影片
趁天气好，同啲老友一次过由屯门起步，行晒蓝地水塘、石矿场同洪水坑水塘，最后经过埋村屋出番青山公路，但未到青山公路就遇上「文记」，大家都无咩要求，索性就晌度放饭。从外就知喺村屋格局加建出嚟，有露天位，亦有室内，时值正午，喺有啲热，自自然然拣入去坐，凉吓冷气舒服啲，再者，坐出去要吸二手烟嘛！午餐就一个水牌睇晒，共6款选择，但你会见到F同G两款菜式喺固定：客家咸鸡饭、梅菜扣肉饭，原来茶记嘅前身喺主打卖客家菜，依家用番原名，但就走茶记路线。餐饮今次拣冻柠茶，酸爽够解渴嘛，所以，一嚟到就猛贯几口，相都唔记得影呀！客家咸鸡饭 $57既然喺主打呢两款客家碟头饭，我哋都喺食呢两款。咸鸡饭就饭𩠌分开，份量几足，老友就话几唔错，虽然唔知冰鲜定新鲜鸡（个人估都喺前者多），但鸡有鲜甜味，皮下脂肪少，鸡皮爽滑，肉质亦够嫩滑，而且十分入味，咸咸香香。梅菜扣肉饭 $57难得老婆无一齐，选择自然可以放纵少少，就要一客梅菜扣肉饭，梅菜同扣肉都非常之多，冚过晒成碟饭。啲扣肉睇起嚟都肥架，一层肥膏一层肉，不过，咬落又真喺唔觉油腻，卤得入味，口感蛮松化，啲梅菜无过咸，反而带点甜味，捞饭一流。今次行山因为有啲新手，所以，就安排一条唔太长，亦唔太难嘅，又睇到两个唔同嘅水塘，大家都行得开心，晌「文记」食得饱饱，又凉完冷气、摊抖完，大家都话力气都返晒嚟。
继续阅读