影片
今年中秋节时，晌屋企附近个商场消费满指定金额获赠一个「明爱天粮包饼店」嘅双黄白莲蓉，喺第一次试佢哋嘅出品。当时嘅食评文末喺咁讲：「佢哋唔做门市，将来再试，只有随缘！」，估唔到食友咁有我心，帮我续一续依份缘 ，就趁圣诞，送小弟一盒「明爱天粮包饼店」出嘅「圣诞小屋曲奇礼盒」。有关「明爱天粮」依间社企嘅背景今次就唔多讲，因为上一次食评都有详细介绍。而食友所送嘅曲奇礼盒，内有6款口味，全部独立包装，以下就逐一同大家分享： 姜饼人曲奇 传统姜饼人造型，笃多两只眼仔，加个笑，就更可爱喇。姜味较为轻盈，可惜唔喺好够脆。 杏仁曲奇 曲奇喺普通牛油曲奇底，捞埋大大细细嘅杏仁碎，入口比较香脆、松脆，质素不俗。 红莓曲奇 睇表面已见落咗好多红莓干，曲奇同样以牛油曲奇做底，咬落唔单只有香脆嘅口感，咬到红莓仲有少少酸酸甜甜嘅味道，以及烟烟韧韧嘅口感。 黑糖杏仁朱古力曲奇 朱古力味几香浓，仲有好多杏仁片，不过，黑糖味被朱古力冚一冚，所以唔明显，但仍觉得佢唔错。 麦片合桃提子曲奇 礼盒有两款加入麦片做嘅曲奇，但两者做法大不同。依一款喺将麦片黐满底面，而曲奇本身口感有少少松散，合桃唔多，所以食落唔太觉得有。 麦片杏仁朱古力曲奇 而依款麦片同上面𠮶只唔同，麦片混和粉团做成曲奇，里面仲有杏仁粒同朱古力粒，又香又脆口，比起麦片合桃提子曲奇好食好多。对比两次明爱天粮嘅产品，小弟就觉得上次嘅月饼稍胜一筹，晌度都再次多谢食友嘅关照 。
继续阅读