手作功夫茶 (盈暉薈)

营业中

休息中

我作為一個經常買功夫茶嘅顧客今次真係大有失望叫咗杯伯爵奶茶伯爵奶茶味完全唔夠濃根本唔好飲!加上等候時間我覺得有啲離譜明明得一個客喺舖頭點解仲出杯野飲可以出10分鐘都未出係咪覺得個客冇所謂

好飲既黑糖波霸珍珠奶茶，呢排每次過黎游水都會飲返杯，價錢唔貴，味道唔錯，入會重有折。 友人飲綠茶奶都話好味😋, 另一位朋友最愛加其他配料。 又可以少甜，感覺味道剛剛好。飲左再食少少野當一餐，當輕食。

26/09/2023我經外賣平台買咗3杯嘢飲，本身自己唔飲得奶，所以自己飲嗰杯ordered翠玉綠茶加晶球，拎到番屋企一飲，發現自己杯嘢飲有奶，就已經即刻打去問可唔可以換番杯啱嘅嘢飲，嗰時我記得係有3個staff，只有一個女staff，佢就係整飲飲嗰個，佢話冇得一換一，只可以經外賣平台refund，完全張個責任推哂去外賣平台度，態度十分惡劣。當日番晏嗰個女職員唔該可唔可以再培訓一下，佢嘅態度真係差到一個點，己經唔係第一次！！！！！！！！！！！！！！！！！！！

點左愛玉檸檬綠茶味道好淡，檸檬竟然係檸檬沙冰，愛玉一d都唔甜，叫左功夫比例既甜同少冰（無得走冰），味道都係好淡,好似飲緊檸檬水既沙冰咁，一d綠茶味都無，唔會再點呢個口味。

上星期我諗住買3杯嘢飲，我已經講得好慢，第一我要杯伯爵拿鐵，一杯鐵觀音奶茶和一杯薑汁鮮奶問佢折實幾錢，佢至話只聽到一杯伯爵拿鐵其餘唔記得，叫我講過，啲人都無心裝載嘅，叫請佢的要佢帶心和腦才好返工嘛今日21/8諗住簡單買兩杯鐵觀音奶茶，一杯薑汁鮮奶+一個膠袋，叫咗佢少甜佢無打落張收據，到取時我問佢我有講少甜但張單無打究竟有無少甜呢，佢話做過3杯俾我，簡直嘥我時間，點知返屋企睇佢原來打錯咗杯薑汁奶茶俾我，而家要倒咗佢簡直嘥我錢，我買嘢仲要逐隻字同佢做QC做校對呀？ 唔係穿一隻耳環潮就得㗎，咁樣好乞人憎㗎，餐餐幫襯都做錯嘢，冇一次例外，何後必幫襯倒錢落海， 同埋佢杯杯杯蓋都吸唔實㗎就算我俾咗$0.5個膠袋費個膠袋真係廢，個膠袋未返到家都濕曬呀個底以後再喺咁無進步或改善，好難再入去幫襯，你又唔係果種做得特別好，遲啲美孚有分店，我都情願去遠啲買好過受氣，

3/6 端午節諗住收工買兩杯嘢飲吓啦，點知見到一個骨杉杉嘅女子，喺工作時間兩邊都是整嘢飲中間位置彈彈跳，好似仲穿拖鞋㖭，我本來在買嘢飲的，點知收銀個哥哥仔掛住𥄫女跳，加上果度音樂聲已經勁大，收銀哥仔冇留心聽我講要買啲乜，到佢回覆我買嘅嘢時，噏錯曬我都冇心機留低幫襯，等佢繼續𥄫女，咁就可以有收入、有糧出畀佢㗎啦，如果個女員工咁樣跳法，整親你哋在工作地方整親係咪有得賠㗎，所以至可以肆無忌憚咁做，咁樣玩 show 波就唔好做呢樣服務性行業啦，另謀出路啦 唔係張九折咭仲有效，真係罷買佢不過已經少咗幫襯，免得幫人教仔女…嘥氣

嘢飲係ok嘅，但啲staff嘅服務質素就。。。幾次買明明得自已一張單，staff有45個，但都可以等成半個鐘先攞到杯嘢飲。攞到嘅嘢飲明明叫咗走甜，少甜，到手嘅都可以係冇走／少甜。比啲飲管嘅配搭又錯，明明有珍珠／晶球，啲staff夠膽死可以比住幼飲管。仲有，唔該啲staff掂完個口罩可唔可以rub下你對手，你哋做飲食㗎！買杯嘢飲姐，洗唔洗咁呀！！

