廣東人餐廳火鍋 (已結業)

呢日同家人喺元朗揾地方食下午茶，喺媽廟路附近見呢間餐廳個名幾特别，就決定入去試下。餐廳座位都算闊落，枱面、座位、牆身同餐具都好乾淨，感覺舒服。侍應姐姐對每枱客都全程面帶微笑，今時今日好難得喺一般茶餐廳見到咁有禮嘅員工，實在值得一讚！我點左個酥炸雞翼拼西多士($32)配紅豆冰($5)。鷄翼外皮非常香脆，入面的肉質juicy嫩滑。外皮食落有豆辦醬味，唔怪得望落帶少少紅色，不過就唔算入味，如果可以醃耐D就好了。西多士麵包中間嘅醬鹹鹹地，加埋面的糖漿都幾好味。紅豆冰就好正，非常大杯，味道亦好好，跟餐加$5就有，好抵飲！呢餐坐得幾舒服，味道唔錯又抵食，已經列入我嘅餐廳名單入面喇！

行經元朗水邊圍邨附近有點肚餓，見到有間餐廳門面都唔錯乾乾淨淨又唔太多人，於是就入去試下。叫左個常餐($39)，包括有豬扒湯米粉、火腿奄列配牛油多士、凍咖啡。湯米粉口感唔錯，煮得唔太淋又唔太硬剛剛好，啖味濃湯底味道適中，配上少少耶菜絲食落無咁悶。厚切豬扒是另外分開上，唔會被米粉湯浸淋晒，見到厨師的用心，值得一讚。煎得少少脆又香口的猪扒醃味調較適中，特顯猪扒香味，肉汁仍然保留，口感一流。火腿奄列煮的時間控制得宜，奄列裡面滑溜的蛋醬包住幼切的火腿絲味道真係無得頂。脆口的多士配上薄薄的鮮牛油味道一流，火腿奄列連多士一啖一啖食落口簡直是絕配。💑💑凍咖啡的咖啡味十足，奶味又夠，大大杯，只是額外加$2就有得飲，真係有驚喜。下次一定要加$5試埋個黑白''鴛鴦紅豆冰''

叫過一次豆腐火腩飯得兩舊火腩既，之後又一次仲衰叫五香肉丁炒飯得兩舊肉丁仔，其他就系飯，呢的就系佢間餐廳既外賣情況，如果比40幾蚊去買的既飯真系会有的嬲嬲地！大家叫外賣真系唔好叫呢間最好就堂食，拎走就真系唔好搞，一系就打開個盒睇下！！

媽咪生日，好想同佢打邊撈但係元朗一係就係好難食嘅任食，一係就貴到3-400蚊一個人。一係就坐得好唔舒服，環境會又嘈又唔乾淨但係呢間店d食物好味，丸同墨魚滑都好正！牛都好肥美又坐得舒服，我地同媽咪切蛋糕果陣仲自動自覺幫我地熄燈等我哋唱生日歌又幫我地攞啲乾淨嘅碟出來有冇收我哋切餅費埋單一D都唔貴！ 一定會再幫襯！ 

地方雖細 但勝在坐得舒服 環境唔污糟👍 食材夠新鮮 👍 服務態度👍湯底足曬料 成條大眼雞完全唔係味精湯底！長腳蟹更加無得彈！ 夠曬Juicy 😍牛肉夠滑夠嫩口 唔會話熟左就好似食香口膠咁。會再去食👍。

天氣轉涼，放工之後同屋企人經過水邊圍附近既呢間新開既火鍋店，心血來潮同屋企人入去試一試。全晚叫既食物都好有水準，牛肉好滑，水食皮薄足料，今次叫左蕃茄薯仔牛肉湯底，湯底好足料，而且服務態度好，地方環境乾淨舒服，一定會再黎食過。下次可以試下個雞煲或者羊腩煲，因為見到隔離枱食好似都係不錯既選擇。Good!