影片
主打生姜酱油汤底，店员称汤底加入大量豚骨鸡骨同鱼干每日煲8-9个钟，加上店家自家调制酱油，汤底带著浓厚酱油同生姜味，入口香浓而不油腻，面条系中细面，爽口够滑，叉烧亦做得好嫩滑而且入味，玉子亦流心，整体碗面真系唔错，最重要系店家强调全部材料系用日本飞机货(汤骨，面条，叉烧，玉子)，一碗绝对抵食嘅高质素拉面。
继续阅读
同同事嚟试呢间位于九龙湾嘅「我武者罗」拉面，佢有特色嘅生姜酱油汤底，喺其他拉面店较少食到，值得一试!生姜汤底有两款，一款系塩生姜，一款系生姜酱油塩生姜汤底较淡，姜味唔太浓，适合比较钟意清淡嘅人。生姜酱油姜味较浓，亦较咸，面条较粗，唔错!豚骨汤底味道够浓，面条较幼，但几好咬口。值得一提嘅系佢嘅生姜汤底同豚骨汤底配搭咗唔同种嘅叉烧，厚薄唔一样，但都系肥瘦层次分明，口感非常好，仲有三块咁多，好味!另外佢嘅温泉蛋都非常出色，流心蛋黄非常好味!除咗面之外，可另加小吃，我哋叫咗个饺子，味道一般。仲有系而家做紧优惠，每个拉面都有一支汽水送呢！
继续阅读
九龙湾工业区终于有拉面食啦。先讲环境，楼面占地算大，而每张枱之间空位亦足够，每张凳亦都有位置可以存放物品，算系非常舒适。拉面款式唔算多，只系有三款汤底，配有叉烧、溏心蛋或者紫菜。今次试咗碗辣拉面（红莲辣浪豚骨拉面），加咗洋葱碎、炸蒜头嘅关系，令到味道更加香浓。汤底包含著一种鲜味，唔系一味得个辣字，亦都唔会食完之后令人好口渴，算系值得一试嘅拉面。溏心蛋亦出色，外爽内软口感佳。更加惊喜嘅系，原来每叫一碗拉面都会送一支冰冻嘅樽装忌廉或者可乐，更加值回票价。
继续阅读
今日lunch 去咗食拉面之前杂志都介绍过呢间叫我武者罗嘅餐厅，系新潟生姜酱油汤底闻名嘅拉面店，九月已经开张啦，之前试过盐汤拉面觉得唔错，今日捉埋同事一齐试下。今次叫咗理玉子生姜酱油拉面。先讲汤，酱油有淡淡嘅姜味，好有层次感，虽然面上有一浸油，又唔会太油腻。面嘅软硬度统一咗，冇得自己拣，但系煮落条条分明，几好咬口。最出色系叉烧，纹理好靓，肥膏同肉嘅比例啱啱好，肥膏入口即溶，超好食配料仲有荀、紫菜同少少葱，好丰富！试业期间仲送可乐一枝，食完饮返啖汽水啱啱好。同事叫咗豚骨汤底，一个辣一个唔辣，味道更出色！下次一定会再嚟！
继续阅读