爆漿紅糖糍粑$30爆漿紅糖糍粑無想像中咁爆漿，但味道都唔錯幾好食，唔會太甜，糯米夠q夠軟米線本身會有啲肉碎同2款酸菜，配搭呢個麻辣味就變左酸辣湯咁，好好味BB辣就真係唔會太辣，好岩唔太食得好辣既人都食得！豆卜都超易入湯汁，好味！凍檸茶味道係正常茶記口味、少冰真係有少，而且都有成杯滿！好飲！有機會都會願意再訪

真是唔好轉其他食材，因為一定會錯單，仲要一定是次次都會錯，之前一定要係鋪頭確認，然後都會發現是錯，又要繼續等，拎走之後都是錯😅😅真是唔會想次次都要係鋪頭確認先得囉，咁不如鋪頭食啦，都可以即刻轉嘛，同啲阿姐反應返永遠都是唔好意思啊，態度照舊，同埋外賣已經收餐具費啦，錯左轉其他都唔肯換個兜，辣湯轉清湯，啲清湯上面全部是浮緊啲紅油，係咁死撐話一定轉左，咁啲紅油邊度來啊大佬😅😅我都懶得返去轉返，想講以後留意返啫

米線粉絲片控一定要埋來睇📣旺角新開米線店以銅鍋器皿盛裝，溫度能夠保持得更耐，食得慢啲米線都唔會咁快凍。而米線湯底有蕃茄、酸辣、麻辣，仲有椰子雞，配料種類款式豐富，仲有小食款式。麻辣鍋鍋米線｜$59 👍🏼· 金菇 秘製雞翼 木耳絲酘辣辣銅鍋米線｜$61· 竹笙 香炸豬扒 炸脆脆蝦膠豆卜｜$35👍🏼👍🏼兩個湯底相比麻辣湯比酸辣湯較為出色，香氣撲鼻麻麻辣辣，而酸辣湯底唔係係幾夠酸，如果要酸啲會更好，配料正常發揮，而雞翼都算入味，唔錯。最後叫左個小食，見到好多人都有叫而且睇相都相當吸引🤤真係必必必必點，豆卜炸到表皮超級鬆化，而釀入既蝦膠非常豐滿，整體口感同味道挺好。

📍春城銅鍋米線🇭🇰 旺角砵蘭街175號地舖身為米線關注組嘅一份子呢個最近咁hit嘅米線 當然要去試試😋 春城麻辣銅鍋米線 $36香炸豬扒 +$16螺旋藻 +$7唔算好麻～ 不過好香小辣都係五小辣左右😋 農鄉番茄泡椒銅鍋米線 $38新鮮蠔仔 +$16生菜 +$7呢個小辣=平時譚仔五小辣左右超級重辣椒味 好香 有刺痛感個人覺得佢嘅餸好食過湯底湯底老實講就好一般嘅好味但佢個炸豬扒係好食同埋好少可見到蠔仔 都係好鮮唔腥！😋 炸脆脆蝦膠豆卜 $35呢個都係好好食！ 推薦

酸酸辣辣+腩肉+蘿蔔腩肉都幾大塊，唔乾柴，幾好食蘿蔔勁甜，懷疑有浸糖水招牌睇落有好多湯底揀但係個湯底配菜其實都一樣不過湯底係幾好食米線唔斷，似係x記嘅米線唔會太淋身份量都好夠