依間「手作功夫茶」開咗一段日子，較早前幫襯過一次，不過，嗰次就無寫食評。今次兩公婆行完短山上馬騮山，落返嚟美孚，就齊齊買杯台式茶飲解解渴。如果以賣茶飲店嚟講，佢個鋪位都算大，裡面仲有少少企位，雖然窄窄哋，但可以企入去涼吓冷氣等。有啲咩選擇，一圖睇晒，不過，最有趣喺晌每一組大類別都加咗啲「功夫」術語，如爆拳、輕功、內功……等等。亦如大多數茶飲店，可以額外加配料，而甜度、冰度又有得揀。伯爵珍珠奶茶 $26、鮮芋頭Q奶綠 $29由於用咗紙杯做包裝，亦封埋口，所以，就睇唔到裡面個樣喺點，當然，打卡度就低咗，但就比起用膠杯就環保啲。珍珠奶茶飲得話多唔多，話少亦唔少，以伯爵茶做茶底，效果唔錯喎，幾有茶香，而且，珍珠亦具咬口；老婆嘅奶綠喺以綠茶做茶底，算別有一番風味，飲落茶嘅香味帶微甘，底下有嘅芋頭粒，好粉、好甜。綜合而言，兩杯凍飲都唔錯，定價亦算相宜，夠真材實料，而且，次次經過呢間店都唔多人，所以，唔使點排隊，唔需要等好耐。

剛才 在盈暉薈 用openrice落單 落到去竟然 等咗好耐 佢亦都知我喺度等 落去已經問張單嘅編號有得冇得攞 佢叫我等十分鐘 誰知 25分鐘已經過去 所有人已經攞曬茶 我行埋去問 佢竟然同我講未做 做嘢態度非常差 唔知係咪發脾氣 兩杯飲品嘅水準亦都非常之差 所指係比平時差 非常失望( 主要因為 我冇諗過 買杯嘢飲要成半個鐘頭 當時我袋住D凍肉 已經溶雪出水 真係好嬲)公平啲講 之前嗰班員工 服務水準好好

芝士奶蓋水蜜桃🍑 $33呢到個芝士奶蓋真係極推介💯口感好綿密好thick好dense🤤芝士味超濃郁 個鹹香味仲超出🧀個奶蓋仲撈埋啲芝士粒粒 昇華咗成個芝士味😍今次冇少甜少冰 個水蜜桃底飲落雖然係好香嘅桃味 但係感覺係落咗好多桃味糖醬 真係有啲甜😫同埋啲冰粒打得唔夠碎 食到一粒粒冰粒 但係又唔係沙冰咁🧐如果降低甜度或者配茶底應該會幾夾同埋更加好味😋不過整體嚟講我會為咗個芝士奶蓋encore‼️

呢間手作功夫茶開咗都有一段時間 每次去都排晒長龍🙈做asm做到好攰 叫咗呀妹幫手買😈.輕飲水果茶王👑 $32唔知點解佢叫做輕飲 好大杯🤣係繼一芳之外飲過最好飲嘅水果茶‼️真係好足料好濃郁嘅果香味🤤入面有橙,西柚,蘋果同熱情果😍仲有好多奇亞籽喺底🤩啲熱情果肉同埋奇亞籽一粒粒 豐富咗成個口感🤤雖然揀咗無糖 但係飲落都係好甜 唔知係咪佢係用熱情果醬呢?🧐不過因為有橙同西柚🍊所以都balance番 唔會好甜 酸酸地幾清新😚杯野飲寶係好大杯 又夠多果肉 奇亞籽仲好多 成杯飲晒都幾飽😈水果茶係健康之選 夠高纖維又高維他命C💓

呢間飲品店係台灣過江龍，係附近唯一一間台式飲品店，好好飲！做埋會員更有9折。自己最經常飲波霸黑糖珍珠鮮奶，唔會太甜，岩岩好！但之前試過叫有奶蓋的飲品，覺得奶蓋太厚，有點濟。

依間台式飲品我飲過兩三次，今日適逢休假，又見到OpenRice做緊外賣自取既優惠，所以去買左杯鐵觀音珍珠奶茶。珍珠彈牙，茶味濃郁，加埋優惠真心抵飲！唯一美中不足可能係製作時間較長一點，可能下午三點三較多客人，值得一試！